男友出軌，我決定送26頂綠帽比佢: 我們分手吧

第二朝瞓醒，丁家岐都係無覆我。

我知佢唔會無睇到，佢只係唔想應我。與其咁樣無了期地等落去，倒不如一刀兩斷。

我把心一橫，send咗個WhatsApp畀佢：其實我地係咪玩完？

今次佢即刻上線。

我望住佢頭像下面顯示「輸入中」，停咗停，又再「輸入中」，隔咗一陣又變番「在線上」。





個心不由得沉咗一沉。

丁家岐直接打電話過黎。

「做咩唔應機既，好忙咩？」我扮無野，明知故問。

「少少啦。」

「記得要抖下啊，唔好太辛苦自己。」我叮囑他，呢啲說話，好似好耐都未同佢講過。





「知道啦。你幢樓解封未？」

「解咗啦，今朝早收到檢測報告，話係陰性，姐係咩事都無。琴日個姑娘手勢都算好，無好粗魯，不過都係撩到有啲唔舒服。」唔知點解，我比平時多野講。

「咁咪好。」丁家岐頓咗一頓，「凱婷。」

我無視佢叫我個名，一輪嘴咁講落去：「啊，係啦，你知唔知啊？三哥又出番鴨血米線啦！不過今次無豆卜，得番油條。啲人話油條太油，豆卜吸湯，會入味啲。不如我地下次去試 ......」

我好希望佢話好，同我講，我地之間乜事都無，係我諗多咗。





「凱婷，我有啲野想同你講。」

我深吸一口氣。要黎既始終都係會黎，避無可避。

「你講啦。」呢排佢對我咁冷淡，我大概都估到咩事。

「你聽完可能會唔開心。」

我條件反射咁笑咗一笑，笑完先諗起佢見唔到我既表情。

我嗯咗一聲，都係果句：「你講啦。」

「我同你一齊咗咁耐，有過好多美好既回憶。呢四年黎，有你做我女朋友，我覺得好好彩，已經用盡畢生既運氣。」佢諗咗諗，又補多一句：「多謝你同我呢個傻仔一齊成長。」

聽到呢度，我已經鼻頭一酸，眼淚流落黎。屌，佢都未講分手，我做咩喊定先？





「我唔想呃你，亦唔想hurt到你，驚你覺得我係個中出即飛既渣男。所以我都諗咗好耐，唔知點同你講好。」

「所以你呢幾日先係咁避開我？」

「係，我成個腦都好混亂，唔知自己想點。」丁家岐答得好乾脆。

「咁你而家諗好未？」

我覺得我好似被判凌遲處死既犯人，畀人一片一片咁割啲肉落黎，好痛，但係死唔去，仲等緊最致命果一刀。

「最近忙溫書，無咩時間陪你傾偈，咁我都feel到你唔開心。但係呢個時候，我真係無咁多精力去應酬咁多野。我都好辛苦好大壓力。」佢語氣沉重咁話。

要用到「應酬」呢兩個字，姐係證明佢好唔情願陪我。





同埋我都無逼過佢。

「你係咪覺得我煩啊？最多我煩少啲你，畀多啲時間你溫習...」我腦袋一片空白。

「就算勉強係埋一齊，我辛苦時你又唔開心，為乜啫，對你都無好處既。」

「

「不如我地暫時分開，等考完DSE先再算？」見佢唔出聲，我又退一步。只要唔講分手，一切就有挽回既餘地。

大家都靜咗，無講野，聽住嗚嗚既電流聲。

「我諗我地都係做番朋友好啲，我唔想畀假希望你，嘥你既時間。就算考完DSE，我既決定都唔會改變。Sorry。」

我個腦好似畀雷劈咗一下，無咗反應。





咁姐係溫書只係一個藉口。

「做情侶唔好咩，點解要做番朋友？」

「Sorry啊...」

好多情侶一畢業就分手。我以為我地會係例外，點知都係避唔到呢個結局。

過咗大概三十秒，丁家岐喂咗一聲。

我追問：「我想知點解。你係咪中意咗第二個女仔？」

只有傷得我夠深，我先可以完全死心，徹底咁清醒過黎。





佢沉思咗一陣：「你真係想聽真話？」

「係呀。」我握緊條耳機線。

「同你一齊，我好似湊女咁，成日擔驚受怕，一時驚你蕩失路，一時驚你唔知整親邊度。我覺得我對你已經無咗以前既感覺，淡咗，只係淨番責任。」

佢從來無同我講過。

「我可以改架...」我擦走臉上既眼淚鼻水。明明之前佢話中意照顧我，點解而家變咗係我既錯。

係唔係只要唔愛，所有優點都會變哂做缺點，連呼吸都係錯？

「傻妹，你唔使改，做番自己就得。希望你會揾到一個比我更好，更識照顧你既人。對唔住 。」

「......」

「一個人，要好好照顧自己，凍要著外套，落雨要戴遮，黎M唔好食凍野，我以後唔提你架啦。」

「你仲有冇其他野要同我講？」完了吧，如無意外，今次應該係我最後一次同佢講電話，我想再聽下佢把聲。

「要俾啲心機考DSE，我地一齊升上大學！」

一齊？呢個字眼深深咁刺痛我。從此以後，佢還佢，我還我，我們會各自升上大學，但係唔會一齊升上大學。

我乜都無講就收咗線。