［愛情純愛］我地之間嘅友誼純度絕對等於零！！！: 27. 親近

「呵～欠⋯」邱旻顥企喺月台時打咗個喊露，琴晚太夜瞓，搞到今日起身嘅時候，差啲就要同張床成為連體嬰

李逸彤從上層落到嚟月台，一落扶手電梯，就見到邱旻顥企喺度發呆

「仲以為今日見唔到佢添⋯」李逸彤喺見到邱旻顥時，本來有啲失望嘅心頓時轉化成幸運嘅感覺

李逸彤邁步行到去邱旻顥嘅身旁，伸手拍咗邱旻顥嘅膊頭一下

「Suprise～」李逸彤笑笑口道





「你當我蠢㗎⋯？」邱旻顥無奈一笑，指一指玻璃幕門，「我一定睇唔到你啦⋯」

李逸睇望向月台嘅玻璃幕門，無奈地吐吐舌頭，咁大個玻璃反射，邱旻顥睇唔到佢先奇

「咁我啱啱見到你喺度發呆嘛～」李逸彤企喺邱旻顥嘅身旁，面向住邱旻顥企

「有啲眼瞓⋯」邱旻顥緩緩地開口講道同時，伸手輕輕揉眼

「肯定係琴晚又掛住打機啦～又打到3點幾先瞓啦一定⋯」李逸彤沒好氣地白佢一眼





「冇囉，打到2點就冇啦⋯」邱旻顥又打咗個呵欠

地鐵駛到入月台，車門連同玻璃幕門一同打開，李逸彤行喺前面先一步行入車廂，企喺門邊嘅位置背靠着玻璃

「呵～欠⋯」邱旻顥伸手掩住口又打咗個喊露，佢同李逸彤面對面企，手捉住喺門邊嘅扶手

「佢好似真係好攰⋯」李逸彤望住邱旻顥企喺度合埋眼小睡片刻時喺心裏講道，「企喺度都瞓得著⋯」

邱旻顥微微微耷低頭，前面嘅瀏海自然地垂下，李逸彤悄悄地伸手幫佢將瀏海嘅碎髮撥開





邱旻顥感覺到眼前忽然間有一個陰影將光擋住，光一閃一閃的⋯感覺到有嘢整緊佢嘅頭髮⋯

「李逸彤喺度做咩⋯」邱旻顥喺心裏細聲地講道，但佢冇睜開眼，任由李逸彤整着佢嘅頭髮，「算啦⋯由佢⋯」

列車駛入月台，李逸彤企好起嚟，然後伸手拍一拍邱旻顥

「醒啦～」李逸彤不自覺地柔聲起嚟，「到站啦。」

「嗯⋯」邱旻顥迷迷糊糊地睜開眼、微微點一下頭，然後喺車門打開後邁步踏出車廂

邱旻顥喺行到去扶手電梯前時回頭望一眼，望到李逸彤跟喺自己嘅身後，心裏莫名其妙地覺得踏實

「嗯？做咩？」李逸彤同邱旻顥嘅視線對上，微微側一側頭問道

「冇咩⋯」邱旻顥收回視線，用手梳一梳頭髮同時講道





邱旻顥喺出閘後自然地稍微回頭一望，等埋李逸彤先再行，李逸彤推開旋轉桿後快步走咗兩小步，行到邱旻顥嘅身旁

「呵～欠⋯」邱旻顥又打多咗個喊露，李逸彤不禁一笑，「笑咩⋯」

「笑你。」李逸彤直接講道，「你去7仔買罐咖啡先啦～」

「嗯⋯陣間番去嗰陣先買⋯」邱旻顥微微點頭，然後又打咗個喊露

「噗⋯！」李逸彤又不禁笑起嚟，「見到你打喊露覺得好搞笑⋯！」

「你唔打喊露嘅⋯」邱旻顥無奈地反一下白眼

喺學校嘅附近，經過一間7仔，邱旻顥行咗入去，李逸彤跟喺佢嘅身後





邱旻顥打開雪櫃拎咗罐咖啡然後行去比錢，邱旻顥一轉身就見到李逸彤企咗喺佢身後

「嗯？」李逸彤望一望邱旻顥，「我喺門口等你。」

李逸彤講完就行咗出去7仔嘅門口靠邊站，邱旻顥望住李逸彤行出去，佢知道就算佢唔講到明叫李逸彤等佢，李逸彤都會等埋佢先行

邱旻顥覺得，呢個唔算係佢同李逸彤之間嘅默契，但又唔識形容呢種「類似默契」嘅事

「唔該。」邱旻顥接過店員找比佢嘅散銀，然後行出7仔，一踏出門口就見到李逸彤企喺旁邊

兩人對望咗一眼，然後同時邁步行，李逸彤行喺邱旻顥嘅身旁，抬眼望咗邱旻顥一眼後又若無其事地將視線移開

邱旻顥望一望李逸彤，然後提起拎住咖啡罐嘅手，將凍冰冰嘅罐一下子貼落李逸彤嘅臉頰上

「嘶！」李逸彤瞬間向左邊行咗兩步，手掩住臉頰，「好凍呀！」





「凍咩？唔覺～」邱旻顥望住李逸彤嘅反應笑起嚟道

「邱旻顥！」李逸彤微微鼓起兩泡腮，看似氣沖沖一樣叫邱旻顥一聲

「咩呀？」邱旻顥笑嘻嘻地望住李逸彤問道

邱旻顥中意李逸彤叫佢全名，因為感覺上只有關係好緊密、好熟悉嘅人，先會一開口就連名帶姓咁叫對方⋯當然，熟人都會有叫暱稱嘅時候，但感覺唔一樣⋯

李逸彤望住笑嘻嘻嘅邱旻顥，緩緩地將視線移開微微耷低頭，提手掩住臉頰

「熱⋯」李逸彤喺心裏細聲地講道

李逸彤嘅臉頰因為邱旻顥嘅一個笑容而泛起淡淡紅霞，明明咖啡罐嘅餘溫未散，但李逸彤嘅手放到臉頰上時卻覺得臉頰正滾燙着⋯





邱旻顥偷瞄李逸彤一眼，拎住咖啡罐嘅手不禁用力一握，佢感覺自己嘅指尖都發熱




IG Link: https://www.instagram.com/nd_cotttoncandy/?hl=zh-tw