［愛情純愛］我地之間嘅友誼純度絕對等於零！！！: 54. 一個小忙

沈心怡抬頭望向前方，同潘景諭對上視線，潘景諭用口型同沈心怡講咗一聲加油

沈心怡見到潘景諭對自己講嘅嘢，佢深呼吸令自己冷靜落嚟，然後望一望企喺電腦枱前嘅老師

「開始。」老師講嘅同時，㩒一下滑鼠開始計時

喺3分鐘到嘅時候，電腦嘅計時器發出響亮嘅聲音示意夠鐘；沈心怡亦剛好將所有嘅內容講完，同時亦鬆一口氣

沈心怡頓時將筆記合上然後行番埋位，佢行番埋位時同潘景諭對望，潘景諭對佢微微一笑，沈心怡輕拍自己嘅胸口兩下，表示自己放鬆晒





老師聽完沈心怡講嘅論點、立場仲有例證後，比咗評語同一個上等嘅成績

「就話唔洗擔心。」潘景諭望向沈心怡，細細聲咁同沈心怡講道

「嚇死⋯第一個就係我⋯」沈心怡細聲地講道

「自信啲啦！你明明就可以。」潘景諭鼓勵般對沈心怡講道

「嘻⋯」沈心怡冇講啲咩，只係嘻嘻一笑





潘景諭悄悄地望住沈心怡，佢都知道沈心怡本來就比較內向又冇自信，畢竟唔係第一日嘅事

「雖然佢成日都冇自信⋯」潘景諭喺心裏道，然後嘴角偷偷地微微上揚，「但佢都係好可愛⋯雖然佢再多番少少自信就好，明明好多嘢都好好呀⋯」

潘景諭將視線移開，免得比人發現佢一直望住沈心怡

「如果我係女仔，有沈心怡咁嘅學習能力，咁嘅外表同性格，我都會好自信⋯」潘景諭喺心裏講道，然後又不自覺地偷望沈心怡一眼

潘景諭發現自己又唔知幾時望住沈心怡，潘景諭頓時將視線再一次移開，佢微微耷低頭，好讓自己唔好再望過去





佢唔想其他人發現自己中意沈心怡，佢怕沈心怡知道咗嘅話會有壓力、會避開佢，咁嘅話一切就番唔到宜家呢個狀態

佢寧願默默地中意沈心怡，亦係因為佢唔知沈心怡點諗，佢睇唔透沈心怡諗緊啲咩⋯

「明明都咁熟，但我就唔知佢諗緊咩⋯如果我知佢點諗就好啦⋯」潘景諭喺心裏帶着一萬個無奈地講道，「唉～真係難觸摸⋯」

潘景諭就係偏偏睇唔清沈心怡嘅想法，搞到佢宜家唔知要點樣做先好，進一步又唔係，退一步又唔係，兩頭唔到岸一樣

「唉⋯」 潘景諭輕嘆一口氣後又偷望咗沈心怡一眼

果然眼睛最誠實，會自然地，什至喺連你自己都唔察覺嘅情況下，望向你心裏最在意嘅事上

「真係想搵人救下我⋯」潘景諭將目光收回，喺心裏自嘲後笑道

⋯





Lunch time

「我都話你完全唔洗擔心⋯你自己比嘢自己擔心。」潘景諭坐喺位執嘢時對沈心怡講道

「咁緊張都好正常啫⋯」沈心怡企喺度，右腳跪喺櫈上，手上拎住用完嘅書

「我去個廁所先，你地等埋我。」潘景諭緩緩企起身

「哦。」沈心怡望一眼潘景諭，然後又繼續執嘢

潘景諭一行出課室，即刻有三個女仔行到沈心怡旁邊拉住沈心怡，沈心怡愣了一下

「心怡呀～你同潘景諭好熟㗎可？」企喺左邊嘅女仔





「哦⋯都算熟嘅⋯」沈心怡遲疑地回答道

「可唔可以幫一個忙？」企右邊嘅女仔捉住沈心怡嘅手肘

「咩忙⋯？」沈心怡疑惑地問道

「可唔可以幫我將呢個比佢⋯？」企中間嘅女仔將一個細紙袋遞到沈心怡嘅面前，一臉誠懇地講道，「唔該你呀⋯」

「你唔自己比佢⋯？」沈心怡有啲不情願，想要拒絕

「你同潘景諭咁熟，你比佢嘅話佢一定會收！」企左邊嘅女仔幫口遊說沈心怡講道

「但⋯！」「心怡呀，你就幫下我啦～唔該你啦～我整得好辛苦㗎！」

沈心怡想拒絕，但企中嘅女仔將紙袋強塞到沈心怡嘅手中，沈心怡朝袋中瞄咗一眼，見到入面放咗一袋烤到金黃色嘅曲奇，袋上仲用粉紅色絲帶綁嘅蝴蝶結





「你親手比佢好似好啲⋯」沈心怡一臉為難地講道，「你整得咁辛苦⋯」

「心怡你同潘景諭熟咁熟，你幫佢一個忙都唔得咩？」企右邊嘅女仔都開始幫口

「你比佢嘅話，佢一定收！」企左邊嘅女仔又講道，「佢平時都唔會點收女仔送嘅嘢，你同佢熟，你比佢嘅話佢一定會收㗎！」

「心怡唔該你呀～」女仔一臉楚楚可憐地講道，「幫我一次啦～」

沈心怡又唔知點樣拒絕先好，佢又唔想佢地覺得自己連一個小小嘅忙都唔願幫，但同時佢又唔想咁做

「唔該你啦～心怡呀～」女仔將紙袋輕輕推到沈心怡嘅懷中，「你幫我一次啦～」








IG Link: https://www.instagram.com/nd_cotttoncandy/?hl=zh-tw