［愛情純愛］我地之間嘅友誼純度絕對等於零！！！: 01. 如果可以再近一點

「咚、咚！」升降機響咗兩聲，升降機由32樓到咗25樓

升降機門緩緩打開，企喺升降機門外嘅邱旻顥見到企喺升降機內門邊位置嘅李逸彤

邱旻顥不禁吞咗一啖口水，然後邁步行入升降機中，喺擠滿上班族同學生嘅升降機中，邱旻顥默默地企喺最近門嘅位置，企喺李逸彤嘅旁邊

「早晨⋯」邱旻顥望向李逸彤，先開口講道

「早晨⋯」李逸彤望向邱旻顥講道





兩個人嘅視線對上，然後兩人都同時瞬間地移開視線，邱旻顥撥一撥頭髮，雙手插喺褲袋中；李逸彤嘅右手拎住手機，左手輕輕地捉住右手嘅手腕

看似做出自然舉動嘅同時，但動作中卻表達出佢地嘅唔自然

「咚、咚！」升降機響咗兩聲，升降機到地面

升降機門打開，邱旻顥先行出升降機，企喺門邊嘅李逸彤都跟住出去

邱旻顥行到大堂嘅門前，將大門推開，佢冇等埋李逸彤，開咗門就直接邁步行出去





行喺後面嘅李逸彤趕喺門閂埋之前連忙急步行上前拉住門柄，將就嚟閂上嘅大門再次打開

行到去外面嘅邱旻顥，同李逸彤之間已經拉開咗一段短嘅距離，邱旻顥以細幅度轉頭望向旁邊，然後蹲低喺路中心綁鞋帶

一直行喺邱旻顥身後嘅李逸彤見到邱旻顥蹲低綁鞋帶，於是上前行到邱旻顥嘅身旁

「綁鞋帶？」李逸彤上前一個明知故問

「嗯，好明顯啦係咪？」邱旻顥企番起身，對李逸彤講道





「點知你係綁鞋帶定執樹葉。」李逸彤無奈地講道，「仲要企正喺路中心，想撞死邊個？」

邱旻顥拉一拉裇衫，李逸彤微微耷低頭望一望自己嘅校裙，兩人默默地以同樣嘅步伐同步速一齊前行

「執咩樹葉，一大清早⋯」邱旻顥一臉無言，然後望一望手錶，「我話你最近跟蹤我呀？日日番學都見到你⋯」

「痴咩線⋯大家住同一幢樓番同一間學校⋯邊個得閒跟蹤你？」李逸彤反駁道，「唔好咁自作多情啦～你係唔想見到我嘅話，下次唔好入嚟，等下一架囉～」

最近邱旻顥同李逸彤成日都撞到，然後一齊番學，雖然一見面就自然地會開口窒對方兩句，但喺佢地心底裏，似乎都覺得朝早撞到對方一齊番學都唔係一件壞事⋯

「陣間遲到點算？」邱旻顥講道，「你唔出嚟等下一架？」

兩人你一句我一句的，行到落去地鐵站等車番學

李逸彤一上到地鐵，習慣性地行到中間嘅位置企，然後耷低頭睇手機；邱旻顥企喺李逸彤旁邊，手捉住扶手





地鐵嘅車門喺一連串「嘟嘟」聲後開出，喺列車入咗隧道後，邱旻顥望向車門嘅玻璃，但佢唔係望緊自己今日好唔好睇之類，而係望向喺玻璃倒影中嘅李逸彤

李逸彤就喺佢面前，但邱旻顥卻唔打算直接望住李逸彤，因為萬一佢直接望住李逸彤，但李逸彤察覺到，然後抬頭望向邱旻顥時，邱旻顥趕唔切望去第二度嘅話，咁就尷尬⋯

所以邱旻顥選擇咗從玻璃窗嘅倒影望李逸彤，就算李逸彤見到，都可以話自己只係發緊呆

地鐵去到下一個站，開門、上客、閂門，喺開車嘅時候，車廂先微微向後，然後再向前開出

李逸彤掛住睇手機，又唔捉扶手，喺地鐵開出嘅時候，一時間捉唔到重心，右腳向後踏咗一步；邱旻顥眼明手快地伸手捉住李逸彤嘅前臂

「你扶住啦，又唔係平衡力好好⋯」邱旻顥講道，然後捉起李逸彤嘅手，將佢嘅手放到扶手上，「仲掛住睇手機。」

「我又冇跌～」李逸彤微微鼓起兩泡腮，望向邱旻顥





邱旻顥嘅心跳瞬間漏一拍似的，然後緩緩地將視線移開

「你⋯仲捉住我做咩⋯」李逸彤望一望自己嘅手，又抬眼望向邱旻顥

「咩、咩呀⋯」邱旻顥頓時回神過來，將手鬆開後放到比李逸彤嘅手高嘅位置，「我怕你又企唔穩，好心捉住你咋！」

「最好真係⋯」李逸彤細細聲地講道

李逸彤望住自己嘅手，喺佢嘅手嘅上方，係邱旻顥嘅手，兩人嘅手之間相隔咗一段距離

「如果啱啱我冇提佢，佢係唔係會一直捉住我隻手⋯」李逸彤悄悄地抬眼望向邱旻顥，但邱旻顥早就移開了視線、撇開了臉

邱旻顥嘅視線仍然落喺車門嘅玻璃上，李逸彤微微耷低頭，怦然心動嘅感覺傳嚟，捉住扶手嘅手心出汗

「如果可以⋯再捉多佢隻手一陣就好⋯」邱旻顥望住喺玻璃中嘅李逸彤





兩人各自強忍着唔向對方嘅方向望去，各自將怦然心動嘅感覺收喺心中

「行近一步又太明顯⋯」邱旻顥喺心中無奈地講道

「後退一步又唔可能⋯」李逸彤喺心裏默默地嘆咗一口氣

「如果可以再近一步就好啦⋯！」「點樣先可以再行近一步⋯？」




IG Link: https://www.instagram.com/nd_cotttoncandy/?hl=zh-tw