男友出軌，我決定送26頂綠帽比佢: 番外：風起了

今日掛八號波，可以提早收工。

人群之中，狂風夾住斜斜細雨，輕輕地打落到我的面上。

丁家岐好中意呢種天氣。所以，每逢颱風來襲既日子，我都會諗起佢。

過去既笑聲仍在耳邊，兩個身影拖住手，係滂沱大雨之中奔跑。

「全世界我只愛胡凱婷一個！」





「胡凱婷都好愛丁家岐！」

「我地要永遠係埋一齊！」

「邊個反悔，就會被雷劈死！」

唔知佢而家被雷劈死咗未呢？

橫風橫雨，離愁別緒湧上心頭...突然好想你，你會在哪裡。





做唔成戀人，都可以做朋友啫，簡單一聲問候，算不上是打擾吧。

於是我拎出手機，輸入佢既手機號碼。

佢頭像既女主角，已經換成係Nicole。新歡取代舊愛，兩個人笑得好甜蜜。

份外刺眼。

我係對話框輸入：其實我仲係好掛住你，我會一直等，等你回頭，等我死心。





成日話衝動是魔鬼，就等我做一天魔鬼吧。

我按下「傳送」。

丁家岐：講呢啲（一個哭笑不得的emoji )

呢三隻字，適用於表達喜怒哀樂，適用於各種場合同語境。

根本無法解讀背後既意思，講完等於無講。

所以我刪咗呢兩個訴息。

順手刪埋佢既電話號碼。

咁就可以當乜事都無發生過。





行行下，不知不覺間，我行到去樓下既公園，兩個鞦韆都寫住「有待維修」。

真掃興。

「打風先黎盪鞦韆，唔驚俾風吹走？」一個男人企係我隔離，擔住把黑傘遮埋我。

「關你屁事。」我望都唔望就話。

老娘心情很不爽，呢一刻我只想去殺人，唔該遠離我十萬八千里。

「脾氣仲係咁火爆。」

仲係？我推開佢把傘，反咗一個大白眼：「原來係你呀。」





是D先生。

「除咗我，仲有邊個打風都係條街遊蕩？」

「我咯。」

「兩個一樣咁撚癲。」

我地互相擊掌，然後一齊哈哈大笑。

「係咪想去盪鞦韆？」D先生問我。

「如果我話係呢？」唔通佢可以變一個鞦韆出黎？

「上一次我地好似有野未做完。」D先生不懷好意地笑笑：「我可以同你玩龍舟掛鼓，捉住你係咁搖。」





我大大力掐咗佢一下：「係咪黎真呀？驚你唔夠臂力咋。」

「你呢個死o靚妹，唔係咬我就係掐我...算，怕咗你，帶你去新既遊樂場玩。」

「唔係仲起緊咩？」

「山人自有妙計。」

我地爬上樓梯，翻過欄杆，跨過草叢，佢一躍跳落地，舉起雙手：「我接住你。」

安全地降落。

「點解你成日做咩啲違法野？」





「點解你又成日跟我做埋啲違法野？」

「......」我都想知點解。

D先生徑直走到鞦韆坐低。

「係呢，你呀嫲佢點啊。」我用力一蹬地，同佢鬥邊個盪得高。

唔可以輸俾佢。

「呢排忙緊織野，同班姐妹拎出去賣。」

「咁咪好，有野做有精神寄托。」

「唔似我，日日做個無業遊民。」

「有無拎失業援助金？」

「唔符合資格。」

傷心野唔多講，我望住空中有個膠袋飛飛下，幽幽地道：「希望我到八十歲，都好似你阿嫲咁精靈。」

「你呢？同條仔散咗未？」

「你講到好似一直等緊我地散咁。」

「唔散我邊有機會乘虛而入。」D先生一臉吊兒郎當咁話。

我頓咗一頓，「散咗啦。」

「出軌定偷食？」

「有分別架咩？」

「我同你果啲叫偷食，抹完嘴，大家扮唔識，當無事發生過。」

「佢分咗手之後先有新歡。」我淡淡然咁話，「個女仔靚過我又叻過我，揀佢唔揀我好正常。」

D先生：「咁我揀你咯。」

「Thanks.」雖然明知佢係講笑。

「我一睇就知你條仔靠唔住。」佢又話。

「車，你以為你係鐳射眼咩。」我睥咗佢一眼：「你自己都唔係好靠得住，仲話人。」

「我從來就係個不負責任既渣男。」D先生突然剎停鞦韆。

「做咩呀？」

「食枝煙先。」

佢拉低口罩，叼住一枝煙：「凱婷要唔要黎兩枝？」

「唔啦。」我擺擺手。

風太大，點咗幾次都點著。我行過去，解開風衣，為佢擋風。

佢望咗我一眼，「仲以為你要對我寬衣解帶。」

「你諗多咗。」

D先生既目光移向地板：「你腳邊有隻甴曱。」

我一望，果然有隻甴曱靜靜地伏係地下，觸角仲郁咗兩下。

「你居然無大叫。」D先生說。

「我驚識飛既甴曱多啲。」

突然飛出一團毛茸茸的東西，真係會嚇到魂飛魄散。

「一到打風落雨，佢地就四圍爬。」我話。

「梗係啦。係呢個時候，佢地先唔會俾人打，可以出黎透下氣。」

「所以我放佢一條生路。」我行開，無一腳踩死佢。

D先生嘴裡吐出一口煙霧：

「有時候我覺得自己係一隻甴曱，係害蟲，對社會一啲貢獻都無，個個避都避唔切。」

（未完待續）