男友出軌，我決定送26頂綠帽比佢: 十八歲生日（中）

「今日個天勁靚。」陽光燦爛，天空好藍，一舊雲都無。

「連個天都中意你。」阿瑩捧住一個大紙袋，「送畀你既禮物！」

Jo Malone 藍風鈴香水、白色連身裙、糖果耳環、Etude House化妝品套裝 ......

果然女仔最明白女仔想要乜禮物。

「多謝！」仲有張生日卡，留番搭車既時候先睇。





「丁家岐今日做咩唔陪你既？」阿瑩隨口一問。

「佢屋企有急事。」我含糊地帶過，應該仲未有人知道我地分咗手。

「咁重要既日子都唔係你身邊，下次要狠狠咁懲罰佢先得。」

「嗯。」我好清楚，已經唔會再有下次。

阿瑩突然諗起啲咩：「你黎M未？」





「吓？哦...黎咗啦。」

「好彩啫，幾驚你真係有咗。」阿瑩揞住心口。

我同丁家岐扑野已經係半個月之前既事...

「係呢，我地今日去邊啊？」

「去整紋身。」我好平淡咁話。





「無啦啦整乜鬼紋身。」阿瑩一副受到驚嚇的樣子。

「送俾自己既生日禮物。」

以前紋身既人，多數係黑社會，左青龍右白虎，一行出黎嚇死人。

而家時代唔同咗，著制服既未必係好人，紋身既亦唔代表係壞女孩──可能只係覺得靚或者型。

「洗唔甩架喎。你真係諗清楚架啦？」

「訂金都畀埋啦。」

「有無問過丁家岐啊？佢中意乖乖女。你突然改變形象...」

今日阿瑩做咩事，三句之中，有兩句都係關於丁家岐。





「我中意做乜就做乜，唔使理佢。」我一臉厭惡咁話。好彩戴咗口罩，阿瑩見唔到我個表情。

做乖乖女有乜用？

丁家岐出軌，我原諒佢。佢想扑野，我應承佢。

呃呃氹氹，到頭來，咪又係分手收場。

真係覺得自己好撚蠢。

我地去到廣場，左轉右轉咗幾個圈，先搵到間紋身店。

「要禁門鈴。」





一個藍紫色頭髮、綁兩條辮、望落幾得意既女仔出黎應門：「hi，入黎呀。」

佢既工作室燈色昏黃，擺滿動漫模型同卡通公仔，畀人一種家的溫馨感覺。

我地坐係沙發。

「諗好想紋短句定圖案未啊？」Kiko問。

上網睇過，啲人話唔好紋十字架、玫瑰同蝴蝶，因為太普遍。亦唔好紋同前任或者偶像有關既野，因為隨時會變。

「想紋Obliviate。」我驚串錯字，特登將隻字copy and paste落手機。

「好，你地等陣，我set好部紋身機先。」Kiko背住我地。

「呢個字有咩意思啊？」阿瑩好奇地問。





「你記唔記得哈利波特裡面有個咒語，叫空空，遺忘 ？」

「記得啊，可以消除記憶架嘛。」

「就係呢句咒語。」

「點解呀？」

「因為我想忘記唔開心既事囉。」

「紋咗之後，你會唔會唔記得埋我架？」

「梗係唔會啦，我同你一齊咁開心。」





「你揀咗個字體先。」Kiko坐番過黎。

「你個頭漂得幾好睇。」等我既時候，阿瑩開啟自來熟模式，同KiKo吹水。

「不過好快就甩色，又要去染過。」

「我都想去整。」阿瑩摸一摸佢把長直黑既頭髮。

「染完就無得翻轉頭架啦。」

「咁咪同整紋身一樣？聽講話會上瘾。」

Kiko嗯咗一聲，「有啲客好享受果種拮拮地痛既感覺。」

「我就唔敢啦。」阿瑩耍手擰頭。

「你地啱啱畢業？個樣好細個。」Kiko問。

「係呀，過幾日就考DSE。」

「仲有時間出黎玩。」

「生日喎，一年得一次。」

「我揀好啦。」我打斷佢地既對話。

「你諗住紋係邊啊？」Kiko帶我去塊鏡前面望。

唔同位置有唔同痛感，越少肉既地方，因為接近神經線，所以會越痛。

我解開衫鈕，指一指鎖骨下面個位。

呢個位，著吊帶、一字肩時，可以露個紋身出黎，正經場合又可以著密實啲收番埋。

Kiko用油墨打印字樣出黎，貼落我想紋果個位：「睇下咁樣o唔ok？」

角度啱，無斜咗或者跌咗落去，大小適中，係我想要既字體，冇串錯字，頭尾冇掉轉。

「可以啦。」

「咁你瞓落張牀先。」

我除咗鞋爬上去，拉低條裙，拉低埋條bra帶，露個膊頭出黎。

望住天花板，好似等緊做手術咁。

「我紋一粒點，畀你感受下。」

我點點頭。

Kiko拎住枝類似電筆既物體，滋滋聲咁響，下一秒，我覺得好似被針拮咗一下。

「ok嗎？」

「有啲痛，但係可接受。」

「有無人紋咗粒點就走咗去？」阿瑩問。

「有呀，不過訂金無得退。」

「咁...你繼續啦。」我話。