男友出軌，我決定送26頂綠帽比佢: H for Holiday (2)

「我地係咪識得？」

我激動得係咁點頭，咩都講唔出。

Holiday面露疑惑，係記憶中進行搜索。

睇黎佢已經對我無哂印象。

我俾個提示佢：「我地以前成日係呢度玩架。你真係唔認得我啦？」





Holiday認認真真咁打量我。

我退後，側住頭，手擺係身後，大大方方咁俾佢望個夠。

「啊，你係凱婷妹妹。」佢好肯定咁話。

「係呀，好耐冇見啦，Holiday哥哥！」

「差啲唔認得你。」





「乜我好大變化咩？」我下意識摸摸自己塊面，早知道化個淡妝先落街。

「戴咗口罩吖嘛。」

「係喎。」我拍一拍自己腦袋，「你反而無咩點變。」

消失咗咁多年，佢仍然都係高高瘦瘦，成枝竹咁，自帶一股疏離感，我曾經覺得佢似座劈不開的冰山，好神秘。

「男仔係咁。」





咁難得先見番面，好想同佢繼續傾落下：
「你做咗檢測未呀？」

「中過，唔使做。」

「咁咪要同公司請假？」圍封一般會進行兩日，從傍晚開始，第二日既下午先會解封。

「我番保險，番工時間自己話事。」

保險？估唔到喎。做保險面皮要夠厚，唔怕俾人拒絕，又要好吹得水，仲要成日烚熟狗頭咁陪笑。

而我記憶中既Holiday哥哥，唔算好多野講，問一句先答一句。

「咁咪要應酬好多人？」





我成日覺得，應酬係一件好l麻煩既事。

平日有討厭既同學，要嘻嘻哈哈扮中意；有討厭既親戚，又要坐埋一枱。

「要啊，要陪客食飯。」佢好似唔多想講工作上既野：「你仲讀緊書？」

「嗯，今年考DSE。」

「咁預祝你一切順利。」佢雙手合十咁話。

「到時等我有錢，幫你買份保險呀。」我笑笑口，雖然我覺得保險呃人搵笨。

「呢張我既名片。」佢雙手遞俾我。

我提高聲線，嬌滴滴咁話：「你要好似以前咁照顧我啊！」





「一定啦，隨時搵我。」

同佢道別之後，好快輪到我做檢測。

姑娘拎起條棉棒：「可能會有少少痛。」

啲人話唔痛，姐係會有少少痛；話有少少痛，姐係會好痛。

我做好心理準備。

姑娘固定我個頭，隊枝棉棒入我個鼻。

推到某一個位，我以為已經係最入，點知仲要繼續入，係咁打轉打轉打轉，好似被水嗆親咁，又酸又痛。





不過如果無呢次圍封，我就唔會撞得番Holiday，所以幾痛都係值得既！

......

【以下內容摘自凱婷N年前的日記】

七月十八日
籃球場上來了一個男生，長得比陳子俊帥，明天還想繼續看到他。

七月三十一日
到7仔買撈烏冬配奶茶套餐，剛好他也在。這巧遇來得突然，我鼓起勇氣，直白地看著他，他似乎感應到我的目光，面無表情地看過來，我害羞得低著頭逃跑了。
但我很高興，他終於留意到我。

八月十五日
我有一個秘密：我有點喜歡他。我不會跟任何人說，因為說出口就不是秘密了。





八月十八日
等了好久，他還是沒出現。他生病了嗎？還是搬家了？有點擔心他。我的心情一片灰暗，我的世界沒了色彩。

八月二十五日
他的籃球砸向我，擦過我的耳朵，不算很痛。但我還是坐在地上，嗚嗚地哭了起來，奧斯卡影后都沒我演技棒。
他跑過來，摸摸我的頭：「對唔住呀，你有無事啊？」
聽到他溫柔的聲音，我連忙搖搖頭。
第一次的交集，讓我興奮得整夜也睡不著。

八月二十六日
Holiday拿著兩條牛奶樂，走了過來：「請你食，當係琴日既賠罪。」
我豪不客氣地撕開包裝紙，這是我應得的。
「你叫咩名？」
「我叫凱婷。你呢？」
「我叫Holiday。」
「點解你成日自己一個既？」我好奇地問。
「因為佢地一旦認識咗真正既我，就唔會中意我。」
但是認識你之後，我還是喜歡你啊。

九月二日
Holiday帶我到新開的夾糖店。
「不如你做我妹妹，好唔好？」
出於女生的矜持，我沒有立刻答應他：「做你妹妹有咩著數先？」
「我會好惜你架。」
「點惜法啊？」
趁著老闆不注意，他打開蓋子，飛快地抓了一顆紅色的心形糖果，塞進我的嘴巴。
甜甜的，大概這就是浪漫的味道。
「咁好啦。」

九月九日
今天他們打街場。
陳子俊問我：「你覺得邊個最靚仔呀？」說完，他用手指指著Holiday。把我嚇個半死。見奸計得逞，他露出一個壞笑：「睇下你，面都紅哂啦。」
真討厭。

九月十六日
在路上看到Holiday。
故意放慢腳步，拉開與他之間的距離，以免他突然回頭，發現有個小尾巴跟在他身後。
他的背影真好看。
穿著背心短裙的漂亮姐姐，在他家樓下等著。他一看見她，便笑著抱住她，抱了好久才肯放手。
原來他看到心上人，眼神裏會充滿了愉悅，面會一直紅到耳根去。
我討厭她，非常非常的討厭。