男友出軌，我決定送26頂綠帽比佢: 十八歲生日（下）

「如果你頂唔順，想抖下記得出聲。」Kiko提醒我。

紋身機規律既聲音又再響起，好似有把鎅刀係我鎖骨下游移，刺破表皮，將墨水注入，紋出一個個英文字母。

好幾次，Kiko停咗落黎，抹走滲出黎既血，然後繼續。

相比起分手既痛，呢啲小痛簡直濕濕碎。

我唔敢亂郁，大氣都唔夠膽抖一啖。





終於明點解啲人話紋身係一種會上癮既痛。

成個腦放空，乜野都諗唔到，內心好平靜，一心一意去抵抗痛楚。

拮拮地痛...猶如蟻咬，猶如貓抓，我唔會話係享受，但絕對唔係折磨。

嗯~痛快，痛並快樂著，應該係最合適既形容詞。

「可以啦！」





我企係塊鏡前面，左照右照，傷口位有啲紅腫，不過係我想要既紋身。

如無意外，呢個紋身將會伴隨我一生，成為我身體既一部分！

「過一過黎先！」

Kiko幫我個紋身影咗張相，再用保鮮紙封住果個位：「三個鐘之後就可以搣落黎，記得六個月內番黎搵我補色！」

「呢個紋身唔係永久架咩？」我問。





「係啊，不過有啲客會忍唔到痕，會去R個傷口，咁就可能會冇咗隻字，同埋會甩色。所以補下穩陣啲。」

「呢啲係紋身後要注意既事。」
- 避免直接塗抹肥皂在傷口上
- 勿喝酒、進食海鮮或辛辣食物
- 一個月內不能游泳, 浸浴, 桑拿,溫泉
- 一天需塗抹兩次專用修護藥膏
- 紋身復原期大約兩至三個星期

21天後，個傷口先會好番；同樣地，養成一個習慣只需21天。只要我唔去掂個傷口，唔去諗丁家岐，我個紋身就會無事，我亦可以走出失戀既陰影...應該。

「仲痛唔痛呀？」阿瑩幫我扣番好件衫。

「唔痛啦，係有啲攰啫。」出咗成身汗，消耗咗好多體力同意志力。





「咁我地去食野先。」佢拖住我隻手：「你阿媽知唔知道你去整紋身？」

「唔知架。」 先斬後奏，唔紋都紋咗，畀佢發現都吹我唔漲。

「咁如果佢問起...」

「咪話係印度彩繪，畫上去既，一年後就會自動消失。」

一年佢都唔記得呢件事啦。

「你曳呀你，幾時學識講大話架。」

「我頭先都同你講咗一個大話。」守住秘密唔講真係好撚辛苦，我深吸咗一口氣：「其實我同丁家岐分咗手。」

阿瑩收起嬉皮笑臉，以為自己聽錯：「下，咁突然既...幾時既事？」





「前幾日。」畀人飛好樣衰，所以我避重就輕咁話：「我地之間既感情一早淡咗。

扑野果時，我真係乜都feel唔到，更加唔使講高潮，身體好誠實唔會呃人...

而家佢話要分手，我反而鬆咗一口氣，因為唔使諗點樣同佢講。」

「所以其實係你飛佢，唔係佢飛你。」阿瑩幫我做咗個總結。

「無錯。」

「唔怪得你望落無咩野啦...如果你有野，我一定睇得出。」阿瑩認認真真望住我。

「我都覺得自己堅強咗，以前既我，一定會喊到七彩。」





我除咗識得講大話，仲學識咗點樣隱藏情緒，唔會乜都寫係面上。

變得更似一個大人了。

呢啲係咪所謂既成長呢？

「過咗去既野就由得佢，我地以後都唔好再提丁家岐。」我話。

阿瑩同我勾手指尾：「邊個提就要罰錢，一次十蚊。」

「係呢，上次你打電話畀我，好似有野未講。」

「我番咗學校。」阿瑩答我。

「又唔叫埋我地既？」





「我去同中意既人表白。」

「你去咗同余Sir表白？」因為太過驚訝，我直接衝口而出。

Oh shit ... 阿瑩冇同我講過呢個秘密，我係唔應該知道架。

「你又知？」阿瑩瞪大眼睛。

「我上一次係條街撞到你地。」

「咁你有無同詩韻佢地講？」佢急急追問。

「我無同人講過。」我同佢派定心丸。

嗯，所以丁家岐唔係人。

又難怪佢咁驚慌。呢件事充滿花生味，如果畀人發現，肯定會放上Secret，到時候不單止阿瑩會畀人停學，余Sir都會冇咗份工。

每間學校至少會流傳一個鬼故，我地學校都唔例外，係同師生戀有關。

話說N年前，有位男老師同個MK妹發展地下情，搞大咗人地個肚，後來男老師移情別戀，中意咗另一個女同學，MK妹太過傷心，於是係三樓女廁割脈自盡。

自此之後，女廁不時會傳出一陣幽怨既歌聲；而每段師生戀都好似受到詛咒咁，全部失敗收場。（雖然我好懷疑，呢個故事其實係校長作出黎既，目的係要打擊師生戀。)

「你地點開始架？」