男友出軌，我決定送26頂綠帽比佢: I for 校服的自述（1）

《綠袖子》響起。

「呢首歌既背後，有一個血淋淋既愛情故事。」講野既人背對著我。

「從前，有個叫亨利八世既國王，愛上咗一個叫安妮既平民少女。苦追八年先到手。」

「八年？安妮點樣留得住佢既心？」

「好簡單，只要唔同佢上牀，只要得不到，佢就永遠係國王心上既紅玫瑰。」





「咁到手咗之後...」

「到手咗，玩膩咗，咪送佢上斷頭台。」

「當初幾情深都好，最後咪又係一撚樣。」

男人拎住個斧頭，步步行近。

我突然覺得毛骨悚然：「你係邊個，點解會出現係我間房？」





「而家先問呢個問題，會唔會太遲？」

「你唔好行埋黎，我...」我望一望佢身後塊鏡，淨係見到啲虛影，見唔到佢，見唔到自己，發夢啫，快啲醒快啲醒...

跟住我就醒咗，嚇出一身冷汗。連發夢都聽到《綠袖子》，睇黎我壓力真係好大。

今日係考DSE既第四日。

中文卷，又稱死亡之卷。食粥食麵，係咪拎到大學入場券，就睇呢一鋪。求下耶穌，又拜下佛祖，千祈唔好失手。





去到考場，個個都頭耷耷溫緊書。

有人睇緊範文，有人記緊古今例子，仲有人背緊心靈雞湯一百句。

我無無聊聊咁繼續望。

仲有人...個側影好似丁家岐啊。

我眼定定咁望住佢。

打扮斯文，純情書生的模樣。

丁家岐邊忽斯文，邊忽純情。

形似神不似，唔係佢。





好彩唔係佢。我暗暗鬆咗一口氣。

冒牌丁家岐感應到我既目光，抬頭望向我，微微點一點頭，繼續專心溫習。

俾佢發現我偷望添。

「考試即將進行，請考生前往一樓禮堂。」

拎文具出黎，放準考證同身份證係枱面右上角，熄鬧鐘關手機，手袋放枱底。

監考老師宣讀考試須知。

我望一望隔離左右有乜人。左面係A貨丁家岐（又係佢，心裡暗爽xd)，右面係個眼鏡妹，前面空咗無人。





考試都可以遲到？

「...而家係x時x分，中文卷二作答時間為一小時三十分鐘，考生可以開始作答。」

都未睇，成份卷突然飄走咗。

我望住撞過黎既肥仔毒撚，一臉懵逼。

「對唔住...」佢喘哂氣，成身臭味汗，一個屎忽坐咗係我前面果位，彎低身幫我執番份卷。

屌，嚇到個心離一離。

題目一：我是一套校服，今日要和主人分離，回想過去我們一起生活，別有一番體會。以上是文章的開首，試以「校服的自述」為題，續寫這篇文章。

教育局係咪玩野呀？呢三年黎，唔係停課，就係網課，學都無得番，鬼有機會著校服。





「校服...主人...」前面果死肥仔唔知笑緊乜，揞住嘴，笑到卡卡聲，仲要越笑越淫，越淫越笑。

第二題：以「得不償失」為題撰文一篇。

見到呢個題目，我即刻諗起「有食唔食，罪大惡極」。

不過老師話，漫畫題好伏架。萬一捉錯用神，就好容易離題...

第三題：「與其一生專精一事，不如發展多元人生。」你同意嗎？

與其一夫一妻，不如妻妾成群。我當然不同意。

算啦，都係寫番最簡單既記敍文。





老師教過我地幾個作文技巧。

作文考試最忌有創意，亦唔需要文筆好，只需要扣題，堆砌幾個成語同修辭，例如：

我的眼淚馬不停蹄地流下來、我像是一隻沒有節操的麻將，每天都會被摸上數百次、我爽歪歪地陪著主人上學去......

回顧過去，展望將來，帶出正能量既中心思想，結尾例牌加番句：「我依依不捨地離開主人的身體，告別這美好而一去不復返的青春。」

總共寫咗1156隻字。

檢查完有冇錯字，仲淨番十五分鐘，可以趴係度，瞓番個靚覺。

一隻綿羊咩咩叫，兩隻綿羊咩咩叫，三隻綿羊咩咩叫...

「學生妹...」前面個死肥仔，寫寫下文，突然放低枝筆，左望望右望望，伸隻手入褲袋，chok咗三四下。見有考官行過，即刻拎張紙巾出黎，大大力呻鼻涕。

唔通佢想出貓？

佢硬住...頭皮寫咗幾分鐘，趁考官唔留意，又再伸隻手落褲袋，摷黎摷去。

呢個人，相當之有可疑。

唔知係咪睇咗張貓紙，佢突然靈感大爆發，係咁寫係咁寫，又唔知自己肥騰騰，每寫一個字，悲脊就撞我張枱一下。

剩番一分鐘，加速又加速，最後沖刺，成張枱就砰砰砰砰砰咁響。

宣佈停筆時，死肥仔好似虛脫咁，軟綿綿咁倒下。

我同A貨丁家岐互相對望，佢對我苦笑一下，我又對佢翻咗個大白眼。