［愛情純愛］我地之間嘅友誼純度絕對等於零！！！: 56. 為他而設

「做咩咁問？」沈心怡疑惑地微微側着頭問道

「感覺好似你好耐都冇整嘢食咁啫。」潘景諭講道

「唔⋯可能嚟緊呢個星期會整囉⋯」沈心怡諗咗一諗後回答道，「你想食？」

「係唔係我想食咩你都整到？」潘景諭興致勃勃地追問道

「唔一定㗎～因為有啲我都唔識整～」沈心怡笑了笑講道，「咁你要食咩呀？睇下整唔整到囉～」





「我想食曲奇餅。」潘景諭講道，明明啱啱先拒絕咗馨馨嘅曲奇，轉頭又同沈心怡講想食曲奇

「啱啱馨馨咪比曲奇你囉，你又唔要⋯」沈心怡不屑地反一下白眼，「陣間比馨馨知道，佢又要找我麻煩啦⋯！」

「講笑講笑，食其他囉～」潘景諭笑道，然後思考咗一下，「你識唔識整馬卡龍？」

「你想食馬卡龍⋯？」沈心怡輕輕抿唇，望住潘景諭問道，「都可以嘅。」

「好呀！」潘景諭笑着回答道，佢嘅笑容喺沈心怡嘅回答後完全收唔埋





喺心入面覺得自己喺沈心怡嘅心中同其他人係唔一樣，佢係特別嘅一人，一諗到呢度，笑意更加係一發不可收拾

潘景諭覺得自己好似開心得太明顯，佢將視線移開然後微微耷低頭，佢下意識地伸手摸一下後頸，抿着唇忍住笑意

⋯

星期日

沈心怡雙手拎住裝滿麵糊嘅唧袋，喺牛油紙上唧出一個又一個嘅白色嘅小圓餅





「嘻⋯搞掂⋯」沈心怡放低唧袋，望住喺烤盤上一個又一個嘅小圓餅滿意地露出笑容

喺過咗半個鐘後，沈心怡嘅指尖輕碰咗馬卡龍嘅表皮一下，確定佢地晾乾之後，沈心怡將整個烤盤放入焗爐；喺焗緊小圓餅嘅同時，沈心怡就去處理餡料

沈心怡見時間差唔多，便行到焗爐前微微彎腰，望住焗爐內焗緊嘅小圓餅，見到小圓餅已經有代表住成功嘅裙邊，沈心怡滿意地笑起嚟

當小圓餅焗好後再過一陣，沈心怡小心翼翼地拎起小圓餅用唧袋唧上夾心餡料，然後拎起另一塊蓋上去

「好香呀⋯！」沈心怡聞到手上嘅馬卡龍傳嚟香香嘅雲尼拿味

去到夜晚嘅時候，沈心怡先將馬卡龍分裝好，自己留起一部分喺屋企比爸爸媽媽食，其他就分比潘景諭佢地三人

到咗星期一時，沈心怡特登將三份馬卡龍用另一個袋入住，免得放喺書包入面壓碎，一番到學校，就見到潘景諭已經坐咗喺課室，今日嘅四人組最後一個番嚟嘅，竟然係沈心怡自己

「早晨。」潘景諭眼睛嘅餘光早就留意到沈心怡番到嚟，喺沈心怡行到佢身旁行番自己嘅座位時，潘景諭先主動地打招呼





「早晨～你今日咁早嘅？」沈心怡將書包除落嚟掛喺枱邊，視線隨即落喺潘景諭嘅枱上，「原來係番嚟做功課～」

「睇嚟有人整咗嘢食。」潘景諭嘅目光落喺沈心怡放喺枱上嘅紙袋，「唔知會唔會係馬卡龍？」

「嗱，你㗎。」沈心怡無奈地喺袋中拎咗一包出嚟，喺袋上面仲貼咗潘景諭個名

「你真係整咗馬卡龍呀？」潘景諭頓時意外又高興

「嗯，唔係你話想食㗎咩⋯」沈心怡問道

「係呀。」潘景諭接過沈心怡遞比自己嘅一包馬卡龍，一包就有八、九個馬卡龍，望住貼喺袋上嘅memo紙，上面係以秀麗工整嘅字體寫住「阿諭」二字，都未試味就覺得甜入心，「多謝。」

「嗯！」沈心怡點點頭，「要食晒呀，你叫我整㗎！」





「收到！」潘景諭肯定地回答道，「一定食晒！」

沈心怡微微一笑後，拎住紙袋行到去李逸彤嘅座位，將另外兩包馬卡龍比李逸彤同邱旻顥

「嘩～心怡你整咗馬卡龍呀～」李逸彤一臉訝異地接過沈心怡手中嘅馬卡龍

「多謝。」邱旻顥禮貌地肯一聲多謝，望一望馬卡龍後抬頭望向沈心怡，「點解我嘅馬卡龍少過李逸彤嘅？」

「因為分得唔勻⋯」沈心怡一臉唔好意思咁講道

「潘景諭你嗰份有幾多個呀？」李逸彤望向行緊過嚟嘅潘景諭問道

「幾多個？好似有八、九個。」潘景諭拉開邱旻顥旁邊嘅座位嘅櫈坐低，沈心怡靠住喺枱邊企

「點解你會有九個？我得七個咋喎，邱旻顥得⋯六個咋喎⋯！」李逸彤不解地望向沈心怡，「點解呢？」





「因為係阿諭話要食，所以比多兩個佢。」沈心怡坦白地回答，佢轉頭望一望潘景諭

「哦⋯原來係你⋯」李逸彤無奈地講道

邱旻顥望向潘景諭，兩人對上視線，都知道對方想講咩，邱旻顥笑咗一笑

「差唔多夠鐘，要落去早會啦。」沈心怡行番埋位放低紙袋，然後行番去李逸彤嘅旁邊

「係呀⋯要早會呀⋯」李逸彤一臉不情願地企起身




IG Link: https://www.instagram.com/nd_cotttoncandy/?hl=zh-tw