男友出軌，我決定送26頂綠帽比佢: 番外：風起了（二）

「曱甴生命力夠頑強啊，呢點我真心佩服。」呢種令無數地球人恐懼既生物，比恐龍早出現一億五千萬年、比人類早三億年。

佢地會係最意想不到既時候出現，每當人類拎住拖鞋、胡亂尖叫時，如果佢地有思想，可能仲會心諗：

論輩分，我係你地祖先，食鹽多過你地食米，一隻死咗，仲有千千萬萬隻爬起身...

我就喜歡你看不慣我又幹不掉我的樣子。

「同埋曱甴本身沒做錯，沒得罪任何人，佢地只係為咗生存。」





「生得樣衰。」D先生嘆咗一口氣：「樣衰就係原罪。」

「你好樣過曱甴既，唔好太睇少自己。」我一本正經咁話。

「頂你個肺。」D先生輕笑出聲。

我又跟住一齊笑：「你想多啲人中意你？」

「咁你中唔中意我呀？」D先生望住我。





「唔算好中意，考慮下啦， 三日內收唔到回覆啫係無結果。」

「我會番屋企等消息。」D先生對我做咗個ok 既手勢。

對住佢，可以溝下，又可以撩下，講啲輕佻既說話，唔使負責任，界線分明，因為大家都知係講緊笑。

「想人中意我有幾難。」D先生將煙頭捻埋一舊，好有型咁亂拋垃圾：「只要做啲符合大眾期望、社會規範既事就得。

不過要迎合其他人，就代表要壓抑自己，做啲違心又吃力不討好既事。





所以，我都係寧願人地憎我；如果有人中意我，我會當係一種bonus。」

我嗯咗一聲：

「由小到大，長輩都教我地，要乖要聽話，要認真讀書，要遠離煙酒毒品損友...

所以我係其他人眼中既乖乖女，我唔識拒絕人，人地講咩我都照做。」

「試下唔好理人地對你既睇法，咁樣會開心啲。」

細個睇天若有情，覺得Jojo著婚紗係公路上奔跑係一件好浪漫既事。

大個再睇番，就會成日諗，點解電影裡面既乖乖女，會同古惑仔愛到死去活來。

唯一既解釋，就係凡事唔可以只睇表面，乖乖女其實並非真的循規蹈矩，而古惑仔亦唔係真的作惡多端。當佢地遇上，而又足夠信任對方時，就會展現原本的面目。





「只要唔做傷天害理既事，人地點睇我關我撚事。」

「係呢，我今個月底要上法庭。」D先生輕描淡寫咁話。

「咩事呀？」每次一提法庭，好自然就會聯想到殺人打劫作奸犯科。

「同人打架。」

「哦。」打架打到被警察拉，又幾似佢既作風，所以我唔覺得好出奇。

「我之前咪同你講過，有個妹妹被人呃蝦條？我又撞番果條仆街，跟咗佢幾日，趁佢落單，拎條鐵通同佢隻抽。」

如果係以前，我實會問：做咩同人打架呀？你仲係小學雞咩...報警拉佢咪得。





但係今時唔同往日，以暴制暴...對付仆街就係要比佢更仆街！

「我挨咗佢幾拳，佢俾我扑咗四五下，打打下突然有幾個警察沖埋黎，捉咗我地返差館錄口供，話我地擾亂社會秩序，之後會收到法庭傳票，到時再審過。

佢傷得比我重，所以應該係我贏。」

男人果然係男人，打落牙齒和血吞，輸贏比什麼都重要。

「打官司要唔要請律師？」

「我咁撚窮，鬼請得起律師，申請法律援助咋。

條仆街就唔同啦，屋企有背景，上到法庭，著哂西裝打哂呔，打扮到人畜無害，有大律師幫佢求情，話佢一時衝動先會犯錯，事後深感後悔，以後唔會要犯。」

「打官司係有錢人既玩意。有錢，就可以為所欲為，事後逍遙法外。





窮人打官司，為公道，為啖氣，理想很美好，現實很殘酷，最後輸咗成副身家財產。」

「呢個社會，有好多不公既地方，我好想去改變，但係憑一己之力，又做唔到啲咩...

今時今日仲講夢想，我係咪好幼稚？」

我唔知講咩安慰佢好。不過，我諗佢應該唔係想人安慰佢。

而係想有人認同佢呢種做法。

「唔係呀。」我搖搖頭，「做你覺得啱既事，承受到個後果，咪得囉。又係你話既，唔好理人點睇。

我問你啦，如果再俾多一次機會你...」





「我都係會打果條仆街一餐。」D先生打斷我的話，好堅定地道。

「連鹹魚都有夢想...」

「鹹魚有咩夢想呀？」D先生追問。

「要做最鹹既鹹魚呀。」我回答得理所當然。

「......」

「你都可以有夢想，要係要做隻有理想既曱甴。」

D先生哭笑不得：「估唔到，有一日，會聽你呢個死o靚妹講經。」

「你唔講個死字，會死架咩？」我推一推佢：「問你一個問題。」

「睇下係咩問題，再決定答唔答。」

「其實你有無女朋友？」

「你呢個話題轉得有啲突然。」

「女仔就係咁思維跳躍。喂唔好講其他野，快啲答我。」

「我既回答就係唔答。」

「......」