男友出軌，我決定送26頂綠帽比佢: 耍廢日常 (中）

「喂？我到啦。」

「過緊黎，俾多五分鐘我。」丁家岐答。

「你慢慢啦。」

今日成三十幾度，行入商場涼下冷氣先。

漫無目的咁行過一間又一間舖頭。





間間食肆都八折外賣，化妝品店靜到拍烏蠅，藥房最好生意，有啲人拎住快速測試，有啲人拎住必理痛，四五盒咁行出黎。

經過一間文具店。

有隻狗仔筆袋，長耳仔，大眼睛，好可憐咁跌咗落地。

同陳子俊送俾我果隻一模一樣。

我執起佢，將佢塞去無人睇到既角落。





其實我佔有欲都幾強架，對人對物都係，屬於自己既野，唔想俾其他人掂到。

「打劫，咪郁！」有隻手蒙住我雙眼。

「拎哂啲錢出黎！」

一聽就知係丁家岐。

「連刀都無一把，咁無誠意架你。」我擰轉頭，抓住佢，嘻嘻一笑。





「驚整親你嘛。」佢攬住我條頸。

「咁食河粉定米線吖？」

「不如今日玩煮飯仔？」丁家岐手上拎住幾個Taste既膠袋。

車仔麵、海南雞飯、石鍋拉麵、吉列炸豬扒飯......我前日先同佢講完，日日叫外賣食到厭，啲野又多油又多味精。

親自下廚又幾新鮮：「好啊，你識煮野食架咩？」

「學咪識，難食唔準嫌棄架。」

「嗯，唔會啦。」

上到屋企，第一件事係除口罩（平時係屋企係除bra），第二件事係洗手噴衫。





「使唔使幫手？」我伸個頭入廚房，見丁家岐研究緊YouTube個食譜。

其實應該都幫唔到啲乜，由細到大，我煮過最成功既菜式，第一係肉丸雞翼通心粉、第二係蕃茄炒蛋，第三係午餐肉蒸水蛋。

叫做食得飽，餓唔死，毫無技巧可言。

「咁你幫我切蘑菇同火腿啦！」丁家岐幫我綁好條圍裙，遞把刀埋黎，煲定水煮意粉。：「要落1茶匙既鹽...」

「切條定切粒呀？」

「你中意啦，小心唔好切到手。」

「知啦。」老師教過，切野既時候，左手手指要屈曲，手掌貼住砧板，右手刀尖向下。





N年未入過廚房。

丁家岐望住我疊好啲火腿，無啦啦係度笑。

「係咪傻架你？有咩咁好笑。」

「我諗番起有次你同符詩韻差啲炸咗學校個廚房。」佢企係我後面，搭住我隻手，同我一齊切。

「佢囉，掛住去溝仔。」

同詩韻一組上家政堂，明明講好佢睇火，點知佢去咗隔離位吹水，我又去咗廁所，一返到黎，發現魚柳炸到變咗舊碳，成間房都係煙。

「聽講最後要出動滅火筒滅火？」

「邊有咁誇張。係個天花板黑咗啫。」我若無其事咁話。





「鄧太有無嬲呀？」

「佢同我地講經，話咩女仔一定要識煮野食，三餸一湯，抓住男人既胃，先可以抓住佢既心。」

但我又唔覺。

我地四個之中，魚蛋煮野食最叻，又唔見佢抓到邊個男仔既胃；詩韻整埋啲暗黑料理，照樣能夠收兵養性。

可見呢個時代，男仔係唔會只因為廚藝而中意一個女仔。

「唔使你識煮野食，」丁家岐錫咗我耳仔一啖。

我以為佢下一句會話：「我煮俾你食咪得。」





點知佢話：「唔好炸爛我個廚房就得。」

「頂你！」

丁家岐跳開，撈番起啲意粉上黎：「鄧太出過一句金句。」

「咩呀？」

「之前有人手多，將個麵粉篩拋黎拋去。激到佢大大聲咁話：唔好整爛我個篩呀！之後成班笑到收唔到聲。」

「有咩咁好笑呀？」我一時get唔到。

丁家岐伸手去撩撥我下面：「宜家明未呀？」

唔好整爛我個篩。

「你地啲男仔，咩都可以諗歪既。」我臉紅紅咁加番句：「唔好整爛我個西呀。」

佢地中意聽呢啲。

果然，丁家岐笑出了聲。

佢一臉滿足，走去煎牛油。平底鍋發出滋滋聲，舊牛油溶化散開。

我將急凍蝦既包裝袋剪爛，倒哂落去，再倒埋啲切好既蘑菇同火腿。

「你幫我開罐頭湯呀。」

「好。」我雞手鴨腳咁拎起個開罐器，開開下，突然「啊」咗一聲。

丁家岐即刻放低個鏟，好緊張咁問：「做咩事呀？」

「好似鎅親。」畀忌廉雞湯既邊鎅親，流到成手都係血。

「你個傻妹，冇咗我點生存。」

丁家岐幫我止血：「廚房太危險，你都係番出去啦。」