［愛情純愛］我地之間嘅友誼純度絕對等於零！！！: 84. 好奇

沈心怡回頭望向李逸彤，潘景諭好細聲地同沈心怡講咗兩句，沈心怡望向潘景諭笑咗一笑

「的確幾靚。」坐喺邱茗然對面嘅女仔細聲地講道，然後望向邱茗然，「佢地真係唔係couple？」

「唔係，我肯定佢地唔係囉⋯」邱茗然肯定地講道，「佢地識咗好耐㗎啦！」

「佢地可以係宜家仲未係couple㗎嘛～識咗咁耐都可以日久生情㗎。」坐喺邱茗然旁邊嘅女仔笑道

「一定唔會囉！係中意嘅都中意咗啦！」邱茗然緊張地講道





「你話唔會就唔會啦～」坐喺對面嘅女仔講道

邱茗然其實自己都心裏有數，潘景諭同佢哥哥係朋友，對自己好都只不過因為佢係好兄弟嘅妹妹

潘景諭嘅年紀比佢大，同佢嘅年級都唔同，中意邊個都好佢都管唔到，而且唔係潘景諭嘅邊個

「唉～」邱茗然喺心裏嘆一口氣，慨嘆一下自己嘅贏面有幾細

⋯





「今晚你得唔得閒？」潘景諭忽然間問沈心怡

「做咩咁問？」沈心怡有啲疑惑

「今晚去唔去食嗰間日本嘢？」潘景諭問道

「今晚？」沈心怡一臉愕然，以為潘景諭講緊笑，「咁突然？」

「嗯。」潘景諭卻認真地點頭，「上次你唔係話想食嗰間日本餐廳咩？」





「係呀。」沈心怡微微點頭，「今晚都得嘅⋯」

「嗯，咁就今晚啦～」潘景諭微微一笑

「不過放咗學之後距離食飯都有一段時間⋯你想到時喺餐廳等定⋯？」沈心怡又問道

「唔⋯」潘景諭一時三刻都唔知去邊好，諗咗一陣之後，潘景諭靈機一動，「你想唔想見白襪？可以上嚟stay一陣先再出去食飯⋯」

「我想見襪子呀，但係⋯會唔會唔方便⋯？」沈心怡遲疑地問道

「都⋯唔緊要嘅。」潘景諭微微點頭

⋯

放學之後，沈心怡跟住潘景諭番到屋企門口，喺潘景諭用鎖匙開門之際，沈心怡拉住潘景諭嘅衫袖





「真係唔緊要⋯？」沈心怡問道

「咔。」潘景諭嘅家門被拉開，潘景諭同沈心怡望向門口嘅方向

「媽？」潘景諭怔了一怔，望到一手捉住門柄，一手攬住白襪嘅潘媽媽，「你喺度嘅？」

「阿姨你好⋯」沈心怡頓時有少許尷尬，但都禮貌地打招呼

「心怡上咗嚟嘅？」潘媽媽一眼就認出沈心怡，應該話，潘景諭嘅朋友佢都認得

「我地今晚去食飯，我唔喺度食。」潘景諭跨過門檻行入屋， 然後回頭望向沈心怡

「哦，好啦。」潘媽媽將白襪放到梳化上





沈心怡將皮鞋除落嚟放喺門邊，潘景諭彎腰拎起自己對鞋同時，順手地拎起沈心怡對鞋放到鞋架上

潘媽媽望住潘景諭嘅舉動，心裏意外又愕然，仲以為係唔係自己眼花，佢個仔竟然會做啲咁嘅事

「你仲孭住個書包做咩？」潘景諭回頭見沈心怡仲孭住書包，唔自在地企喺佢身後，「除咗佢啦⋯」

潘景諭將自己嘅書包除落嚟朝自己嘅睡房行去嘅同時，伸手捉住沈心怡嘅書包把手，將書包提起，沈心怡將手縮起，潘景諭拎住沈心怡嘅書包行去睡房

「我想去一去洗手間⋯」沈心怡有啲尷尬咁講道

沈心怡前腳入廁所，潘景諭後腳就行出嚟

潘景諭望咗剛閂上門嘅廁所一眼，就行到去梳化前抱起白襪

「拍緊拖呀？」潘媽媽見潘景諭出嚟，廁所又閂咗門，連忙行到潘景諭面前，一臉好奇地問道





「唔係⋯」潘景諭搖搖頭，但就喺啱啱嘅一刻，潘景諭想要偷偷地講一個大話，呢個想法一閃而過，但潘景諭知道唔可以⋯

沈心怡從洗手間出嚟，左右望一望，潘景諭抱住白襪行到沈心怡嘅面前

「嗨襪子～」沈心怡伸手，溫柔地摸着白襪嘅頭，白襪蹭了蹭沈心怡嘅笑，沈心怡嘅心都暖起嚟

潘景諭嘅視線從懷中嘅白襪移到沈心怡身上，佢望住沈心怡眼中溢出嘅溫柔，心臟又唔爭氣地心動了

「你抱。」潘景諭小心翼翼地將白襪轉移到沈心怡嘅懷中，沈心怡小心翼翼地托住白襪嘅屁股

「嗨襪子～」沈心怡笑了笑，微微側着頭望住白襪

白襪好乖咁瞓喺沈心怡嘅懷中，忽然抬頭朝潘景諭望咗一眼後用頭蹭一蹭沈心怡





「喵～」白襪對潘景諭細細聲地喵咗一聲

「囂張啲咩？」潘景諭捉住白襪嘅手上下晃，「襪襪你囂張啲咩呀？」

白襪默默地將手抽回，不屑地望咗潘景諭一眼；沈心怡將白襪放到地上，白襪悠悠閒地行番去自己嘅貓窩坐低，潘景諭行到去梳化坐低，拍一拍身旁嘅位置示意沈心怡可以坐喺自己隔離

沈心怡坐低喺梳化上，雙腳拍埋、雙手㩒住坐墊邊緣，心裏有少許唔自在嘅感覺

潘景諭嘅手就放喺沈心怡嘅手嘅旁邊，兩人嘅尾指之間只有一隻手指嘅距離

「好想偷偷地拖佢⋯」潘景諭喺心裏掙扎地道，「但係佢會唔會避開我⋯？」




IG Link: https://www.instagram.com/nd_cotttoncandy/?hl=zh-tw