男友出軌，我決定送26頂綠帽比佢: K for 女僕cafe的一天（6）

「今日真係辛苦哂。」Aka拎咗碟蜂蜜蛋糕過黎，「請你食呀。」

「多謝。」打工都係想搵錢，有錢梗係要食好野，仲要係免費既。

「第一日番工，覺得點呀？」

「幾好呀。」第一日既工作量還算輕鬆。行行企企，同客人吹下水，七、八個鐘，嗖一聲就過去了。

老闆出錢，其實係買緊你既時間同自由。





「你做野都幾快上手，我地五六日缺人，你會不會繼續翻呀？」

「我...好呀。」第一次俾人認同，原來咁有成功感！所以我即刻應承咗。

「正常黎講，每個女僕入黎之前，都會接受一個簡單既培訓，了解動漫文化，學返幾句日文冧客。

同埋呢度長期人手短缺，忙起上黎，可能要自己煮野食同沖野飲。」

「點解會長期人手短缺既？」我不解地問。





「我地請既多數係o靚妹，個個玩票性質，中意就過黎玩cosplay，唔中意就詐病玩失蹤，同埋恃住自己係網紅，番黎淨係識flirt仔，要佢做多啲，又話要加人工。」

番工已經夠哂攰，放工仲要應付班公主病...真係屌出聲。」

「我覺得Aka姐姐你好勁呀，要打理成間鋪，又要應付啲kam客。」

唔知講乜既時候，拍馬屁一定無錯。讚人既說話，邊個唔中意聽。

「今日既客算正常啦。」





「你遇過唔正常既客人？」我好奇地問。

「之前有位極品好恐怖，係咁轟炸我地WhatsApp，日日hi hi hi，hi佢老尾咩。之後仲離譜，定時定候等我放工，話順路送我番屋企，想請我食甜品。

我拒絕咗佢，就周圍唱我，上連登指名道姓話我收兵，唱衰成間cafe。

喂講真，呢度大部分女僕都有男朋友，就算無，都唔輪到你，唔好FF太多啦。」

如果俾班客聽到我地既真心話，一定想搵舊豆腐撞死把就。

「佢地平時不被社會善待，俾咗錢都溝唔到女，咪話人係臭雞，等自己心理平衡啲。」

「啱呀，你唔會知道佢地諗緊咩，因為佢地唔係正常人。」

「珍惜生命，遠離毒撚。 」





「然而毒撚 is everywhere 。」

「唔係好知點同佢地搵話題。」成日講唔夠三句，就dead air 咗。

「有時其實無聲勝有聲。一個笑容，已經可以令佢地浮想聯翩。唔好睇少佢地既FF功力，話唔定你笑一笑，佢已經幻想同你過人世，連仔女既名都諗好！」

遇著太痴纏既客人，真係恐怖過撞鬼。

Aka 拎咗個粉紅色心心信箱過黎：「又到拆炸彈既時候！」

「咩叫拆炸彈？」

「愛若說不出聲，可以投進信箱，向你們喜歡的女僕表白！」





「有你份喎，第一日就有粉絲。」有五封信，Aka拋咗一封過黎，其餘四封都係寫俾佢。

我有啲期待咁打開。

「親愛的安妮塔：

這裡的一切，說穿了，不過是一場交易。
因此，我懇求你欺騙我心中的愛情，以同情、以虛假的溫存，給你奇妙的目光以靈感，好來作弄我馴服的靈魂，向它注入毒藥和火焰。」

好似係普希金既詩。

字跡行雲流水，有種奔放的美感。

同埋我中意佢睇得咁通透。





「哇，啲字好靚喎，應該係新黎既客。」

邊位客人咁文青？我有無招呼過佢？

我苦苦思索，嘗試將今日見過既每張臉，同呢手字既主人做配對。

何以我竟印象全無？

咁就...唯有期待佢下次再黎過吧。

Aka：「你就好啦，之前有個同事，收過70頁既表白信，詳細記錄佢每一日既行蹤， 嚇到佢第二日即刻踢炮唔撈。

又有個同事，收過裝有不明液體既信，備註：想在你的手上，留下我的味道。」

「好撚癲。」





第一份收到既「情書」，要好好保存，我摺番好，放入手袋。

「你平時肯定無收開兵。」Aka突然彈咗一句出黎。

「無呀。」

「睇你個樣都似係乖乖女。」

「係好事定唔好事？」

「女仔最好唔好太乖，容易招惹到player。咁聽話易哄，唔呃你呃邊個。」

丁家岐算唔算係玩家呢？

「哦。」

「見你今日同果個Ken行得太近，對公司對你自己黎講，都唔係好事。 」

佢呢啲寂寞空虛既人，無時無刻都撩緊女，重複一樣既說話，好似玩玩具咁，厭咗就換下一個，點解仲要送上門，做佢另一個玩具，滿足佢既虛榮心咩？！

Aka既一句話，徹徹底底地點醒咗我。

所以到最後我都係無搵到阿Ken。