男友出軌，我決定送26頂綠帽比佢: K for 女僕cafe的一天（5）

「兩位小姐，去完廁所啦？」Ken獨自一人，等到百無聊賴。

Barbie哼咗一聲。

「都唔知你嬲咩。」Ken攬住Barbie，「有無講起我。」

女仔如果嬲，多數係因為有情緒，仲同佢講道理？只會嬲上加嬲。乜都唔好講，攬住一野咀埋去就得。

「你以為自己係邊個。」





「除咗講男仔，你仲有咩好講。」Ken好理所當然咁話。

係佢眼中，Barbie只係無乜頭腦既膚淺港女，只識得談情說愛。

咁佢的確係既。

Barbie不甘示弱地反擊：「咁你除咗識溝女，仲識得做乜。」

「喂，你估溝女咁簡單。要做攝影師幫你影千幾張相、要做搬運工幫你拎快遞、要做廚師餵飽你隻為食貓、要做人肉GPS帶你去搵路、上牀果陣仲要聲音導航埋...」





Barbie笑咗出黎：「頂你，咁辛苦咪唔好做咯。我去揾第二個。」

「你可以搵，但你唔會搵到個比我更好既人。」Ken自信莫名，一聽個語氣，就知佢平時食住Barbie，睇死佢一定唔會離得開自己。

Ken望一望我：「你話係唔係？」

我恭敬而有禮貌咁回答：「係既，主人係最好既男朋友。」

佢地開始講起悄悄話。





Aka拉我埋一邊，提醒我：「平時無乜人，想坐幾耐都得；而家仲有客等緊，用餐時間係90分鐘，要同佢地講番。」

「咳...唔知主人仲有無其他野想要？」我打斷佢地。

「無啦。」

「咁我幫你地執走啲野。」

「快手啲喎，唔好偷懶。」Barbie一臉傲慢咁望住我。

你係主人我係女僕，我份人工包埋受氣，我忍我忍。

「主人叫咗兩個主食，兩杯野飲，另收加一服務費，盛惠368蚊。」

Ken隨手放低四張紅鈔：「唔使找。」





「多謝主人！」收到既小費，Aka話可以自己落袋。

「係咪有得影Cheki？」Ken問。

Cheki既意思係即影即有。

Cheki有兩種，「直筆」只有簽名；「宿題」會畫埋公仔同寫幾句話。

「係既主人，每消費滿一百蚊，可以影一張相，所以你地可以影三張相。」

「港女又係時候要出動啦。」

第一張，係Barbie既獨照，企係玫瑰花牆前，笑起上黎都幾甜。





第二張，我企係鏡頭前面，Ken昅住我，Barbie係隔離扮嬲嬲豬。

「到我同你影。」Ken搭住我條腰。

頭先Aka講過，唔可以同客人有身體接觸，不過都無人見到...

所以是但啦。

我地一齊擺出心心手勢。

「一！二！三！」

Barbie拎住自己張相，坐番埋位，好專心咁欣賞。

我同阿Ken望住影像係相紙慢慢呈現。





感覺好真實自然，好有生活感，仲要自帶復古濾鏡。

「Barbie頭先有冇為難你？」Ken哄埋我耳邊問，氣氛變到有少少曖昧。

「唔算有。」

「第一次遇到咁啱傾既女僕。」

假到。

我地既對話，加加埋埋都唔夠廿句。

「主人係咪同個個女僕都咁講架？」





「你覺得我係啲咁既人咩？」Ken反問我。

「如果係，我會呷醋架。」

「點解呷醋呀？」佢明知故問。

「因為主人有好多個女僕，而我心裡面，就只有主人一個。」我扁扁嘴。

「咁俾我補償你？」

我笑而不語，拎枝銀色大頭筆，寫上今日既日期，再加番句：「期待下次同主人傾多啲偈xd。」

另一張，就寫咗：「幸福的一天！被滿滿的愛佔據了。」

最後簽上安妮塔既大名。

「送俾主人既小禮物，希望你中意。」我雙手遞手。

「你IG係乜？」Ken順口一提。

我搖搖頭：「唔話得俾你知架。」

「明白。」Ken即刻係我面前，開咗個IG post ：「I know it's your birthday but this is my page so it has to be me on the first pic. Love you !」

原來今日係Barbie既生日。

咁樣過生日，真係會開心咩？

Ken口口聲聲話愛Barbie。其實佢邊個都唔愛，只愛自己。

佢tag咗我間cafe：「如果你想搵我，你知點做架啦。」