男友出軌，我決定送26頂綠帽比佢: H for Holiday (3)

九月十七日
「今日唔講野既？」Holiday奇怪地問。
「唔想講咪唔講。」我不是他的情人，有什麼資格生氣，但我還是好生氣。
「心情唔好？」
我沒應他。
「咁我教你打籃球啦。」
他不是在問問題，所以我無答到好定唔好。
他繞到我的身後，握著我的手。
我的心狂跳。
瞄準籃筐，輕輕一投，球便進去了。




「你陪我玩，你女朋友唔會嬲咩？」我轉過身，望著他的眼睛。
「佢都唔知。」他聳聳肩，一臉無所謂。
「呢個係我地之間既小秘密？」
「係呀，唔好同人講。」他對我眨眨眼。

九月二十日
「我琴日發夢見到你啊。」我側著頭，手放在背後，神秘地笑笑。
「發咗咩夢？」
「唔記得啦，總之係好開心既夢。」
「唔通係我送咗間糖果屋畀你？」




「唔係啦。」
「我將成副身家留畀你？」
「都唔係。」
其實我記得。在夢裡，我和他表白：
「我好中意你，一直都好中意。講俾你聽冇咩意思，只係想你知道。」
他想了想，突然來了一句：
「聽日中秋節，我要同屋企人食飯，應該唔會過黎。」
中秋節，人月兩團圓。
吃過晚飯後，他會跟女朋友一起慶祝吧？
想說又沒說出口的話，還是算了。





十月十四日
「你幾時生日架？」我想知道他的星座。
「今天咪係我生日。」
「我先唔信，你呃人。」
「你自己睇啦！」他把身份證遞過來。一看，真的是今天！
我算了算，他大我三歲。
「你唔准走，我好快番黎。」我跑到西餅店，用身上所有的錢，買了一件芒果蛋糕，插上十四枝蠟燭，點燃。
「做咩咁破費？」他既驚喜又意外。
「生日點可以無蛋糕架？」我笑瞇瞇地說：「你快啲許願先！就黎燒完架啦！」
「不如我將個願望送畀你？」
「可以架咩？」
「我話得就得。」
許願是件很嚴肅認真的事，一年只得一次。我雙手合十，閉上眼睛：「我希望我快啲大個，Holiday哥哥老得慢啲。」
「多謝你。」




Holiday在我臉頰上輕輕啄了一下。
這個吻太匆匆，乾乾的，我都來不及感受。

十月二十三日
「聽緊咩呀？」
Holiday把一隻耳機塞進我的耳朵。
是陳僖儀的〈蜚蜚〉。
「跟你懸崖上戀愛　其實有多精彩
全憑自欺欺騙我贏得到愛
危牆下的愛　承受太多悲哀
我恨我應該　放開 」
這是一首傷心的情歌。
我們默不作聲，一起看著橋下人來人往，他們細小如螞蟻。
懸崖比橋更高，一不小心踏空，大概會摔個粉身碎骨吧。
「你係唔係唔開心？」




「我同女朋友分咗手。」
「點解呀？」
「佢唔要我。」
「咁我要你。」我衝口而出。
「多謝你肯要我，凱婷妹妹。」他對我的表白一笑置之。
「我同同學成日絕交，第二日都會和好如初。」友情可以，愛情也可以。
我試著鼓勵他，給他希望：「話唔定佢聽日就會番黎你身邊呢！」
「你仲細個，唔會明白，完咗就係完咗。」他嘆了口氣。

十月三十一日
Holiday好幾天沒來打籃球，很想念他。
陳子俊說他人間蒸發了，或者被外星人擄走了。我才不相信。
我找遍每一個地方，球場、便利店、公園、他家樓下......都沒有他的蹤影。
或許他對我沒意思，所以才故意避開我，不再和我見面吧。





十一月一日
我應該忘記他，忘記他的名字，忘記他的模樣，忘記他的一切一切。但喜歡一個人，是不會聽任何人勸的，包括我自己。
我是不是很傻呢？

......

今晚得我一個，成間屋空蕩蕩，所以我無熄燈，但係唔熄燈又瞓唔著。

「Holiday Liu
Financial Planner」

佢張卡片，有陣淡淡既男人香水。

我輸入佢既WhatsApp電話。





我：好開心見番你

Holiday：我都係

我望一望鐘，凌晨4點17分。呢個鐘數，佢居然秒覆，睇黎又係一隻夜貓。

我：咁夜都未瞓

Holiday：聽日後日都放假

我：羨慕妒忌恨你

Holiday：你恨唔黎

Holiday：女仔唔好熬夜，殘得好快

我：識話人唔識話自己

Holiday：駁我嘴

我：講事實啫

我：不如聽日一齊食lunch？

Holiday：你起到身先算

我：再唔係咪食下午茶

Holiday：你而家瞓我咪應承你

我：聽你話

Holiday : 乖

我：你都早啲

Holiday : 快瞓

念念不忘，必有迴響，原來係真既。

我將卡片夾入日記本，擺係枕頭底，冚好被，終於捨得瞓覺。