［愛情純愛］我地之間嘅友誼純度絕對等於零！！！: 86. 甜蜜是毒

「你係唔係要瞓啦？你好似已經好攰⋯」邱旻顥聽着電話裏傳嚟嘅疲倦聲線時無奈地笑了笑

「嗯⋯少少⋯就嚟要瞓著⋯」早就灘咗喺床上蓋住被嘅李逸彤微微點頭，用被將自己包得密實

「好啦，你瞓先啦。」邱旻顥柔聲地道同時，臉上掛上溫柔嘅笑容

「嗯⋯晚安⋯」李逸彤迷迷糊糊地講道，「聽日見⋯」

「嗯，聽日見～」邱旻顥柔聲地道，然後掛斷電話後又send一個message比李逸彤：「晚安！」





邱旻顥中意每一晚同李逸彤向對方講晚安嘅習慣，感覺自己就係同其他人唔一樣

甜蜜又曖昧嘅感覺就好似毒品一樣，令人心癢同時亦想再進一步⋯

翌日一朝早，李逸彤喺鬧鐘響起時醒過嚟，仍然覺得好想瞓

「唔⋯哈～欠⋯」李逸彤打咗個喊露，然後掀開被，緩緩地落床

李逸彤拔出叉電線，拎住手機去廁所洗面刷牙





李逸彤見到邱旻顥琴晚send比佢嘅message，李逸彤甜甜一笑，然後拎起手機send一個「早晨！」比邱旻顥

邱旻顥換上校服，將今日上堂嘅嘢放入書包；李逸彤梳好馬尾、著上長襪，然後行到門前，將皮鞋從鞋架上拎落嚟

邱旻顥著上皮鞋、繫好鞋帶，孭上書包就打開家門；李逸彤行到去電梯大堂，㩒咗制等待電梯到

邱旻顥落到地面大堂，推門行出去行咗兩步之後，默默地放慢咗腳步，兩步一回頭，前腳行出大堂，李逸彤後腳就行出電梯

「好彩好彩⋯！」李逸彤望到邱旻顥嘅身影時，頓時鬆一口氣，連忙用小急步追上前，「喂喂！早晨！」





「早晨。」邱旻顥微微一笑講道，佢啱啱回頭時就已經見到李逸彤行出電梯

李逸彤安靜地望住邱旻顥，喺邱旻顥因為察覺到而望向李逸彤時，李逸彤只係微微一笑

「今日好好天呀～」李逸彤抬頭望向萬里無雲嘅藍天，感覺心情好好

「係喎。」邱旻顥抬頭望一眼後道，「心情好～」

李逸彤忽然間攝手攝腳地行到邱旻顥身後，雙手一下子摸落邱旻顥嘅後頸上

「嘶⋯！」邱旻顥頓時一縮，冰冷嘅感覺由後頸蔓延，連忙望向李逸彤

邱旻顥捉住李逸彤嘅手，令佢冰冷嘅手遠離自己嘅後頸

李逸彤微微耷低頭望向自己嘅手，邱旻顥仍然捉住佢冇放開





「唔⋯邱旻顥？」李逸彤帶着疑惑嘅聲線叫咗邱旻顥一聲

「係？」邱旻顥望一望李逸彤

李逸彤指一指自己比邱旻顥捉住嘅手，邱旻顥卻搖搖頭

「免得你又請我食凍柑。」邱旻顥平淡地講道，實際上佢都要覺得自己耳根同手心發熱

「我唔會囉⋯！」李逸彤口不對心地講道，明明心入面就覺得就算邱旻顥唔鬆手都唔緊要，不過最好就換個方式捉住佢，「我似咁衰嘅人咩？」

「你覺得呢？」邱旻顥望住李逸彤，將佢上下打量一番，「對我好啲就更好啦～」

「我對你唔好咩邱旻顥？」李逸彤扁起嘴、一臉不滿地望住邱旻顥，「吓？」





「唔知呢～」邱旻顥輕輕一笑，微微聳肩，然後就鬆開咗李逸彤嘅手，踏着輕快嘅步伐落樓梯

李逸彤跟喺邱旻顥嘅身後，當行到邱旻顥嘅身旁時，李逸彤嘅手背輕輕地碰咗邱旻顥嘅手背一下

邱旻顥嘅手輕輕地握咗一下但冇縮手，佢當然感覺到自己嘅手比人輕撞咗一下

「呀⋯救命⋯」邱旻顥喺心裏嘆氣道，因為佢正在努力地壓抑住自己想一下子拖住李逸彤嘅衝動

另一邊廂，沈心怡踏入車廂隨便搵個位就坐低

「呼⋯」沈心怡輕呼一口氣，「琴晚同阿諭食完飯之後，點解感覺咁奇怪⋯搞到我宜家周身唔自在⋯」

⋯

琴晚食完飯之後，潘景諭陪沈心怡行番屋企，明明係一段短短嘅距離，但潘景諭卻覺得路好長，或者係因為佢地都喺不知不覺間，刻意地放慢腳步而行





「點解會咁若即若離⋯」潘景諭望住地上嘅影子，明明兩個人嘅靠得好近，但喺兩個人嘅影子之間卻有一道薄牆一樣，「只要我先踏出一步⋯」

「好近⋯但好遠⋯」此刻嘅沈心怡同潘景諭一樣望住地上嘅影子，心裏有差唔多嘅想法，「係唔係我踏出一步主動啲⋯自信啲嘅話，就可以離阿諭近啲⋯？」

「係唔係可以離佢近啲⋯？」潘景諭喺心裏問道

「阿諭⋯！」喺沈心怡開口叫潘景諭之際，潘景諭嘅電話卻響起嚟

潘景諭拎出手機，沈心怡瞄咗潘景諭嘅手機螢幕一眼，見到係馨馨打嚟嘅電話，沈心怡嘅心情瞬間就下沉

「你聽咗先。」沈心怡微微一笑，潘景諭果真接電話，沈心怡啱啱想講嘅嘢頓時一下子消失，心情都有啲難受嘅感覺

沈心怡微微耷低頭，心裏悶悶不樂嘅感覺圍繞住佢成個人





「阿諭就係受歡迎呀⋯」沈心怡喺心裏道，有種自卑嘅感覺微微閃過，「就算佢唔去追，都會有人主動追佢⋯就算我同佢識咗好耐都好，佢對我做嘅嘢、講嘅嘢，大概係因為我地熟嘛⋯」

沈心怡微微抬頭望咗潘景諭一眼，佢覺得自己同潘景諭之間係真係有距離⋯

「我地⋯只係因為係小學同學，所以先比較熟⋯」沈心怡呢種想法一直從心底湧出，「其實我⋯就係個好普通嘅女仔嘛⋯阿諭會中意咩類型嘅女仔呢？會唔會係開朗啲可愛啲，又或者⋯自信啲嘅女仔⋯？」

「我都唔知，你問其他人啦⋯」潘景諭有啲唔耐煩，因為沈心怡就喺自己身旁，「嗯，你問其他人，我未做⋯嗯，拜。」

沈心怡喺潘景諭收線嘅同時停下腳步，面向住潘景諭企，露出嘅笑容都有種強顏歡笑嘅感覺

「Sorry，你啱啱想講咩？」潘景諭一臉唔好意思地問道

「冇咩呀～」沈心怡連忙微笑道，「只係想話⋯多謝你今日同我去試嗰間餐廳。」

「唔洗多謝，下次⋯」「有機會嘅話再一齊食飯！」

沈心怡打斷潘景諭嘅說話，然後熟練地微笑，熟練地拉開同潘景諭之間嘅距離




IG Link: https://www.instagram.com/nd_cotttoncandy/?hl=zh-tw