男友出軌，我決定送26頂綠帽比佢: 耍廢日常 (下)

我上過丁家岐屋企好多次。

一齊去Ikea揀既香氛蠟燭，貼滿我地合照既牆身，萬年都唔執既灰色牀鋪。

統統都再熟悉不過。

「你睇下Netflix有咩啱睇。」丁家岐大叫。

「哦！」次次想揀套電影睇，但又驚中伏，睇埋啲爛片嘥時間。





「遙控係邊啊？」

「你搵下啦，應該係沙發，或者櫃旁邊。」

分類入面又再有分類，睇簡介，揀黎揀去，都好似未有心水。

「你想食煎蛋定炒蛋啊？」丁家岐打斷我。

「炒蛋。」





「咁我溝牛奶落去，你要唔要？」

「好啊。」

算啦，唔揀啦。

我坐係沙發，聽住筷子係碗上咔噠打圈既聲音，望著丁家岐煮野既背影，好認真好專注。

又多一個我中意佢既理由。





可以一齊玩煮飯仔，一齊煲劇，一齊細聲講大聲笑。

好有家的感覺。

有朝一日，我地會結婚生仔，會照顧對方一生一世，會有屬於自己既屋企，都會咁樣過日子吧？！

唔知點解，我好想影低呢一幕，留個紀念。

丁家岐拎住個平底鑊行出黎，笑得好燦爛：「開餐啦！」

見到佢笑，我又跟住笑。

我叉起啲意粉，捲啊捲：「好似好好味咁！」

「好甜啊！」





「因為係我煮俾你食架嘛！」丁家岐自己食咗一啖，皺起眉頭：「哇，甜撚到。」

我忍唔住笑出聲：「你係咪落錯咗糖啊？」

「可能係啦。」

丁家岐轉移話題：「你個傻妹，食到成嘴都係啦。」

佢搵紙巾，抹走我嘴邊既忌廉汁。

最後，我地食哂全部意粉，甜到扑街，灌咗成樽水。

我攤係沙發，摸下個肚，滿足得不能再滿足：「好飽啊。」





丁家岐推開小飯枱，拍一拍大髀：「咁歇下先。」

我將個頭挨落去：「咩都唔想做。」

唔想郁，唔想溫書。

淨係想瞓係佢大髀。

「我都係。」

電視台喋喋不休咁報道新聞。

「本港新增29,381宗新冠確診個案，網上呈報個案，則有10,493宗。過去一日有196名新冠患者離世...」

「點解成日播埋啲死人新聞架？」我問。連續幾個月，每朝起牀，一打開電視，總會聽到冷冰冰既數字。





難免覺得低落。

「因為真係日日有人死吖嘛。」丁家岐理所當然咁話。

我曾經以為，香港係好安全既城市，死亡係好遙遠既事。

「估唔到呢個病毒咁有殺傷力。」

「無論係打咗針，定係未打針既，都有機會中招。」

「你驚唔驚呀？」

「驚得咁多咩。」丁家岐摸摸我塊臉：「我地轉台睇其他啦。」





「係烏克蘭既街頭，滿佈被俄軍炸死既平民屍體...」

戰火紛飛，生離死別，地球既另一端被炸爛。

「點解俄羅斯要打仗？」我對烏克蘭近乎一無所知。

「因為烏克蘭想加入北約。」

「北約係咩黎架？」

七千公里外發生既戰事，我其實興趣不大。畢竟，我修讀既係中史，又唔係西史。

不過，我想聽丁家岐同我解釋。

「美國組咗個聯盟，自己做大佬，收咗幾條靚。一個有事，其他人都要幫拖。」

我哦咗一聲，「仲以為唔會打得成。」

「普京癲架嘛，佢想做第二個希特拉。」

「咁你覺得邊個會贏？」

「唔知呢？烏克蘭掛。」

「烏克蘭都幾慘，無人肯幫佢。」

「俄羅斯得罪唔起。」

「前幾日收到政府個警報，仲以為係俄羅斯打到黎。」我笑住咁話。

嚇到大家就快屎尿屁都飛哂出來，係IG、Facebook、討論區瘋狂洗版。

「唔出奇架。話唔定聽日一個導彈射落黎，香港就無咗啦。」丁家岐合埋手指，做咗個降落手勢，停留係我心口。

「吓？你講真架？」我過於驚訝，成個人坐咗起身。

「講下啫。」

於是我繼續瞓番係佢大髀。

丁家岐又轉咗個台。

「日本東北地區發生7.3級地震...」

「唉，又天災，又人禍。」日日都有人死，個個都好撚慘。

「可以生存，已經係好幸福既事。」丁家岐突然哲學家上身，懶係文藝咁話。

我由下至上定睛望住丁家岐，係佢棕色既眼珠中見到自己既樣。

「咁你覺得，同我一齊幸唔幸福呀？」我九唔搭八咁問。

丁家岐塢低身，輕輕錫咗我額頭一啖：「你話呢？」