男友出軌，我決定送26頂綠帽比佢: G ： G奶擒拿手 (1)

瞓到迷迷糊糊，覺得有啲凍，轉側，想攬住丁家岐。

空無一人。

佢唔係我隔離。

冷氣吹到張被涼浸浸，牀上只得凌亂既皺褶。

浴室既門虛掩，隱約有微弱既燈光，仲有一個晃動既人影。





三更半夜唔瞓覺，丁家岐係度做緊咩呢？

我推開張被，輕手輕腳行過去。

只見丁家岐拎住部手機，劈裡啪啦打咗一大段字，臉帶笑意，屏幕既光照係佢面上，有種說不出既詭異。

「你同邊個傾緊計呀？」我聲音不自覺地顫抖。

丁家岐既笑容，因為我既出現而一下子消失：「朋友。」





「朋友會傾到咁開心？」我質問。

「開心過同你。」佢細細聲咁話。

「你講咩話？」我難以置信咁望住佢。

見到丁家岐迎視我既目光，眼神中有挑釁，我就知我無聽錯：「你點可以咁同我講野？」

丁家岐臉色一沉，舉起手機：「你做過咩，自己心知肚明。」





我頓時有種不祥預感。

佢應該係講緊我刪走Nicole訊息既事。

「你同Nicole係咪有路？」我情緒好激動，似個失控的死港女。

「喂你細聲啲啦，呢度酒店黎架，個個都瞓哂。」

「你答我先！」

「講極你都唔明，都話我地只係朋友。」丁家岐唉了一下，講到有啲忟忟地：

「你唔中意我同Nicole傾偈可以出聲，但係偷睇我私隱就係你唔啱。你講野都唔用腦既，咩叫著三點式最好？Nicole唔係啲咁既人，快同人道歉啦。」

明明係佢做錯事，惡人先告狀不登止，仲要幫住個外人黎鬧我。





我既怒氣徹底爆發：「我先係你女朋友！」

「女朋友又點呀？我隨時換一個都得。」丁家岐毫不退讓。

「你去搵佢做你女朋友囉。」我氣在頭上，說話不經思考。

「咁我地分手吧。」

「鈴鈴鈴......」鬧鐘響起。

我擘大眼，瞓係丁家岐既胸膛上，佢隻手臂壓住我既頭髮。

夢裡雞飛狗走，夢外相愛無事。





好彩只係一場夢。

之前係「十萬個激嬲女友的理由」既IG post，見到好多類似既經歷。

「女朋友夢見我出軌，佢嬲咗我。」

「女朋友夢到我有第二個，佢嬲咗我。」

「女朋友夢到我唔鍾意佢，佢嬲咗我。」

當時我仲笑果啲女仔無理取鬧。

宜家我終於明點解。

明知係假，但係夢入面虐心既感覺，會一直蔓延至現實，抑壓得叫人透唔到氣。





我坐起身，仔細望住丁家岐。

佢仲未醒，瞓得好沉，嘴邊掛住滿足既笑容，成個細路仔咁。

有人講過，男仔平時既成熟，都係扮出黎既。只有係中意既女仔面前，先會放低偽裝同戒心，展現孩子氣既一面。

我撥好丁家岐額前既碎髮，喃喃自語：「我永遠都唔會嫌你無聊。」

今日星期一，要上Zoom堂。

一向習慣將個鬧鐘較早 20 分鐘，感覺上可以訓耐d 。既然仲有時間，就俾佢繼續瞓，我去梳洗先。

去廁所、刷牙、洗臉......





弊，唔記得帶面霜。

我打開鏡上既櫃，諗住碰下運氣。日霜夜霜、洗面奶、護手霜、10ml細枝裝香水......酒店果然有好多全新未開封既試用品，可以隨便使用。

仲有一本書。

放係最下格，叫做「是咁的，我係個專呃女讀者既作家」，作者叫G奶擒拿手。

一睇個名，就知係連登定高登既鹹濕小說，啲劇情離哂地，專門for男性打飛機，滿足佢地既性幻想。

開房贈送鹹書...又幾合理。不過本書封哂塵，似係俾人棄置係度。

我求其揭兩揭，扉頁後面有段手寫字：「G奶擒拿手到此一遊。無錯，我就係呢本書既作者。驚唔驚喜意唔意外呢？如果你睇到呢段文字，恭喜你，你將會成為我小說既下一個主角（只限女生 )。快啲上我IG，同我展開激情對話吧！等你！」

又幾有意思。拎出去俾丁家岐笑下先。

「咦？你醒啦？」

丁家岐碌緊手機：「快啲入番被竇啦，俾我攬下！」

「當我係公仔呀 !」

「無錯，手感一流既公仔。」

我一個枕頭飛過去。

丁家岐精準地接過，墊高黎坐：

「係喎，Nicole叫我唔該你。你地傾咗咩呀？」丁家岐莫名其妙咁問。

「無呀，幫佢揀衫。」我含糊帶過：「你睇下我執到咩？」

我遞本書俾佢。

「哦，G奶擒拿手，呢本小說佢自資出既。」

「你睇過？」丁家岐居然會知？

「佢係N年前既講故台寫手，唔算好出名，專寫甜文，我都有追開。」

「點解叫甜文唔叫鹹文？」

「好聽啲掛，我都唔知。」

「佢宜家仲有寫呀？」

「時不時啦，條友周圍呃蝦條，俾人踢爆咗。」

「佢人品咁差，你又睇佢啲書？」

「好睇吖嘛。」

「所以呢本書係真人真事改編？」

「唔知啊，係都唔出奇。寫《嫖一次》既張飛人會北上叫雞，《殘忍的偷戀》你聽過架啦，果個小姓奴偷食兼拋妻棄子呀。

總之好似寫甜故既，都會寫到自己一身蟻，無一個有好收場。」