［愛情純愛］我地之間嘅友誼純度絕對等於零！！！: 02. 起點（上）

李逸彤比邱旻顥早一步踏入課室番到課室，呢個鐘數課室仲未有好多人，畢竟上到高中，冇邊個會特登早到，喺課室先放低書包後再落操場上早會

李逸彤放低書包之後行到去locker嗰邊拎嘢，沈心怡頓時起身行到去李逸彤嘅身旁

「哎喲～你地做咩又～一齊番呀？」沈心怡一到李逸彤嘅身旁，頓時細聲地挪揄道，「最近成日都一齊番呢～」

「咁啱撞到咪咋嘛～」李逸彤無奈一笑講道，「番同一間學校，又住得近，都好難怪嘅～」

「哦～咁啱～」沈心怡偷偷地喺度笑，回頭望向邱旻顥嘅座位，然後細細聲地對李逸彤講道，「你唔係為咗撞人而特登遲咗出門口㗎咩？」





「喂⋯！」李逸彤頓時慌張地左右張望，伸手掩住沈心怡嘅口，「陣間比人聽到呀⋯！」

「都冇人會聽到㗎啦⋯你驚咩喎⋯而且佢都冇聽到⋯」沈心怡無奈地講道，「你兩個到底宜家係做咩㗎⋯你係中意人咪講囉～」

「好感⋯！都話咗係好感！得未呀！」李逸彤細聲又激動地講道

「Okay！Okay～」聽到李逸彤嘅回答，沈心怡滿意地比咗個Okay手勢

「你仲笑咩呀⋯」李逸彤無奈地反一下白眼，「講埋比你聽仲想點呀！」





「只係覺得好搞笑，你地嘅緣份起點。」沈心怡抿一抿唇後，微笑着講道，「佢扶咗個婆婆，點知係你嫲嫲，然後你又咁啱見到～唉～緣分嘅嘢，就係咁兒戲～」

⋯

三個月前

星期四嘅5點半，落日餘暉，喺天空變成咁橙黃一片嘅同時，中五嘅地理補課都隨之完結

「番到去唔瞓番一覺，真係會對自己唔住⋯」邱旻顥企喺班馬線前等轉燈嘅同時，喺心中講道





喺佢身後有幾個小學生喺度打鬧，邱旻顥望咗佢地一眼，心裏除咗覺得佢地好嘈之外，大概只有厭煩

「嘖⋯」邱旻顥喺心中不滿地嘖咗一聲，「宜家啲小朋友都係咁樣⋯」

幾個小學生喺打鬧嘅同時喺度推嚟推去，什至一直撞到身邊嘅人

其他人都不滿地望住嗰幾個小學生，但卻冇人開口將佢地教訓一頓，大家都只係擺出臭臉望住佢地

綠燈亮起，大家自然就邁步行上前過馬路

嗰幾個小學生見綠燈亮起，飛快地跑起嚟，朝住對面跑去，一邊跑一邊繼續打鬧

「哎喲⋯！」

一聲呼叫吸引咗所有人嘅注意，嗰幾個小學生照跑，直至跑到對面、過咗馬路之後先回頭望





「你地撞到人呀！」一位女士皺起眉頭，一臉嚴肅地朝小學生嗌道

邱旻顥默默地上前將被小學生們撞跌倒喺馬路中心上嘅婆婆扶起，順手地幫佢將瞓低喺地上嘅「買餸車」都扶起

「你地咩學校㗎！」附近嘅路人都嚴肅起嚟，「撞到人睇唔到㗎咩！？」

邱旻顥咩都冇講，一手捉住婆婆嘅手臂，一手拎起婆婆架「買餸車」，放慢自己嘅步速遷就因跌倒而行路一拐一拐嘅婆婆

綠燈開始閃動，但婆婆卻行唔到幾快，身邊本來行得好快嘅路人，都喺過呢一小段馬路嘅時候放慢步速

邱旻顥將婆婆平安地送到對面，上番行人路之後，自然地帶婆婆行到一旁嘅長櫈上坐低

「婆婆你有冇事？」邱旻顥開口問道





「唉喲⋯真係老啦，跌一跌，膝頭有啲痛。」婆婆坐喺長櫈上，手按摩着自己嘅膝頭

「你住邊？洗唔洗打比屋企人叫佢地嚟接你？」邱旻顥四周張望

「屋企冇人啦，個個都番工番學⋯」婆婆默默地嘆咗一口氣，「唔該你呀後生仔！」

「唔洗。」邱旻顥微微搖頭

邱旻顥企喺原地，心裏有啲無奈，因為就咁就走咗去好似唔係幾好，畢竟婆婆好似整親；但係婆婆又搵唔到人嚟送佢番屋企，咁樣企喺度等都唔係辦法

「呵～欠⋯」李逸彤打咗一個大大嘅喊露

李逸彤踏出學校門口，行到學校外面，本來已經唔夠瞓又補完課嘅佢，呢一刻已經感覺疲倦萬分，只係想快啲番到屋企好好咁休息一下

此時嘅李逸彤獨自一人行到去馬路嘅紅綠燈前，紅燈剛好轉為綠燈，剛要邁步過馬路時，李逸彤見到喺馬路對面嘅一張長櫈上坐着一個無比熟悉嘅身影





李逸彤加快咗腳步跑到馬路對面，直接跑到去嗰個身影嘅旁邊

「婆婆，你真係唔洗搵人接你？」「嫲嫲！」

喺邱旻顥開口再問嘅時候，李逸彤朝佢地跑過嚟；邱旻顥朝李逸彤嘅方向望去

邱旻顥認得李逸彤，畢竟大家係同級兼同班生，仲係一齊讀地理嘅同學

「嫲嫲你做咩坐喺度嘅？」李逸彤行到嫲嫲嘅面前、邱旻顥嘅旁邊蹲低，抬頭望住嫲嫲，「你整親呀？」

「啱啱跌一跌啫，膝頭又痛！」嫲嫲對李逸彤講道，然後指住企喺佢面前嘅邱旻顥，「呢個後生仔扶我過嚟坐低㗎！」








IG Link: https://www.instagram.com/nd_cotttoncandy/?hl=zh-tw