［愛情純愛］我地之間嘅友誼純度絕對等於零！！！: 85. 試探

潘景諭悄悄地將目光落喺沈心怡纖細嘅手上，佢嘅手有啲蠢蠢欲動、想直接拖住沈心怡嘅手嘅感覺

沈心怡望住瞓喺貓窩嘅白襪，心裏愉快地細聲哼着歌；潘景諭不禁一笑，覺得眼前嘅女仔好可愛

「笑咩？」沈心怡眼睛嘅餘光見到潘景諭嘴角上揚

「笑你。」潘景諭心情愉悅地道

「有咩好笑啫⋯」沈心怡嘟起嘴、帶着撒嬌嘅語氣道，「無聊⋯」





潘景諭笑得更開心，心情更愉悅，佢順手地將手搭到校呔嘅呔結

沈心怡嘅目光不自覺地落喺潘景諭捉住呔結嘅手上，潘景諭將校呔除咗落嚟搭喺櫈背上，然後解開咗裇衫嘅頸喉鈕

沈心怡緩緩地撇開臉，不禁吞一啖口水、紅了臉頰，搭喺大腿上嘅雙手唔自在地輕輕扣着

「呼⋯」除咗校呔後嘅潘景諭頓時覺得成個人都輕鬆晒，「舒服晒⋯」

沈心怡因為莫名嘅尷尬而起身行到潘景諭嘅房門口，望住門邊嘅櫃上貼住嘅相





「我地真係同班咗好多年⋯」沈心怡自言自語般講道

由稚嫩嘅臉龐到宜家，好似只係一瞬間嘅事，但原來咁樣就已經好幾年⋯

「我地好似係由四年級開始同班⋯」潘景諭緩緩地企起身行到沈心怡嘅身旁，「好似係。」

「唔記得啦～太耐啦⋯」沈心怡臉上露出淡淡嘅笑容

「有幾耐？」潘景諭上身前傾，微微側着頭探頭望向沈心怡，「我地到宜家都同班緊。」





「我嘅意思係，我唔記得我地幾時開始同班。」沈心怡下意識向後稍微迴避咗一下

「哦。」潘景諭自然地提手，將前臂搭喺沈心怡嘅膊頭上

沈心怡嘅目光沿住潘景諭嘅前臂往上望，直至同潘景諭對望

「咁如果我話想你同我一齊，你會唔會答應？」沈心怡嘅腦海中忽然閃出潘景諭上次問佢嘅說話

「沈心怡。」潘景諭提手喺沈心怡嘅眼前晃咗兩下，「做咩呆咗？」

「嗯？」沈心怡回過神，見潘景諭定睛望住自己，下意識就將視線移開，微微耷低頭，「冇，咁啱諗緊嘢啫⋯」

潘景諭望住沈心怡，想問佢諗緊啲咩但又問唔出口，喺佢心入面都覺得兩人之間嘅感覺，莫名其妙地有啲尷尬⋯

⋯





「唔知哥哥會唔會知諭哥哥有冇女朋友⋯」坐喺餐枱前拎住筷子食飯嘅邱茗然偷偷地望向邱旻顥喺心裏道

「專心食飯啦邱茗然。」邱旻顥瞄咗邱茗然一眼後講道

「哦⋯」邱茗然乖巧地哦咗一聲便耷低頭食飯

食完飯之後，邱旻顥坐喺梳化上拎住手機等李逸彤覆佢，邱茗然坐低喺邱旻顥嘅旁邊

邱旻顥自顧自地睇手機，都冇留意坐喺佢旁邊嘅邱茗然

「哥哥，你嘅朋友入面係唔係得你單身？」邱茗然以開玩笑嘅方式打開話題，「係唔係得你未搵到女朋友？」

「唔係囉好唔好⋯」邱旻顥望咗邱茗然一眼，無奈地反白眼講道





「諭哥哥靚仔過你咁多，佢一定有女朋友啦～」邱茗然笑道，但佢嘅內心都要緊張死，怕邱旻顥睇穿佢嘅用意，「點算呀？得番我哥哥係單身狗⋯」

「Sorry，潘景諭同我一樣係單身狗，畢竟我地係好兄弟。」邱旻顥裝作無奈地輕嘆一口氣

「諭哥哥果然係單身！」邱茗然喺心裏興奮地講道，然後用着毫無破綻嘅語氣又道：「但諭哥哥有好多人中意，哥哥你都冇。」

「要咁多人中意做咩？要一個咪夠。」邱旻顥笑一笑講道，喺佢講出呢句同時，李逸彤嘅身影喺佢嘅腦海中閃過

「嘖⋯講到好似人地一定係中意你咁⋯」邱茗然一臉嫌棄地道

邱旻顥企起身，咩都冇講就行番房，喺經過邱茗然面前時，邱旻顥順手地輕拍一下邱茗然嘅頭

「嘖⋯打我做咩呀⋯」邱茗然輕皺起眉頭道

邱旻顥回頭望咗邱茗然一眼，輕輕一笑





李逸彤：食完飯啦～超飽

邱旻顥見到李逸彤覆機，頓時拎起手機回覆：「我都係啱啱食完飯」

李逸彤：我媽煲咗我超中意嘅蕃茄薯仔湯！飲咗三碗，成肚都係水

「去個廁所就唔飽」邱旻顥回覆道

李逸彤：嘖嘖⋯

李逸彤：好期待星期六去食壽司～好耐都冇食過啦

「星期六咪去食囉」邱旻顥灘喺自己嘅床上拎住手機，「唔好咁為食好唔好？」





李逸彤望住手機螢幕笑咗一笑，然後從梳化上起身行番入房，喺行埋書枱前從書包中抽出功課file

「做咗功課未？」李逸彤問道，「快啲做功課啦！」

邱旻顥拎住手機猶疑咗兩秒，定睛地望住手機螢幕唔知諗緊啲咩

「打咩打咁耐都未send到呀⋯」李逸彤望住一直喺typing同online之間徘徊嘅狀態

此時，手機嘅螢幕畫面一轉，跳到來電顯示嘅頁面，李逸彤頓時微笑起嚟，但笑容裹係滿滿嘅甜意




IG Link: https://www.instagram.com/nd_cotttoncandy/?hl=zh-tw