［愛情純愛］我地之間嘅友誼純度絕對等於零！！！: 28. 怎麼沒發現

兩人番到學校，一同踏入課室，李逸彤行番埋位坐低

班上嘅同學雖然都見慣佢地兩人成日一齊番學，但私下都會講下緋聞，邱旻顥同李逸彤早就見怪不怪

「李逸彤，你係唔係有數學簿？可唔可以借我一下？」一個梳住低馬尾嘅女同學行到李逸彤嘅座位

「哦好呀，等我一陣⋯」李逸彤拉開書包拉鍊，將放咗功課嘅功課file拎出嚟，喺file中抽咗本數學簿出嚟比女同學，「嗱！」

「唔該～」女同學微微一笑，禮貌地對李逸彤講道，女同學望一望邱旻顥又望一望李逸彤，然後望住李逸彤時嘴角上揚起嚟





「想講咩？」李逸彤都估到佢想講咩，直接反一個大白眼

邱旻顥聽到李逸彤講嘅嘢，抬頭望一眼兩個女仔，見到女同學喺度笑，邱旻顥都估到佢想講咩，無奈得直搖頭

「咁醒嘅？」 女同學笑一笑講道，「邊個叫你地成日糖黐豆咁啫～」

「邊個同佢糖黐豆！？」李逸彤反應快，一下子便回答道，仲順便回頭望邱旻顥一眼再朝佢反一下白眼

「李逸彤！我先係要反白眼嗰個囉！」邱旻顥見李逸彤嘅反應，佢自己都下意識反一下白眼





「唉～又打情罵俏啦～」女同學微微耷低頭偷笑，抬頭後輕抿一下唇忍着笑意，「我陣間還番本簿比你啦～」

「好呀～」李逸彤點點頭，然後回頭望向邱旻顥細聲地道：「邊個要同你糖黐豆！你諗下好啦！」

「一定唔係我囉！」邱旻顥笑道，「你先係諗下就好嗰個呀！」

邱旻顥同李逸彤雖然聽到人地「抽水」嘅時候，都會自然地一臉嫌棄咁拒絕，但心入面卻覺得冇咩所謂，反正都係同自己中意嘅人比人傳緋聞

「咁我地又真係幾乎每日都一齊番學、一齊食lunch、一齊放學嘅～」李逸彤坐番好後托住腮喺心裏甜笑着道，「又真係⋯似糖黐豆嘅～」





邱旻顥望住李逸彤嘅背，佢望一望坐喺前面嘅女同學，諗起佢啱啱講嘅一句「糖黐豆」，嘴角都自動上揚起嚟，但為咗唔好比人發現，佢手摸着後頸微微耷低頭

李逸彤起身行去開locker，蹲喺邱旻顥嘅枱邊開locker，從locker中拎出頭兩堂同小息後兩堂嘅書，拎咗出嚟之後好順手咁轉身將書放到邱旻顥嘅枱上

「你啲書想點呀？」邱旻顥口裏抱怨，但又默默地將李逸彤嘅書疊好，「放晒喺我張枱度想點？」

「順手嘛～我張櫈好遠。」李逸彤隨口講咗個理由，其實佢就係特登將書放喺邱旻顥嘅枱上

「有幾遠呀？」邱旻顥無奈地望住李逸彤嘅側面講道，「你坐我前面咋小姐⋯」

「借嚟擺一下咋嘛～唔好咁小氣啦～」李逸彤企起身，將locker門閂上

「我不嬲都好大方。」邱旻顥講嘅同時，趁李逸彤未擰轉身過嚟，一下子將放喺最底嘅英文書抽起收到自己嘅櫃桶中

「唔好借啲意讚自己⋯」李逸彤轉身將放喺枱上嘅書拎起放到自己嘅櫃桶





邱旻顥偷偷地留意住李逸彤，見到李逸彤完全冇發現自己嘅英文書比佢拎咗

「洞察力咁差得唔得㗎⋯？」邱旻顥耷低頭偷笑起嚟

李逸彤放好書之後就朝課室門口行去，行出課室去一趟廁所

邱旻顥嘅手放入櫃桶，放喺最面嘅第一本書就係李逸彤嘅英文書

「佢幾時先會發現自己本書唔見咗呢～」邱旻顥喺心裏猜想道

⋯

轉堂嘅鐘聲響起，老師敬禮落堂後，大家都各自拎出下一堂嘅書準備上堂





坐喺位嘅李逸彤向後靠喺櫈背上望入櫃桶同時伸手去搵英文書

「咦⋯？」李逸彤一本一本書咁拎起，但卻搵唔到英文書，「我今朝有拎㗎⋯」

李逸彤回頭望向邱旻顥，伸手拍一拍邱旻顥嘅枱面

「有冇見過我本英文書？」李逸彤問道

「英文書？冇喎⋯」邱旻顥擺出一副事不關己嘅樣，講咗個小大話

「吓？」李逸彤輕皺起眉頭，然後趁老師未嚟之前開locker搵

一打開locker，卻冇見到英文書嘅蹤影，李逸彤嘩膝跪喺Locker前，一手捉住locker嘅門，腦海中諗緊英文書嘅下落，佢有機會將英文書放咗喺邊

「今日我成疊書放咗喺邱旻顥嘅枱面⋯」李逸彤沉思着，過咗兩秒，佢靈機一動，一下子回頭望向邱旻顥，「邱旻顥，我本英文書呢？一定係你拎咗啦！」





「我拎你嗰本做咩？我又唔係冇英文書。」邱旻顥理直氣壯地講道

「一定係你拎咗囉！」李逸彤移到邱旻顥嘅身旁，邱旻顥整個人往後靠喺櫈背上，李逸彤伸手入去邱旻顥嘅櫃桶搵，果然喺一搵就搵到自己嘅英文書，「嘖！邱旻顥你個小學雞！偷我本書⋯！」

「你咁蠢㗎～咁遲先發現⋯」邱旻顥望住氣沖沖嘅李逸彤忍唔住笑起嚟，「偷咗你本書成朝都冇留意到～」

「你個小學雞⋯！」李逸彤從邱旻顥嘅櫃桶中拎番自己本書，「書都偷⋯」




IG Link: https://www.instagram.com/nd_cotttoncandy/?hl=zh-tw