男友出軌，我決定送26頂綠帽比佢: 未完待續的禁忌戀（上）

「余Sir平時好中意上IG。」

「係呀，我個個post佢都會like，有時仲會覆埋我既story。」我附和。可能係ABC既緣故，余Sir對個個都好熱情。同佢似係朋友，多過似師生，好玩得埋。

「係呢...所以我特登出咗個story，話有興趣學泰拳，問有無好拳館介紹。余Sir有教開人打拳，我知佢一定會應我。

果然，佢即刻秒覆。佢仲話，因為佢係教練，介紹我入去，有得畀我免費試三堂，當係玩下都好。

咁啱有個新開既timeslot，無乜人知道，所以我係佢唯一既學生。





「你著咗咩衫去呀？」每一次，阿瑩都會根據對方既愛好，去決定穿衣風格。佢可以係可愛純情既小白兔，亦可以係風情萬種既性感人妻。

「我著咗件bra top，同埋條yoga pant，出面笠件短T，化埋個ABC妝。

余Sir話第一眼認唔出係我，靚咗好多，仲話呢種風格幾襯我。」

「你覺得佢中意咩？」大波、細腰、長腿、翹臀、幼腳......每個男人都有特別既愛好。

「我覺得佢中意睇屁股。





做完一大輪熱身，已經出哂汗，我擰轉頭，對住塊鏡，係時間除件T-shirt落黎，仲要扮紮頭髮，等佢有多啲時間望。」

老師都係人，係男人就會昅女，屬於正常反應。唔昅果啲，一係就基既，一係就...昅咗你唔知啫。

「佢教我打拳，企係我後面，唔知佢係噴咗古龍水，定搽咗止汗劑，總之陣味搞到我意亂情迷，佢講緊咩，我完全聽唔入腦...唉，佢一定覺得我好蠢啦。」

「如果你唔係大波靚女，佢一定畀你激到吐血。」男人對住靚女先會有耐性。

「我諗都係。之後佢索性捉住我隻手，教我點樣出拳。佢啲胸肌真係好鬼勁，線條出哂黎，同埋我有借啲易貼埋去，feel到佢下面硬哂。」阿瑩講到好興奮。





「就係咁，我地每個星期都會見一次，有時係單對單，有時會有其他女仔係度。平時keep住係IG傾下偈，都係講啲無聊野。我發現我地都幾多共同興趣，中意睇絕命毒師、中意行博物館、中意食Omakase ......

碌IG見有間餐廳出咗Omakase，應該幾好吃，順手send條link畀佢，佢話不如一齊去食，我真係興奮到成個人跳起，因為係佢第一次主動約我，仲要係單獨相處！

平時都有男仔請我食飯，但感覺好唔同。佢會事先book好哂枱、又會放慢腳步等我、幫我拉凳放好外套、抹哂啲餐具、將好食既留俾我......我未遇過一個男人咁有風度，咁識照顧人。

果餐飯，佢講佢屋企既事，我又講我以前拍拖既野，好似一對普通平凡既情侶。本來無諗住要佢請，大家AA，不過佢話我打拳有進步，咁多個女仔之中，我打得最好，所以呢餐佢請。」

無啦啦請女仔食野，嫌錢多咩，仲要食Omakase應該都唔平，計埋小費要過千銀。

我用詢問既眼神望住阿瑩。

知我者莫若阿瑩也，佢估到我想問乜，打咗我一下：「無扑到野啊，去咗行海邊。」

自從畀丁家岐中出即飛，我就覺得男仔/男人無事獻殷勤，只得一個終極目的——呃女上牀，完事走人。





「好啦，咁係海邊有無咩浪漫既事發生？」

「行到出去，見盞綠燈眨眨下，我趁機捉住佢隻手，跑過對面馬路。本來以為佢會鬆開手，但係佢無，反而捉得實啲。

我一路行一路諗，其實我地係咩關係，點解我地會拖手，係咪代表我係佢既人。如果畀熟人撞到，我地兩個可能會身敗名裂...

冷冷既海風吹埋黎，吹醒咗我。都係算啦，佢係我老師，我係佢學生，講穿咗就係禁忌之戀，保持距離對大家都好，心知就得...同食Omakase一樣，享受既係果份期待，仲有對對方既信任。

果晚落住微微雨，條街無乜人，佢陪我等車。我地擔住同一把傘，距離好近好近。平時等半個鐘都無一架巴士，今次五分鐘就黎到，嗚呀真係激死人。

我同佢講，今晚真係好開心。佢話：我都係，下次再一齊食飯，番到去記得WhatsApp我。

仲有下次！仲可以一齊食飯！





我上咗車，部車閂埋門，余Sir企係巴士站，同我對望。我覺得佢望我既眼神，同望其他人唔一樣，好似特別溫柔。你覺唔覺得呀？」阿瑩突然問我。

「我點知呀，我又唔係現場。」

見佢有啲失望，我補返句：「佢多數叫我地英文名，但係會樂瑩樂瑩咁叫你。都算係差別待遇掛。」

「睇黎唔係我一個諗多咗。」