［愛情純愛］我地之間嘅友誼純度絕對等於零！！！: 53. 欲哭無淚

「喂去邊呀！」李逸彤見邱旻顥加快腳步，頓時拉住邱旻顥嘅書包，「我咩都冇講⋯你有幻聽呀？」

邱旻顥聽到後嘴角就忍唔住上揚，然後緩緩地行後咗兩步，行番去李逸彤嘅身旁，微微側着頭、一臉滿意地微笑着望住李逸彤

「笑咩呀⋯」李逸彤一臉無奈地反一下白眼問道

「冇呀～」邱旻顥搖搖頭

見到邱旻顥之後，李逸彤都冇再唔開心，又覺得今日嘅佢果然都好幸運，又係可以同邱旻顥一齊番學嘅一日





李逸彤偷偷地望咗邱旻顥一眼，其實兩人唔係熟咗好耐，都只係有幾個月嘅時間，但感覺時間過得好快

第一次喺番學嘅路上見到面嘅時候，佢地都係將尷尬嘅感覺由肢體動作、一言一行上散發出嚟；第一次兩個人單獨出街時，做每一件事嘅小心翼翼

「原來都已經2月尾⋯」李逸彤喺心裏柔聲道，「明明我地都只係熟咗三個月左右⋯」

三個月，唔係一段長時間，亦唔算短時間，卻足以令李逸彤同邱旻顥嘅關係由同班同學昇華至互有好感嘅曖昧關係

「好神奇咁就有好感⋯」李逸彤喺心裏都不禁對自己有啲訝異，「都唔知係喺邊一刻令我中意佢⋯」





李逸彤自己都諗唔明白，或者係邱旻顥嘅爽朗性格；或者係邱旻顥不經意嘅溫柔體貼；或者係邱旻顥嘅笑容；又或者⋯係喺李逸彤真正咁同邱旻顥對上視線，目光真正地落喺佢身上嘅時候，內心就比邱旻顥散發出嘅感覺吸引到

「是旦啦～」李逸彤微微耷低頭甜甜一笑，喺心裏甜甜地道，「只要我自己清楚知道我係中意佢就可以啦～」

人總唔會冇理由咁去中意一個人，中意一個人其實係最需要理由嘅一件事，有時唔知道點解其實唔係真係唔知，答案一直都喺心入面，只係你冇刻意去尋找嘅意思

唔知由邊一日開始，李逸彤會故意遲少少出門口，邱旻顥亦會早少少出門口番學，為咗只係可以喺番學嘅路上撞到對方

或者都算係佢地之間嘅一種默契





⋯

「點算呀⋯陣間中文堂呀⋯」沈心怡一臉擔心地捉住李逸彤嘅手講道

「你唔洗咁擔心啦～你Okay㗎！」李逸彤嘅另一隻托着下巴，無奈地安慰道

「陣間中文堂做咩呀？」邱旻顥一頭霧水地問道

「陣間說話訓練呀⋯！個人短講，每個人都要出去講一次自己抽到嘅說話題目嘛！」沈心怡輕皺起眉頭，緊張地講道，「仲係隨機抽人，抽中我點算⋯」

「你中文成績都唔差呀，都唔洗擔心講得唔好。」邱旻顥講道

喺佢嘅認知中，沈心怡每一科嘅成績都好平均，平均咁喺上游⋯所以佢唔知道沈心怡到底擔心緊啲咩

「心怡唔係擔心講得唔好啦⋯」李逸彤回頭望向邱旻顥解釋道，「心怡最怕喺一堆人面前講嘢⋯」





「你擔心緊嘅係呢個呀⋯」潘景諭無奈地笑一笑，「你又唔係唔識我地⋯」

「比啲信心啦！有啲自信啦！」李逸彤用力地喺沈心怡嘅手背上拍咗一下，「講3分鐘咋！我都未擔心，你擔心啲咩呀？」

沈心怡本來就偏向內向嗰邊，要佢企喺人前好似演講一樣，佢真係要鼓起好大嘅勇氣先可以做到

望住一臉不情願嘅沈心怡，李逸彤都有啲無奈，明明沈心怡又唔係講唔好，但偏偏就冇自信累事⋯

「信心信心！」邱旻顥鼓勵道，「比啲信心！你做到㗎！」

「希望唔好咁快抽到我⋯！」沈心怡雙手合十祈求道

到咗中文堂時，老師一入到嚟，沈心怡就開始緊張，雙手不禁緊扣着放喺大腿上，心臟都開始噗噗跳起嚟





「叫大家準備嘅題目，大家準備晒啦嘛？」老師行到電腦枱前，開咗個計時器出嚟，「抽人開始啦。」

沈心怡聽到老師咁講，心跳就變得更快，感覺都要心臟病發一樣；老師拎出一個公文袋，入面放咗一張又一張寫晒學號同名號紙，比佢用嚟抽籤用

「第一個。」老師伸手入公文袋中，隨機地拎咗一張紙

「唔好係我做第一個⋯！求你啦！唔好係我⋯！」沈心怡喺心裏大聲喊道

「沈心怡。」老師望一眼抽出嚟嘅紙講道，「出嚟啦。」

李逸彤望向沈心怡嘅方向，邱旻顥同潘景諭都望一望沈心怡，除咗喺心入面同佢講加油，真係有嘢幫到佢

沈心怡聽到老師叫自己名嘅一刻真係欲哭無淚，唯有默默地拎起筆記，望一眼自己準備好嘅嘢，然後行出去企喺黑板前

「呀⋯大家都望住⋯好想番埋位⋯」沈心怡微微耷低頭迴避其他人嘅目光，「點解會抽到我係第一個㗎⋯」








IG Link: https://www.instagram.com/nd_cotttoncandy/?hl=zh-tw