［愛情純愛］我地之間嘅友誼純度絕對等於零！！！: 51. 任務費

「我扮完你男朋友先得$2？」邱旻顥無奈地望住手中嘅$2，「你男朋友呢個位都幾唔值錢⋯」

「咩呀！你係我男朋友嘅話，$2都冇得你收呀！」李逸彤理直氣壯地講道，然後將錢收番入銀包中，「比$2你益咗你啦！」

「好啦～咁我就收咗呢個任務費啦～」邱旻顥將$2袋入褲袋中

李逸彤定睛地望住邱旻顥，然後笑咗一笑

「笑咩？」邱旻顥見到李逸彤笑，佢自己都笑咗一笑問道





「冇笑咩～」李逸彤一臉輕鬆地講道，佢冇打算話比邱旻顥知自己諗緊啲咩

行咗兩步，李逸彤比地面上突咗出嚟嘅磚頭絆到，成個人向前絆咗一下；喺佢向前嘅時候，邱旻顥以為佢要跌，眼明手快就捉住李逸彤嘅手臂

「你行路帶眼好唔好⋯？」邱旻顥無奈地輕皺起眉頭講道，「好彩我捉住你啫⋯」

「我有帶眼呀⋯！」李逸彤微微鼓起兩泡腮，然後一個轉身面向住邱旻顥企，佢微微踮起腳尖，手指指住自己嘅左眼，「睇下！我有帶眼！」

邱旻顥喺李逸彤踮起腳尖嘅一刻，不禁屏住呼吸，心臟一縮，然後渾身嘅神經線都突突跳動起嚟，佢差啲以為李逸彤湊近要做啲咩





「睇、睇到啦⋯！」邱旻顥吞一啖口水後講道，紅霞由耳根滲到臉頰

李逸彤企番好喺邱旻顥面前，直盯着邱旻顥，望咗兩秒後，李逸彤便轉身帶着小跳步行咗三步，然後回頭望一望邱旻顥

「真係攞命⋯」邱旻顥喺耷低頭邁步行嘅同時喺心裏講道，目光都唔敢落喺李逸彤身上，「都唔知佢係唔係特登⋯」

「佢面紅啦～」李逸彤喺心裏都要笑到合唔埋口，覺得自己啱啱嘅舉動好成功

李逸彤就只係想睇邱旻顥面紅，所以邱旻顥都冇估錯，李逸彤就係特登，就係故意湊近





邱旻顥偷偷地望咗李逸彤一眼，目光停留喺李逸彤淡淡嘅笑容上

「今晚番去你又打機呀？」李逸彤隨便地問咗一句

「應該係啦⋯」邱旻顥都唔肯定自己番到屋企之後會唔會打機

「做晒功課啦？」李逸彤又問道

「做晒，應該。」邱旻顥笑一笑講道，「應該做晒。」

「地理都做咗啦？」李逸彤又追問道

「做咗啦～擺咗喺locker冇拎番嚟。」邱旻顥一臉輕鬆地講道，畢竟佢今次一早就做晒功課

「你仲有冇邊度想去呀？」李逸彤轉移話題問道





「唔⋯你有冇想行下邊度？定你想番去啦？」邱旻顥卻反問李逸彤

「我地番到去之後買甜品食呀～」李逸彤臉上掛着活潑嘅笑容，為食貓本性出晒嚟

「好～」邱旻顥望住李逸彤笑道，「咁你想食咩甜品呀？」

「我地去食糖水呀～」李逸彤講道，其實啱啱喺餐廳食飯嘅時候，佢已經決定咗今晚要食糖水做甜品

「好呀～」邱旻顥附和道，然後望咗李逸彤一眼後又笑道，「你中意食咩就食咩啦～為食貓！」

李逸彤聽到邱旻顥叫佢為食貓時怔了一下，臉頰泛起淡淡嘅紅霞，但好快又回過神笑起嚟

「呀～真係唔想約會咁快完呀～」李逸彤喺心裏有啲納悶地喊道





⋯

「你最後呀～都係買咗糖水比茗然做甜品～」李逸彤望一望邱旻顥手上拎住嘅外賣碗笑了笑講道

喺10分鐘前⋯

邱旻顥同李逸彤仲食緊糖水，不過都就嚟食完，此時邱旻顥感覺到放喺褲嘅手機喺度震，佢拎出嚟睇，就見到喺螢幕上寫住「邱茗然」三個字

李逸彤抬眼望一望邱旻顥，望住邱旻顥一臉無奈地接咗電話

「喂？哥哥你喺邊？」邱茗然清脆活潑嘅聲音傳到邱旻顥嘅耳中

「做咩⋯」邱旻顥淡然地問道，然後食咗一啖豆腐花

「我想食紅豆沙～你順路買番嚟比我食呀～」邱茗然用着撒嬌一樣嘅語氣對邱旻顥講道，「你番到邊呀？」





邱旻顥安靜咗落嚟，佢猶疑緊要唔要話比邱茗然知佢嘅實際位置，如果佢話佢喺糖水鋪，咁佢就一定要幫邱茗然買

「喂？哥哥？哥哥？」邱茗然見邱旻顥冇出聲，便叫咗佢兩聲，「哥哥你喺邊呀？」

「糖水鋪⋯」邱旻顥無奈地講道

「嘩～我地果然係兄妹呀～」邱茗然頓時興奮地講道，講嘢都帶着小尾音

「我要食紅豆沙～」「我唔要。」

邱旻顥直接無情地打斷邱茗然嘅說話，喺一旁李逸彤一臉訝異，想勸佢就幫妹妹一下，做一下妹妹嘅food panda

「哥哥！」「我唔要幫你買，係咁。」





邱旻顥直接收線，然後若無其事地將手機收番入褲袋中，李逸彤輕輕抿一下唇，抬眼望住邱旻顥




IG Link: https://www.instagram.com/nd_cotttoncandy/?hl=zh-tw