［愛情純愛］我地之間嘅友誼純度絕對等於零！！！: 03. 起點（下）

李逸彤同邱旻顥對望咗一眼，隨即又將視線落番喺坐喺櫈上嘅嫲嫲身上

「嫲嫲我陪你番去啦！」李逸彤一臉擔心地講道，捉住嫲嫲嘅手

「婆婆，咁我走先啦，既然有人嚟接你！」邱旻顥微微一笑講道，李逸彤望向邱旻顥

「啱啱真係多謝你呀後生仔！」李逸彤嘅嫲嫲禮貌地講道

邱旻顥隨即轉身離去，李逸彤喺扶起佢嘅嫲嫲後，朝邱旻顥望咗一眼，然後先再同佢嘅嫲嫲一同番屋企





「好啦好啦，嫲嫲，我地番去啦～」李逸彤輕皺起眉頭講道

「個後生仔係你同學呀？佢好似都係著住你間學校嘅校服。」嫲嫲問李逸彤

「吓？哦，係呀，你咁好眼力嘅？」李逸彤笑一笑講道，「咁都比你睇到佢同我著住同一間學校嘅校服呀～」

「嫲嫲老，但眼未矇⋯！」嫲嫲一臉自豪地講道

「知啦～知你叻啦！」李逸彤無奈地講道，穩穩地扶住嫲嫲一步一步行





「幫我多謝佢呀！好彩多得佢咋！」嫲嫲拍一拍李逸彤嘅手背

「但我同佢唔係好熟⋯」李逸彤尷尬一笑

「但都要多謝人㗎，多得佢，我呢個老太婆先冇比車撞！」嫲嫲一臉認真地講道

「知啦⋯」李逸彤無奈地回答，「我會去多謝佢啦！」

⋯





喺翌日地理堂嘅時候

喺差唔多響起上堂鐘聲之際，讀地理嘅同學們都已經喺課室坐好

地理堂用課室係A班嘅課室，本來就讀A班，而且都係讀地理嘅邱旻顥同李逸彤都唔洗轉課室，不過要轉位

喺邱旻顥拎起地理書同筆袋放到旁邊嘅座位時，李逸彤朝邱旻顥望咗一眼

「呃⋯琴日真係唔該你呀，多得你，我嫲嫲先冇事咋～」李逸彤企喺邱旻顥地理堂嘅座位旁

「舉手之勞啫～」邱旻顥從櫃桶中拎咗地理書同筆袋，然後起身

「呢個⋯！」李逸彤將同筆袋一齊放喺地理書上嘅一袋糖拎起遞比邱旻顥，「請你食㗎！當係多謝你嘅謝禮。」

「唔洗，真係只係舉手之勞⋯！」邱旻顥有啲唔自在地望住李逸彤





「叮噹叮噹，叮噹叮噹⋯」

上堂嘅鐘聲響起，李逸彤連忙將包糖塞到去邱旻顥本來嘅座位嘅櫃桶中

「即係逼我收咗佢⋯」邱旻顥望住包糖，無奈一笑

⋯

「你地真係好有緣～第二日仲要調咗位，佢坐正喺你後面～」沈心怡比李逸彤更興奮

李逸彤無奈地望一望沈心怡，佢喺調位嗰日都覺得好神奇，到底點解班上有咁多人，都可以編到邱旻顥坐喺自己後面

不過宜家，李逸彤比較覺得，呢個調位結果好好





「李逸彤，你做咗地理張WS未？」邱旻顥喺李逸彤番到位之後頓時急不及待地問道

「哦做咗啦～」李逸彤企喺自己嘅座位旁邊，左腳跪喺櫈上，「做咩呀？你要呀？」

「嗯，借嚟。」邱旻顥直接點頭

李逸彤喺放功課嘅file中拎咗張對摺住嘅米白色地理WS出嚟，然後遞比邱旻顥

「嗱！你唔好抄到咁足呀！」李逸彤對住急不及待接過張紙嘅邱旻顥講道

「得啦得啦！你當我小學生咩！」邱旻顥灘開張紙，連忙抄起嚟

李逸彤靜靜地企喺度望住邱旻顥抄自己份功課，但佢嘅目光卻唔係停喺功課上，而係望住耷低頭嘅邱旻顥⋯嘅後腦勺

自從調咗嚟呢個位之後，李逸彤同邱旻顥就熟咗好多一樣，可能只係因為當初完全唔熟，到宜家講多咗嘢嘅關係





邱旻顥以最快嘅速度將所有嘢加啲減啲咁抄到去自己嗰張本來空空如也嘅WS上

「好心你就自己做啦⋯」李逸彤無奈地拎番自己張WS，「寫幾個字都要抄我嗰份⋯」

「抄你嗰份係最有機會拎A㗎！」邱旻顥將自己份WS收到櫃桶中

「明明琴晚你就掛住打機⋯」李逸彤反一個白眼，「打少一場都可以做好份功課啦⋯」

「你又知我打機？」邱旻顥一臉愕然地講道，「你咁留意我嘅？」

「你自己同我講㗎好唔好⋯？」李逸彤更無奈，「邊個要留意你⋯」

「佢兩個一大清早就係咁啦又⋯」一個男仔行入課室後直接行到自己嘅位置放低書包





「早晨阿諭～」沈心怡見到佢後笑一笑，然後又望向李逸彤嘅方向，「佢地最近都係咁，都慣㗎啦～」

潘景諭走向邱旻顥嘅座位，李逸彤先望到迎面行嚟嘅潘景諭，邱旻顥見李逸彤望向佢嘅身後便回頭望

「你又抄李逸彤份功課呀？好心你自己做啦⋯」潘景諭微微靠坐喺邱旻顥隔離位嘅書枱上，「得嗰幾題都要抄⋯」




IG Link: https://www.instagram.com/nd_cotttoncandy/?hl=zh-tw