男友出軌，我決定送26頂綠帽比佢: K for 女僕cafe的一天（4）

「過黎陪我地玩。」阿Ken對我招一招手。

「主人想玩咩呀？」

「True or Dare識唔識玩？」

「嗯。」

Ken拎起把刀，放係枱面轉。





Barbie自顧自地玩手機，無望過我地一眼，亦唔打算參與遊戲。

轉咗三圈，把刀指住我：「哈哈，你輸咗啦。」

我扁起嘴：「主人你特登既...」

「係唔係唔肯願賭服輸先？」

「主人話我輸，我就係輸架啦...我揀Dare，唔知我有咩懲罰呢？」





「我要你餵我食野。」

我切咗舊豬扒出黎，吹咗一吹，餵埋佢嘴邊：「小心熱呀。」

阿Ken一臉享受：「好耐無人餵過我食野lu。」

「咁主人有無覺得好幸福呀？」

「有...有...唔小心食到成嘴都係醬添。」阿Ken得寸進尺。





我側住頭望下佢：「我幫你抹走佢啦。」

我拎起紙巾，輕輕幫佢抹嘴。

「有個咁溫柔既女僕服侍我真係好。」

「咁主人你要多啲番屋企探我啦。」我嗲聲嗲氣咁話。

「一定會，一定會，我地繼續。」

今次輪到阿Ken輸。

「我揀真心話。」

我思考咗一陣，雙手捧臉，眼睛眨啊眨，一臉期待咁問 ：「主人同大小姐點樣識架？想聽浪漫既愛情故事呀。」





Barbie望一望我，對我反咗個大白眼。

阿Ken笑一笑：「你行埋啲，我講故事俾你聽。」

我坐係佢隔離。

「佢果時同你一樣，都係cafe做女僕，不過唔係呢間。」

我有點吃驚。傲氣凌人既大小姐，原來都做過「卑躬屈膝」既女僕。

難怪...我哄人既招數佢都用過，我所有既套路佢都睇得穿。

「主人似乎對女僕情有獨鍾喎。」我揞住嘴偷偷地笑。





「佢頭牌黎架，一當值就俾人book哂啲時間，個個指定要佢服侍。不過，最後咪又係俾我追到手。」阿Ken得意洋洋咁話。

「廁所係邊？」Barbie突然插嘴。

「出面直行轉右。」

「帶我去。」

「係既，大小姐。」

Barbie企起身，跟係我後面，高跟鞋咯咯聲咁響。

當正我係真女僕。

路上，兩個人默默無言，有一對對情侶擦身而過。





唔知點解，拍拖既時候，眼前所見盡是單身；到咗分手， 就會見到好多情侶放閃。

大概係因為風水輪流轉。

而家既我，應該係行緊狗屎垃圾運。

不過，唔係拍緊拖，就係單身中（未計糾纏不清既未命名關係），有咩咁出奇。

「你中意我條仔？」入到廁所，Barbie一邊搽唇膏，一邊漫不經心咁問，語氣自然到好似問緊「你今日食咗飯未」。

佢問得咁直白，我一時之間load唔切：

「工作需要。」





「呢度得番我地，你扮乜野。」

其實我對阿Ken談不上好感，更加無關乎喜歡。最多係見人有玩具玩，我自己無，想搶黎過下手癮。

既然Barbie一口咬定，無論我點否認， 佢都唔會信，不如玩下野，睇佢有乜反應。我笑住咁話：「如果我話係呢。」

佢哦咗一聲，唔覺得有咩出奇：「你又唔係第一個，唔好以為自己有幾特別。

阿Ken中意我為佢爭風呷醋，所以一有新黎既女僕，就會係我面前起勢咁撩。玩撚到厭，就會番黎我身邊。

由始至終，我先係佢既唯一。」

Barbie笑容中帶點挑釁。

WTF...我的內心無比震撼，我究竟聽咗啲乜，我地係咪生活係同一個世界。

究竟有幾愛，先會接受到男朋友係自己面前，同其他女仔勾三搭四；又要幾有恃無恐，先會做得出咁仆街既行為。

互相傷害，彼此虧欠，如此扭曲既關係，其實係唔係愛既一種？

「既然你咁有把握，點解仲要拉我入黎，同我講咁撚多野。」

「......」

因為無把握，所以先會草木皆兵。

就正如區區一兩句言論，或者掟幾隻雞蛋，就足以令玻璃心碎滿一地，威脅到國家安全，咁呢個國家真係幾脆弱。

Barbie既銳氣頓時消散了一半。

佢理所當然咁話：「十個男仔，八個都會出去滾，淨低果兩個，一個係同性戀，一個係性無能。

阿Ken佢份人，最愛貪新鮮。我都明既，一齊得耐咗，關係會淡，會無哂火花。要留住佢，就要俾佢出去玩，玩夠就會番屋企。」

新鮮感唔係同新人去體驗舊事，而係同舊人去體驗新事...我突然諗起呢句說話。

「奉勸你一句，唔好嘥時間係佢身上，佢hurt過好多女仔。」

「其實最嘥時間既人係你，被佢傷得最深既人亦係你。」我沖口而出。

Barbie沉默咗幾秒，然後昂高個頭，霸氣全開咁話：「點都好，總之你唔好同我鬥，因為我一定會贏到最後。」