［愛情純愛］我地之間嘅友誼純度絕對等於零！！！: 95. 你在呢！

「搵到你啦～」message先啱啱send出去，李逸彤就搵到邱旻顥，帶着興奮嘅小跳步行到邱旻顥面前

「咁快就搵到我嘅？」邱旻顥有啲無奈，佢冇預想到李逸彤會一轉眼就搵到佢，「會唔會快咗啲⋯」

「心有靈犀囉～」李逸彤甜甜一笑，半開玩笑講道

「係喎～咁心有靈犀得唔得㗎？」邱旻顥輕輕一笑，順手地將自己手上兩pack公仔麵放到李逸彤拎住嘅購物籃中，再順手地接過購物籃

「得呀～點解唔得？」李逸彤望一望邱旻顥手上嘅購物籃笑一笑後望向邱旻顥，「心有靈犀都幾好呀～」





「你仲有冇咩要買？」邱旻顥邊行邊問道

「有呀有呀！我要食薯片呀！」李逸彤拉住邱旻顥行番去零食區

「你上次先買完薯片，咁快就食晒？」邱旻顥無奈地問道

「你講嘅上次都成個月前啦⋯我當然已經食晒！」李逸彤理直氣壯地道，「一日一包嘅話一個月都食晒啦！」

「難怪你最近肥咗啦～食咁多零食。」邱旻顥笑咗一笑，李逸彤頓時瞪咗邱旻顥一眼





「你明明幾日前仲話我Okay㗎！咁快就反口啦！」李逸彤不滿地講道，連眼神都係滿滿嘅不悅

「唔係～」邱旻顥不禁一笑，連忙講道，「我嘅意思係你肥唔肥都好睇，宜家都幾好。」

「哼！」李逸彤一下子撇開臉，嘴角微微上揚，始終都係忍唔住甜甜地笑起嚟

「嬲呀？你咁小氣㗎咩？」邱旻顥嘅手搭喺李逸彤嘅膊頭上，上身微微前傾、微微側着頭望住李逸彤，「我識嘅李逸彤好大方㗎啵～」

「我冇嬲喎！」李逸彤立即講道，「我不嬲都好大方！」





「你話冇就冇啦～」邱旻顥笑了笑

李逸彤帶着小跳步行咗兩步，行咗喺邱旻顥前面；邱旻顥不急不慢地行喺李逸彤身後，望住李逸彤嘅背影，就好似小兩口過日子一樣嘅感覺

邱旻顥不禁莞爾，佢心裏忽然間有種想要同眼前呢個人一齊嘅強烈感覺，縱使佢唔知道最後嘅人係唔係眼前嘅女仔，但呢種強烈嘅感覺蓋過咗佢嘅唔肯定，佢知道自己係真係想同李逸彤一齊

「邱旻顥，幫我拎⋯！」李逸彤用一副可憐嘅表情望向邱旻顥求救

邱旻顥行到李逸彤嘅身旁，伸手將放喺頂層嘅薯片拎落嚟放到購物籃內

「你唔夠高咩？」邱旻顥將李逸彤由上而下打量一番

「唔夠。」李逸彤肯定地回答，然後理直氣壯地反問，「你喺度我洗咩夠高？」

邱旻顥一時三刻都比唔到反應，亦反應唔嚟，李逸彤又行過兩步睇隔離嘅零食





「佢好似講到可以完全依賴我咁⋯」邱旻顥反應過嚟之後喺心裏道，「但佢依賴我就好，唔好依賴其他人⋯」

李逸彤每一次望向邱旻顥時，邱旻顥總會心動起嚟，佢好中意李逸彤回頭望向佢嘅動作

有時李逸彤會帶着甜甜嘅笑容望向佢，邱旻顥嘅心臟就會頓時受到暴擊，感覺用生命值硬接都冇用

「邱旻顥，你估呢個好唔好食呀嗱～」李逸彤拎起一排朱古力遞向邱旻顥，「唔知會唔會好甜㗎呢⋯」

「好甜⋯」邱旻顥不禁細聲地講道

「嗯？你話咩話？」李逸彤聽到邱旻顥嘅喃喃自語便問道

「哦，冇嘢。」邱旻顥微微一笑道，然後接過朱古力望咗兩眼，「買番去試下囉～不過係milk chocolate，應該都幾甜。」





「你中唔中意食milk chocolate？」李逸彤忽然間問邱旻顥，「定你中意食dark？」

「唔⋯兩隻我都食，不過我偏向中意milk chocolate多啲。」邱旻顥諗咗一陣後講道

「哦好啦～」李逸彤笑了笑，感覺自己對邱旻顥嘅了解又深咗少少 ，「咁我買呢隻朱古力啦～」

邱旻顥輕輕一笑，總覺得李逸彤係特登揀自己中意食嗰一款

「你中意食dark嘅話可以買dark。」邱旻顥提醒李逸彤般講道

「我唔中意食dark chocolate～」李逸彤回頭望向邱旻顥微微一笑，柔順嘅長髮隨住佢回頭嘅動作散搭喺膊頭上

邱旻顥嘅心臟頓時一縮，耳根頓時紅咗一半

「如果我啱啱話中意食dark chocolate嘅話，你係唔係都會照買dark？」邱旻顥問道，佢咁樣一問，李逸彤便立刻知道邱旻顥知道佢提問嘅來意





「唔⋯都可以試下⋯？」李逸彤吐一吐舌頭，猶疑地講道

邱旻顥呆咗一下之後，嘴角微微上揚起嚟，佢感覺到自己嘅心臟狂跳

對佢嚟講，李逸彤就有呢種魔力，一顰一笑都可以牽動佢嘅情緒同心跳

「邱旻顥！」李逸彤又叫咗邱旻顥一聲，邱旻顥朝住李逸彤嘅方向行去，「你話食邊隻味好呀？」

「呢隻囉～」邱旻顥指一指左邊嗰包燒烤味薯片，「我中意食呢隻味。」

邱旻顥好似故意要話比李逸彤知一樣，李逸彤聽到邱旻顥咁講後，伸手拎咗兩包放到購物籃中

李逸彤抬頭望向邱旻顥笑了笑，邱旻顥同李逸彤對望後不自覺地嘴角上揚起嚟





邱旻顥明明只係打算嚟買兩包麵就番屋企，係十分鐘內可以完成嘅事，但最後卻過咗成半個鐘先離開超級市場




IG Link: https://www.instagram.com/nd_cotttoncandy/?hl=zh-tw