男友出軌，我決定送26頂綠帽比佢: 耍廢日常 (上)

放Study Leave，放到生理時鐘亂哂，中午十二點起牀，夜晚四五點先瞓覺，過住日夜顛倒既生活。

以前有好多測驗好多功課好多留堂好多補習，做到人都就黎傻。宜家時間多咗，無人篤促，反而覺得人生好空虛。

「啱啱先起身？」丁家岐打電話俾我。

「嗯。」我打咗個呵欠。

「懶瞓豬。」





「明明已經瞓足九個鐘。」

「可能關天氣事掛，我最近都無咩精神。」

「應該係啦。」三月回南天，屋企四埲牆都出哂水。

「你幾點過來呀？」自修室同學校都無開，有時我會上丁家岐屋企溫書，有時佢過黎我屋企溫書。

今日阿媽放假，所以我過去。





「宜家出門啦。」

「咁你就到打俾我，我落黎接你。」

「嗯。」

可以見丁家岐，成為我起牀既最大動力。

......





有人在家工作，有人失業，細路匿係屋企打機，連老人家都唔去捉棋飲茶。

成條街水靜河飛。

我行去小巴站，等等下車，有人拍我膊頭。

「胡凱婷？」

「陳子俊！」

對上一次同佢講野，鬧得不歡而散，已經係幾個月前既事。

佢好似有啲野唔同咗。

「你換咗個髮型喎！」我驚呼。





之前係順毛乖乖頭，宜家變咗韓式中分頭。

陳子俊摸下自己既瀏海：「好睇嗎？」

「望落大個咗成熟咗。」

「咁就好啦，幾驚你話唔好睇。」

咁在意我既睇法，唔通佢仲中意我？唔知點解，我有啲暗爽......

陳子俊企係我隔離，無離開既意思，應該都係等緊同一架小巴。

「近排點呀？」陳子俊問。





「咪又係咁。」成個世界好似停頓咗，仲可以點。

「溫書溫成點呀？」佢又問。

「望咗當溫咗囉。」第二朝就唔記得哂，又要重新溫過。「你呢？」

「求其揭下，睇唔明放棄，出街玩好過。」陳子俊一臉滿不在乎，「今年都唔知學咗乜鳩野。」

「我諗個個都係咁上下。」

「DSE係拉curve，只要全港考生都唔知自己學咗乜鳩野，咁就無問題。」

我點點頭。

都話佢成日講埋啲似是而非既歪理。





又等咗十幾分鐘。

前面既阿伯同師奶等到唔耐煩，開始鼓噪。

「點解咁耐架？」

「等咗20分鐘啦。」

「平時5分鐘就有一架車。」

「啲司機係咪中哂Omicron呀？」

「我飛的，車埋你？」陳子俊行前幾步，伸手截停咗架的士。





「好啊。」

「司機，先去淘大花園，再去九龍灣地鐵站。」

「收到。」

「你又知我去淘大？」我問。

「丁家岐唔係住淘大咩？」佢反問我。

佢居然仲記得。

我笑咗一笑：「飛的咁富貴，好趕時間咩？」

「約咗人。」

「邊個啊？」講啲唔講啲，神神秘秘，都係想我追問啫。

「女朋友。」

女朋友？佢幾時拍拖架？

我呆咗三秒，以為自己聽錯：「你拍拖啦？」

「係呀，咪同Cecilia囉。」

Cecilia係焰王既副主席，之前都聽過佢地既緋聞，估唔到係真既。

男才女貌，日久生情，又幾順理成章。

莫名其妙有點失落。

雖然我對陳子俊只係朋友果種中意，但係我幾享受佢中意我既感覺。

我唔想佢屬於第二個女仔，我只想佢心中永遠有我。

咁樣既諗法，係咪好自私呢？定係個個女仔暗地裡都會咁諗？

陳子俊望住我，好似觀察緊我既反應。

我唔想顯得太在意，故作淡定咁問：「無見你係IG出post既？」

咁低調，唔似佢作風。佢唔係習慣話哂俾全世界知架咩？

「啱啱先一齊，穩定啲先再算。」

「話時話，佢係你初戀喎。出pool要請食飯呀。」我講玩笑咁拍一拍佢。

「咁要睇下初戀既定義係咩。」

初戀，有人話係第一個心動既人。有人話係第一個拖手親吻既人。有人話係第一個交往既人。

「咁係咩呀？」

陳子俊靜咗，好似係度諗緊野，最後揮一揮手：「算啦，唔深究。」

「當初選學生會選得咁落力，都唔知為咩。」佢喃喃自語。

又話係為咗我先去選既？轉過頭就同咗另一個女仔一齊，男仔講野果然唔可信。

「至少都識到個女朋友呀。」

「Ceci好似好中意我，我見到佢會好開心，同佢有好多話題，但係好似...無果種非佢不可既強烈感覺。」

聽到呢度，我反而有啲開心。首先，佢應該係仲未放得低我，所以先唔可以完全投入。

其次，佢信任我，先會同我講心底話，同細個果陣一樣。

「你地一齊咗幾耐呀？」

「半個月啦。」

「感情要時間培養既，時間咁短...」

「到啦。」的士佬好突兀咁打斷我地：「呢度唔停得，你地邊個落車呀？」

我望咗的士佬一眼，又望下陳子俊，推開車門。

「祝你幸福。」

「你都係。」

話雖如此，我都係衷心咁希望，我係佢心目中既地位，無人可以取代到。