［愛情純愛］我地之間嘅友誼純度絕對等於零！！！: 52. 兄妹

「我食完啦。」邱旻顥講道，然後拎紙巾抹嘴

「我未食完⋯」李逸彤微微鼓起兩泡腮，扁一扁嘴講道

「你慢慢食，唔洗急。」邱旻顥邊講邊舉起手，將喺一旁著住圍裙嘅阿姨叫過嚟，「要碗紅豆沙外賣⋯」

李逸彤抬眼望住邱旻顥，見到邱旻顥一個無言嘅表情時忍唔住發笑，明明上一秒仲話唔要幫人買，轉個頭就叫咗個糖水外賣

行喺回家路上嘅兩人感受着迎面吹嚟嘅微風，默默地享受着「最後」嘅約會時間





邱旻顥先一步番到屋企，入屋後邱旻顥將手上拎住嘅膠袋放到餐枱上，聽到聲嘅邱若然頓時從梳化彈起身，一蹦一跳地行到餐枱前

「你買咗紅豆沙呀？」邱茗然嘅雙手捧着外賣碗，望住正除緊鞋嘅邱旻顥，「多謝哥哥！」

「哥哥買咗糖水比你呀？」邱媽媽喺廚房行出嚟一望，溫柔一笑同時講道

邱媽媽望一望邱茗然又望一望邱旻顥，心裏覺得兩兄妹嘅感情真係好好，雖然邱旻顥從來都唔會講出口，但行動證明一切

「你呀，縱壞個妹啦⋯」邱媽媽細聲地對邱旻顥抱怨一樣講道，「陣間縱到佢有公主病⋯」





「食個糖水啫，唔會有公主病⋯」邱旻顥無奈地笑道

邱旻顥望住邱茗然拉開櫈坐低喺枱前食糖水，咩都冇講就行番入房攞衫沖涼

一沖完涼出嚟，邱旻顥就行入房拎手機

邱旻顥一隻手拎住搭喺頸上嘅毛巾嘅一邊抹乾頭髮金，一隻手拎起放喺書枱上嘅手機，然後就行咗出廳坐低喺梳化上

「番到屋企啦～」李逸彤send咗一個message比邱旻顥





啱啱坐低喺梳化上嘅邱旻顥望住手機螢幕笑咗一笑，停低抹頭髮嘅動作放低毛巾，雙手拎住手機

「啱啱沖完涼」邱旻顥回覆道

李逸彤盤着腿坐喺書枱前，見到邱旻顥嘅回覆時頓時挺直腰板坐好起嚟

「今日星期六，聽日星期日⋯要等到星期一先會見到面⋯」李逸彤托住腮，望住電腦顯示着嘅日子，「呀⋯好遙遠⋯」

李逸彤起身行到床邊一下子坐低，然後諗都冇諗就向後灘低喺床上

明明成日都覺得番學好攰，所以最期待假期嘅來臨，但自從中意咗邱旻顥之後，假期唔再係佢最期待嘅日子

相反地，李逸彤更期待翌日嘅上學日，朝早就可以碰碰運氣，睇下見唔見到邱旻顥

李逸彤一個翻身變成側身瞓喺床上，佢雙手拎住手機，呆望住螢幕等待邱旻顥嘅回覆





「唉～好想星期一快啲嚟呀～」李逸彤輕嘆一口氣後喃喃自語道，心裏總會期待着星期一快啲到，「放假日子千個好，唯獨見唔到邱旻顥最唔好⋯」

⋯

「嘟嘟嘟嘟！嘟嘟嘟嘟！嘟嘟嘟嘟！嘟嘟嘟⋯」

鬧鐘響起，李逸彤迷迷糊糊地睜開眼，緩緩坐起身，轉身閂咗鬧鐘

「 呵～欠⋯」李逸彤坐喺床上打咗個喊露後先捨得離開溫暖嘅床

李逸彤行到廁所梳洗一下，然後番房換上校服、著上冷衫，拎起放喺枱上嘅髮圈梳好馬尾，拎起書包孭到背上，行到門前著好皮鞋

「我番學啦～」李逸彤嘅聲線裏夾雜着半點嘅愉悅，然後就行出屋企門口起行去番學





李逸彤望一望手機螢幕上顯示嘅時間，抬頭望一眼電梯到未

「唔知今日會唔會都撞到邱旻顥⋯」李逸彤喺心裏默默地道，「拜托今日都要撞到佢⋯！」

當升降機到25樓時，門喺「咚、咚！」兩聲後打開，李逸彤嘅目光頓時落喺門外

「呀⋯唔係呀⋯」李逸彤心裏有啲失望，因為入嚟嘅人唔係邱旻顥

李逸彤微微耷低頭，失望嘅感覺從雙眼滲出嚟，佢冇諗到第一個失望咁快到⋯

每一日番學嘅朝早都係好似轉轉盤睇運氣一樣，總會抱住希望，但亦可能會期望落空

「唉⋯朝早見唔到佢⋯」李逸彤不禁輕嘆一口氣喺心裏講道

邱旻顥從另一架剛到地面嘅電梯中行出嚟，今日喺電梯到25樓嘅時候，打開門卻見唔到李逸彤





搞到邱旻顥嘅心裏都悶悶的，雖然話番到學校都可以見到面，但始終唔及一大清早見到然後一齊番學好

邱旻顥推門行出去大堂，目光自然而然地放眼望向前方，喺前方嘅一個女仔嘅身影頓時將佢嘅目光吸引住

「原來早我一部⋯」邱旻顥嘅嘴角微微上揚起嚟，然後加快咗步伐行上前

邱旻顥行到去李逸彤嘅斜後方後便將步速放慢，好似冇刻意追上前一樣行到李逸彤嘅右邊

「早晨。」邱旻顥提起左手搭到李逸彤嘅右肩上

李逸彤望向右邊，見到邱旻顥就喺佢旁邊，本來失望嘅感覺一下子喺空氣中散去

「早晨⋯」李逸彤望住邱旻顥，呆一呆地開口道





「做咩咁嘅表情？唔想見到我呀？」邱旻顥稍微俯身望住李逸彤問道，然後收回搭喺佢膊頭上嘅手，「咁我行先囉～」




IG Link: https://www.instagram.com/nd_cotttoncandy/?hl=zh-tw