［愛情純愛］我地之間嘅友誼純度絕對等於零！！！: 26. 手借你一下

邱旻顥怔了一怔，嘴角小幅度地上揚起嚟，然後朝李逸彤伸手

「借你一下。」邱旻顥講嘅時候，內心都緊張死，心跳嘅變化太明顯，但邱旻顥卻一臉淡定地講道，就好似普通開玩笑一樣

李逸彤呆咗一下後，雙手捉住邱旻顥嘅手，暖意頓時從雙手嘅手心傳嚟，臉頰都變得熱熱的

邱旻顥將視線移開，唔將視線落喺李逸彤嘅身上，感覺心跳嘅感覺太強烈

佢唔想比李逸彤發現佢嘅臉紅，所以努力地裝作鎮定，努力地表現出平淡





「好暖⋯」李逸彤喺心裏講道同時，偷偷地瞄咗邱旻顥一眼

邱旻顥嘅手一直處於放鬆嘅狀態，但李逸彤捉住佢隻手，邱旻顥嘅心好想拖落去，但佢唔敢亂嚟，佢嘅手指自然地垂着，唔敢曲起

「噗噗、噗噗、噗噗⋯！」只係比李逸彤捉住手，邱旻顥嘅心就已經完全冇辦法穩定落嚟

邱旻顥比李逸彤行番前少少，李逸彤拉住邱旻顥嘅手，感覺上就好似係邱旻顥拉住佢行一樣

邱旻顥回頭望向李逸彤，李逸彤對佢嘻嘻一笑，邱旻顥嘅嘴角都不禁微微上揚





邱旻顥任由李逸彤拉住自己，佢當然唔介意李逸彤拉住自己，但佢宜家想拖又唔拖得，就係咁先會心癢難耐

「所以你決定好食咩未？」邱旻顥回頭望咗李逸彤一眼同時問道

「食拉麵好唔好？」李逸彤鬆開邱旻顥嘅手，行到邱旻顥嘅身旁提議道

「好呀。」邱旻顥一口答應

邱旻顥默默地將手插番喺外套嘅口袋中，雖然喺衫袋中唔會有寒風吹過，一定比手外露溫暖，但比起李逸彤嘅溫度，衫袋嘅暖都冇辦法暖入心裏





「唔得呀唔得呀⋯！都係好凍⋯！」李逸彤微微跳咗兩下，然後伸手搭到邱旻顥嘅手臂上，假裝自然地挽住邱旻顥嘅手臂

邱旻顥微微低頭，見到李逸彤正挽住自己嘅手；邱旻顥伸手拉一下李逸彤嘅衫袖，將衫袖拉到可以遮住李逸彤嘅手

李逸彤見到邱旻顥嘅舉動後，嘴角微微上揚

「佢知道我隻手會凍⋯」李逸彤喺心裏甜絲絲地笑道

李逸彤下意識都瞄一眼自己挽住邱旻顥嘅手，佢輕輕地捉住邱旻顥嘅外套

明明唔係男女朋友，但就算挽着手臂都好，都唔會令氣氛尷尬，都唔知係好事定壞事⋯

李逸彤企喺離邱旻顥最近嘅位置，佢知道佢地因為好熟，所以可以咁樣挽住手臂，但困難在於點樣再行多一步

「佢會唔會都同其他女仔咁樣挽住手⋯？」李逸彤望住邱旻顥，喺心裏有一絲擔心飄過





「李逸彤，你咁樣望住我，我好大壓力⋯」邱旻顥感覺到來自李逸彤嘅目光，佢無奈地笑道

「我突然喺度諗，你係唔係同個個女仔都可以咁樣挽手⋯」李逸彤一臉認真地對邱旻顥講出自己啱啱諗緊嘅嘢

「吓⋯？」邱旻顥比李逸彤突如其來嘅提問搞到窒咗一窒，喺腦海中諗咗一諗李逸彤問嘅問題後，無奈地反一下白眼，「講緊咩喺度⋯」

邱旻顥無奈地望向李逸彤，卻見到李逸彤一臉認真地望住自己，邱旻顥沒好氣地輕嘆一口氣

「你幾時見過我同其他女仔咁樣⋯？」邱旻顥無奈地講道

「哦⋯」李逸彤沒頭沒腦地哦一聲回答

聽到邱旻顥嘅回答，李逸彤喺心裏笑了笑





「即係都係得我一個會同佢咁樣挽手～」李逸彤喺心裏笑道，但下一秒又諗到另一個問題，「如果其他女仔主動挽佢隻手，佢會唔會避開⋯？」

邱旻顥眼睛嘅餘光一直留意着李逸彤，邱旻顥自問真係唔會受同女仔行得咁埋，李逸彤對佢嚟講，完全係一個例外

「我地去食咖哩好唔好呀？」李逸彤朝邱旻顥笑着問道

「嗯，好呀。」邱旻顥笑咗一笑

「耶～」李逸彤鬆開咗邱旻顥嘅手，向前小跑咗兩步後回頭望向邱旻顥，「行啦！我肚餓！」

邱旻顥嘅步速不急不慢，佢望住李逸彤，心裏的確更中意同佢兩個人獨處嘅時間，臉上露出淡淡嘅笑容

邱旻顥中意喺放學後番屋企嘅路上可以同李逸彤獨處，兩個人講下無聊嘢、日常事；亦中意喺課外時間同李逸彤相約出街，中意同李逸彤一齊去唔同嘅地方行下睇下

只要係同李逸彤獨處，就算大家都唔出聲好，對邱旻顥嚟講都係特別嘅時間





「鼻尖都紅晒⋯」邱旻望住李逸彤時喺心裏講道，風一直吹，吹到李逸彤嘅臉頰同鼻尖都微微泛紅

「偷笑啲咩呀邱旻顥？」李逸彤見到邱旻顥嘅嘴角微微上揚，頓時就行到邱旻顥嘅面前，直盯着佢問道

「嗯⋯？」邱旻顥怔了一怔，連佢自己都冇察覺到自己嘅嘴角上揚了，「冇嘢。」

邱旻顥總係會喺望住李逸彤時嘴角不自覺地上揚，有時當佢發現到嘅時候，已經係佢笑緊嘅時候

李逸彤對邱旻顥嚟講，就好似一個小太陽一樣，總係溫暖住佢嘅心⋯




IG Link: https://www.instagram.com/nd_cotttoncandy/?hl=zh-tw