男友出軌，我決定送26頂綠帽比佢: 半糖情人節 （下）重寫+新的內容

侍應幫我地換咗隻乾淨既碟：「安格斯牛扒配鵝肝，兩位慢用。」

五成熟，帶有些少血絲。

「Cheers!」我同丁家岐碰杯。

丁家岐將塊扒切到細細舊，餵黎我嘴邊，用「男友視角」幫我影相：「小心燙到嘴啊。」

外焦內嫩，口感一流。





「你唔食啊？」

「打埋個caption先。」丁家岐讀出黎：「2018年，溝到女後第一次鋸扒、第一次飲酥皮湯。」

「觀塘工廈果間？」我問。

「係呀。」

「果度既扒無咩特別，不過個龍蝦酥皮湯真心正。」





「所以做咗一年咪執咗笠。」丁家岐苦苦思索。對於佢呢啲非文科出生既人，諗caption應該難過登天。

我一邊食，一邊望出窗睇風景。

夕陽既余暉，好似金粉咁，灑落係維多利亞海上，照得來往既船隻閃閃發光。

望住靜謐而迷人既景色，我諗起F.4果年，要做SBA。老師規定我地要睇一本張愛玲既小說，然後寫700字讀後感。

睇書？我有咁既時間，不如同丁家岐出去玩仲好過。





所以，每一次做閱讀報告，我都係上網搵作者生平、睇下故事簡介、參考其他人既閱後心得，再樣樣都抄少少。

本書講咩我已經唔記得，唯獨係對呢一句好有印象：現世安穩，歲月靜好。

應該就係形容緊呢種時刻。

丁家岐死諗爛諗，終於諗到一句：「2022年，身邊還是那個她。 」

侍應行過黎：「打擾兩位，我地既用餐時間至到6點。請問仲有無last order?」

丁家岐搖搖頭。

「呢張係你地既帳單，甜品陣間會上。」

係喎，唔記得限聚令規定六點後禁堂食。





番學要趕巴士，做功課要趕deadline。宜家食飯都有時限。

會不會連幸福都有時限呢？

丁家岐打咗個響指：「食野先啦。」

「嗯。」

KO咗個扒，輪到最期待既甜品。

今日個甜品係黑松露雪糕。隻碟好鬼死大，舊雪糕就手指尾咁細。丁家岐推過黎俾我：

「好野要留番俾你。」





我聽到好冧，加上個雪糕甜到入心，頭先既不安頓時煙消雲散。

「你想番房定出去行下？」

「出去！」想去海邊吹風。

我企起身，行咗一步，好似踩緊棉花。

「係咪飲醉呀？」

「唔係，我無醉，你先醉。」我拍一拍丁家岐塊面，推開佢，努力想行出一條直線，不過行極都係歪歪斜斜。

「傻豬。」丁家岐跟上黎：「我地番房歇下先。」

「本公主要你抱。」我除低對高踭鞋，掟埋一邊，向佢伸出手臂。





丁家岐捻一捻我紅卜卜既面珠墩，孭起我，驚我跌落黎，抱實我屎忽：「真係難服侍。」

「可以服侍本公主係你既榮幸。」

成個人飄飄下，個身好㷫，心跳快得唔正常。

嗯，丁家岐條頸白雪雪，好好聞。

我攬實佢條頸，輕輕留下一個唇印。

我要係佢既身上，留低我既痕跡，宣示主權，費事佢俾其他女仔搶走。

返到房。





佢放我係牀上，我醉眼迷濛望住佢。

「你呢個樣好誘人。」

「咁過黎陪我。」我捉住佢隻衫袖。

丁家岐拎起我隻手錫咗一下：「你瞓下先，我成身汗，沖完涼再出黎炮製你。」

「好啦。」

我望住天花板，任由靈魂飄浮。

飄下飄下，又浮下浮下，丁家岐部手機突然震咗三下。

佢部手機擺係床頭叉緊電。

我反轉一望，「訊息：鐘幸兒（3）」

係Nicole。

根據不成文既社交規則，熟既人先會響全朵，唔熟既人叫英文名。佢地變得咁熟架？

佢頭先係咪一直同Nicole傾緊計？

點解Nicole要係情人節搵佢？

我知情侶之間應該互相信任，唔應該偷睇。

但係佢有前科。

廁所傳黎水聲。手機係我手上。

最終，我就好似潘朵拉咁，敵不過好奇心。

丁家岐既手機密碼係我生日日期。

我輸入，解鎖成功。

睇咗就會顯示為已讀。係咪真係要繼續？

唔理啦，今晚我飲醉，我大哂。對於醉後所做既一切行為，恕不負責。

我點開。

鐘幸兒：邊條裙靚啲呀？

第一張係自拍，淺紫色西裝，裡面有件抹胸，佢趴係牀頭，個身微微塢前。

第二張係全身照，黑色短裙黑色靴，坐係牀邊，翹起腳，不經意露出雪白既大脾。

出盡渾身解數，呢個小賤人，仲唔係想勾引我條仔？

橫掂唔睇都睇咗，咪順手覆埋佢：「呢個問題你唔應該問佢，應該問我。」

想露腰露胸露大脾，可以著三點式，一次滿足哂你三個願望。」

我等咗陣，手機無再響過。

既然我已經回答咗佢既問題，丁家岐都無必要睇到呢兩張圖片。

我將頭先既對話一一刪除。

「凱婷，瞓咗未呀？」丁家岐打開門問。

我俾佢嚇一嚇，手機都跌埋落地，即刻撻番落牀扮死屍。

「我冇咁頭暈啦。」

「幫我拎部手機入黎吖。」

「好啊。」我執起部手機。

咪住先，萬一Nicole係呢個時候回覆，咪會俾丁家岐發現我做既「好事」？

唔得，要轉移佢注意力先得。

我閃入廁所，反手閂埋門。

「我部手機呢？」

「唔準玩。」

「點解呀？」丁家岐明知故問。

「因為我要你今晚淨係屬於我一個。」