男友出軌，我決定送26頂綠帽比佢: K for女僕cafe的一天 （3）

「唔知主人同大小姐想坐靠窗既位置，定係包廂既位置呢？」

「想坐係見到你既位置。」MK仔哄埋黎，好flirty咁話。

佢條女一記眼刀殺過黎。

喂，拈花惹草既係你男朋友，你睥我做乜鳩，我打份工啫。

係你面前都夠膽撩女仔，背後一定更猖狂，日日瘋狂食女。





「想睇風景既話，可以坐係靠窗位。」

我拎住個搖鈴，帶佢地去座位，最好離我越遠越好，免得一腔怒意燒上我身。

「我係今日為你地服務既Anita。呢個係我地既menu，最低人均消費係一杯野飲同一個小食，主人揀好之後，可以搖鈴搵我。」

「我叫阿Ken，呢個係我女人，你可以叫佢Barbie。 」

我仔細咁打量佢。





著到成身潮牌，一頭金毛，180厘米既身高，已經贏咗好多港男。唔開口又型又chok得起，一開口就係on9仔。

不過今時今日，話人on9，其實係讚緊佢，幽默好笑係一種技能，唔係咁易做到。

日子已經夠苦，過完今日唔知聽日會點，
同on9仔玩下笑下又一日，不知幾好。

「屌你，當我係玩具呀？」Barbie扮哂嬲，不過佢個樣擺明好受落。

「咁係咪可以幫你換衫先？」Ken望咗兩眼餐牌，「咁貴既，啲野食同快餐店無分別。 」





餐牌上面有「咖喱牛肉蛋包飯」、「漢堡配薯條」、「炸豬扒/牛扒」、「煙肉芝士意粉」，通通$120以上。

但呢度唔係快餐店嘛...

醉翁之意不在酒，呢度食既係視覺享受，要平咪去食雙餸飯。

就正如裝修靚既cafe，你可以話佢搵笨呃人錢，但人地既賣點係打卡，食物反而係次要；邊有得兩全其美。

「呢度既野食，全部都係我地自家製，出面食唔番呢隻味道，所以係獨一無二架。」我係咪要咁樣答？

「係咩味道呀？」

「家的味道。」家常便飯，求求其其，煮得難食唔可以嫌棄。





「哦。」

我鬆咗一口氣，好彩佢地收貨。

「你可以行埋一邊先。」Barbie勁唔客氣咁揮手叫我走。

「你想食乜？」Ken攬住佢。

「你中意。」

「食咗你得唔得？」Ken啵一聲，大大力錫咗Barbie一啖。

「我好貴架喎。」

「我食得起咪得。」





曬恩愛曬得咁高調，有無諗過其他人既感受。

不過我知佢地一定無，因為我都係過來人，沉浸過係愛河之中，眼中只有彼此，其他人都係路人甲乙丙丁。

我好妒忌。

個天真係唔公平，憑乜佢地可以咁幸福，而我就要一個人承受失戀既痛苦。

所謂情場如戰場，要愛就要搶。

會唔會，其實幸福係要自己爭取返黎呢？

內心有股強烈既破壞慾，好想拆散佢地，等大家一齊痛苦。





Ken懶係大爺咁既款 :「喂啊女僕，叫野食唔該。係咪要搖鈴架？」

鈴鈴鈴...佢搖咗成十下，成個場都望住佢。

「呼喚女僕！」

我心諗乜料，明明我就企係佢面前。

「主人，你有咩需要呀？」我刻意跪低，呢個角度，佢應該會望到我走光。

「我要呢個...呢個同埋呢個。」

「Coffee or Tea? 」

「一杯Cappuccino，一杯茘枝梳打。」





十分鐘後，我拎住佢地既餐，雙手遞上：「主人，你既午飯做好啦！」

Ken問：「係咪要施魔法架？」

「係呀，而家要施展一個令食物變得美味既魔法。主人要跟住我做。準備好未呀？」

「萌萌心動！（萌え萌えキュン！）」我舉咗個心型手勢，救命，好鬼中二病。

「Moemoekyun！」

「變好吃吧～！（おいしくな～れ」我手指轉咗個圈。

「左手定右手？」

「你平時慣用果隻手呀。」

「Oishikuna～re！」

我屈起姆指同食指，對準蛋包飯，做咗個發射動作。

Ken好認真咁話：「我有個問題。」

「係，主人有咩想問，即管開聲哦！」我笑得甜絲絲。

「如果我唔小心射錯地方，例如射咗落你個口會點？ 」

Barbie突然拍枱：「你兩個玩撚完未呀？ 」

望住佢呷醋，我有種前所未有既成功感。

不過呢個時候要扮可憐，激起男仔既保護慾。

我粒聲唔出，一臉無辜咁望住阿Ken。

「唔使理佢，我地繼續。」

「主人想我畫貓貓、兔兔定狗仔呢？」

「問你呀，要貓定狗呀？」Ken推一推Barbie。

「你自己食飽佢，我無胃口。」

「咁你中意咩呀？」於是阿Ken問我。

「我中意貓。 」

「咁就要貓啦。」

「可以呀。」我用蕃茄醬畫咗兩隻貓耳仔，再自作主張，係上面加多個小心心：「主人得到Anita既心，從今以後都會過得好幸福，你地慢用！」