［愛情純愛］我地之間嘅友誼純度絕對等於零！！！: 55. 謝謝幫忙

「我⋯」「佢番嚟啦。」

正當沈心怡仲諗緊要講咩拒絕時，企左邊嘅女仔輕拉一下企中間嘅女仔嘅手肘

「咁唔該你啦～」企中間嘅女仔頓時行開，同身旁嘅兩個女仔一齊連忙行出課室

沈心怡一臉不情願地望一望抱喺懷中嘅紙袋，佢都唔知點解呢個紙袋最後都係到咗佢嘅手上，明明佢就唔想幫人做中間人⋯

「心怡～潘景諭未番嚟呀？」李逸彤行到沈心怡嘅面前，邱旻顥行喺李逸彤身後，「咦？咩嚟㗎？」





沈心怡將袋打開比李逸彤睇，李逸彤望到放喺入面嘅曲奇

「你整㗎？但得一袋嘅？你平時都整晒比我地三個㗎⋯」李逸彤一臉疑惑地望向沈心怡

「沈心怡你整咗嘢食呀？」潘景諭剛好執完廁所番嚟，就聽到李逸彤講嘅嘢，「整咗咩呀？」

「唔係我整㗎，係馨馨整㗎⋯」沈心怡望住袋中嘅曲奇講道

「馨馨做咩突然整曲奇比你⋯？」李逸彤就更加疑惑，「無事獻殷勤，一定有古怪⋯！」





「唔係整比我⋯」沈心怡將紙袋合上，然後遞比潘景諭，「比你㗎⋯」

「吓？比我做咩？」潘景諭一頭霧水地望住沈心怡遞過嚟嘅紙袋

「果然有古怪⋯今次借你過橋啦心怡～」李逸彤無奈地講道，擺出一副好似明白晒來龍去脈嘅表情

「嘖嘖嘖⋯潘景諭，又有女仔送嘢比你啦～」邱旻顥企喺潘景諭旁邊，用手肘撞潘景諭一下

「我先唔要⋯」潘景諭講道，然後一下子伸手搭住邱旻顥嘅膊頭，轉身就走，「食飯！」





臨走前，潘景諭將曲奇勾番喺馨馨嘅枱邊，沈心怡回頭望一眼紙袋，覺得馨馨陣間見到又會找自己麻煩⋯

食完飯番嚟之後，沈心怡坐喺自己位做功課，因為唔想帶咁多嘢番屋企，而且想番到屋企之後可以休息，所以揀喺lunchtime完結前做定啲

馨馨同另外兩個女仔番到嚟課室，一番埋位就見到嗰袋曲奇掛咗喺自己嘅座位

「呢度係點？」潘景諭手上拎住功課問沈心怡

「哦呢度係⋯」沈心怡望一望題目後解釋比潘景諭聽

馨馨拎起掛喺枱邊嘅曲奇，喺潘景諭同沈心怡討論完題目後，馨馨拎住紙袋行到去沈心怡嘅座位

「心怡，點解你掛番個曲奇喺我張枱度嘅？」馨馨有啲訝異地問道，「你唔係話幫我㗎咩⋯？」

「唔係⋯」「係我掛番喺你張枱度。」





正當沈心怡唔知要點樣對馨馨解釋之際，潘景諭開口回答馨馨嘅問題

馨馨聽到回答，一臉愕然地轉身望向潘景諭，卻只見潘景諭帶着一個微笑望住佢

「呃⋯」馨馨頓時覺得有啲尷尬

「我唔太會收女仔送嘅嘢，而且我唔中意食曲奇。」潘景諭微笑着講道

沈心怡望一望潘景諭，又抬頭望向馨馨；馨馨尷尬地轉身望向沈心怡，然後輕哼一聲就攬住袋曲奇轉身走，行去佢兩個朋友嘅身邊

「感覺我又要比佢地講壞話⋯」沈心怡喺心裏感覺又無奈又想喊，「呼⋯」

沈心怡微微鼓起兩泡腮輕呼一口氣，潘景諭望向沈心怡





「你下次唔好幫佢轉交比我啦。」潘景諭對沈心怡講道

「又唔係我想幫佢⋯」沈心怡抿一抿唇，拎起原子筆耷低頭繼續做功課

「拒絕佢囉，你既然都唔想幫佢。」潘景諭淡然地講道

「我都未拒絕佢就塞咗去我度⋯」沈心怡無奈地細聲道，然後望一望潘景諭，喺開口講嘢前佢先睇下馨馨喺唔喺度，「我啱啱先知原來你唔中意食曲奇餅。」

沈心怡記得佢上次整曲奇餅比佢地食嘅時候，潘景諭仲話好好食，叫佢下次再整，然後都冇三日就食晒，但啱啱潘景諭竟然話佢自己唔中意食曲奇餅

「上次佢係唔係偷偷地轉個身就掉咗⋯？定佢係勉為其難咁食晒⋯」沈心怡不禁喺心裏問道

「唔咁講點拒收？」潘景諭輕輕一笑後細聲地講道

「你太過份⋯」沈心怡無奈地講道，「馨馨佢整得好辛苦⋯」





「你覺得我收嘅話會比較好？」潘景諭反問沈心怡

「同我有咩關係⋯？」沈心怡反一下白眼後講道，「你想要嘅，我最多幫你問佢拎番，佢應該都好願意比你。」

「唔洗啦多謝晒。」潘景諭連忙講道，「唔洗幫我咁大個忙。」

沈心怡拎起筆做功課，潘景諭嘅目光又一次悄然地落喺沈心怡身上

「其實宜家咁樣都幾好⋯」潘景諭喺心裏對自己遊說道，想要催眠自己覺得安於現狀都唔差一樣，「唉⋯先唔好⋯」

潘景諭始終唔想佢同沈心怡嘅關係安於現狀，佢冇辦法成功說服自己⋯

佢望一眼沈心怡後又收回視線，喺佢嘅心裏始終都係想進一步⋯





「喂喂。」潘景諭伸手晃咗兩下，沈心怡感覺潘景諭叫緊自己便抬起頭望佢

「咩呀？」沈心怡問道

「你幾時再整嘢食呀？」潘景諭一臉期待地問沈心怡




IG Link: https://www.instagram.com/nd_cotttoncandy/?hl=zh-tw