［愛情純愛］我地之間嘅友誼純度絕對等於零！！！: 93. 我在呢⋯
「叮噹～叮噹～」沈心怡㩒咗兩下門鐘
潘景諭拖着疲倦嘅身軀落床行去開門，沈心怡手上咩都冇拎，潘景諭一開鐵閘，沈心怡就推住潘景諭番房
「番房番房⋯！」沈心怡輕皺起眉頭催促潘景諭，但聲線裏冇一絲嘅煩躁，而係滿滿嘅擔憂
「咳咳⋯！」潘景諭坐低床邊咳咗兩聲，灘番喺床上
沈心怡伸手摸一摸潘景諭嘅額頭，本來貼喺潘景諭額頭上嘅退熱貼都已經熱晒
「呢塊都熱晒啦⋯！」沈心怡從書包裏拎出一包新嘅退熱貼，打開後拎咗一塊，「買咗退熱貼啦，換咗額頭呢塊啦⋯」
潘景諭將本來貼喺額上嘅退熱貼撕去，沈心怡將新嘅退熱貼貼到潘景諭嘅額上
「有冇食藥？」沈心怡將撕落嚟嘅膠膜掉到旁邊嘅垃圾桶
「嗯⋯食咗⋯」潘景諭微微點頭
「做咩好地地會發燒？」沈心怡坐低喺潘景諭嘅床邊問道
「琴日出街嗰陣冇落雨咪冇帶遮⋯」潘景諭講道，「番嚟嘅時候落大雨，然後我淋雨跑番嚟⋯」
「你明知落雨都唔識帶遮出街㗎咩⋯帶定嘛⋯！」沈心怡無奈地講道
「以為佢唔會落雨⋯」潘景諭將被拉到蓋住鼻嘅位置，「你有冇幫我拎功課⋯？」
「冇呀～」沈心怡搖搖頭，一臉輕鬆地講道，「你病就唔好掛住做功課啦！平時又唔見你咁勤力？」
「我都只係問下啫咳咳⋯！」潘景諭講道
「襪子呢？」沈心怡左右張望，由入屋開始就見唔到白襪嘅身影
「你可唔可以有啲良心呀沈心怡⋯」潘景諭帶着沙啞嘅聲線講道，「喺病人面前仲顧住搵貓⋯」
「我點冇良心？我放咗學仲特登去買埋退熱貼比你呀⋯」沈心怡不滿地講道，下一秒又道：「所以襪子呢？」
「喺櫈⋯」潘景諭微微抬一抬下巴示意
沈心怡回頭望向書枱前嘅櫈，見到襪子安穩地坐喺櫈上，從櫈背嘅縫裏偷望出嚟
「嗨襪子～」沈心怡起身想行到櫈前摸一下白襪毛茸茸嘅身驅，潘景諭卻將手伸出嚟無力地拉住沈心怡嘅手腕，「嗯？」
「成個病人喺你面前，你就去搵貓⋯？」潘景諭問道，平時自信嘅聲線，今日都變得無力
「我咪喺度囉⋯」沈心怡講道，望住潘景諭，心臟不禁噗噗跳，「我坐櫈唔得咩⋯？」
「唔得⋯」潘景諭搖搖頭，「離我太遠⋯」
「係唔係燒壞腦呀⋯」沈心怡無奈地道，伸手摸一摸潘景諭嘅額頭，「係唔係真係病到傻咗？」
潘景諭一下子坐起身，沈心怡嚇咗一跳，一臉疑惑地望住潘景諭
「起身做咩呀⋯快啲蓋好被瞓番低啦⋯」沈心怡輕輕推潘景諭一下
「唔想⋯」潘景諭微微搖頭
「發燒仲唔休息多啲？快啲瞓！」沈心怡半命令式道
「唔要⋯」潘景諭微微耷低頭，好似個受委屈嘅小朋友一樣微微抬眼望向沈心怡，「想見多你一陣⋯」
沈心怡都唔知潘景諭到底係病到傻咗定講緊真心話，心動同時亦唔敢心動，想要相信潘景諭係講真心話但又唔敢相信佢
「我個人咪喺度⋯」沈心怡無奈地講道，「我又冇話走⋯」
潘景諭將頭靠喺沈心怡嘅膊頭上，沈心怡頓時覺得自己好似痴住個暖爐一樣，頸同膊頭都熱辣辣
「你快啲瞓啦⋯聽日唔想番學係唔係？」沈心怡輕皺起眉頭問道
「嗯⋯」潘景諭嘅呼吸莫名其妙地加快咗
「你要咁樣到幾時⋯？好熱呀你⋯」沈心怡有啲唔好意思地講道
「沈心怡⋯」潘景諭無力地輕喚沈心怡嘅名字，「我有啲嘢想做⋯但唔可以做⋯」
「你、你講咩呀⋯！？」沈心怡嘅臉頓時紅透了
「冇⋯」潘景諭一下子灘低喺床上，側身背住沈心怡瞓，「病到傻咗啫⋯」
潘景諭背住沈心怡，又唔講清楚啱啱講嘅嘢嘅意思，留低沈心怡一個胡思亂想
沈心怡嘅臉頰都紅晒，整個睡房剩低尷尬嘅空氣，心臟跳動嘅聲音明顯得好似有環迴立體聲一樣；沈心怡起身，潘景諭感覺到床褥嘅郁動，連忙坐起身想拉住沈心怡
「我做一陣功課⋯」沈心怡見潘景諭一臉緊張地坐起身便解釋道
沈心怡彎腰從書包中拎出功課file，坐到潘景諭嘅書枱前，將白襪抱到地上
「你唔會走住㗎可⋯」潘景諭問道
「你想我留多陣嘅話，我都可以留多一陣⋯」沈心怡輕輕抿唇講道，「我可以留到5點幾都得⋯」
「嗯⋯」潘景諭微微點頭
「你瞓啦～」沈心怡露出尷尬嘅微笑，「我喺呢度做功課。」
「嗯⋯」潘景諭點點頭，沉默咗兩秒之後，潘景諭抬眼望向沈心怡，「要你特登放學過嚟一轉對唔住⋯」
「唔緊要呀～」沈心怡對潘景諭突如其來嘅道歉有啲愕然，然後細細聲地道：「本來就有啲擔心你嘛⋯」
潘景諭嘅道歉冇咩特別嘅意思，只係佢忽然間諗起李逸彤講嘅嘢：「你太主動嘅話，心怡會驚會避你。」
潘景諭覺得李逸彤嘅說話亦不無道理，佢怕沈心怡真係會避開自己；過咗好一會之後，沈心怡見潘景諭冇咩動靜後便悄悄回頭望向潘景諭
「呼⋯」沈心怡鬆一口氣似的，佢發現自己都幾怕潘景諭對自己嘅「甜言蜜語」，或者因為感覺太唔真實
沈心怡對住潘景諭嘅時候都會小心翼翼，唔係因為佢唔中意潘景諭，而係佢怕潘景諭會察覺到自己對佢嘅感情
「阿諭佢⋯會唔會都有一刻對我有少少好感⋯？」沈心怡喺心裏不禁問自己，「我對阿諭嚟講，係唔係特別嘅一個⋯」
沈心怡察得到自己對潘景諭嘅嗰份唔一樣嘅感情：「私心」
喺愛情中，所有人都係自私，有邊個會想同人分享？沈心怡對潘景諭亦如是，但同時佢嘅內心係矛盾嘅，想自己對潘景諭嚟講係特別、係「唯一」，但亦怕面對潘景諭時會令自己心事暴露⋯
IG Link: https://www.instagram.com/nd_cotttoncandy/?hl=zh-tw