男友出軌，我決定送26頂綠帽比佢: 半糖情人節 （上）

情人節前夕，按照傳統，上阿瑩屋企整朱古力。

送朱古力俾中意既人，係女仔表達心意既一種方法。

果陣時丁家岐未同我表白，我又對佢有啲意思，為咗唔顯得過分刻意，唯有整哂俾全班同學，人人有份。

宜家淨係整俾丁家岐就得，大家都知我心入面只得佢一個。

唔同朱古力，有唔同意思。例如：白朱古力代表濃情蜜意，黑朱古力代表同甘共苦，薄荷朱古力代表初戀既清新，酒心朱古力代表熱戀中既醺醉。（以上皆為我鳩吹的）





今年同丁家岐經歷過大風大浪，我想話俾佢知，無論係以前，定係以後既日子，我都會同佢共患難，唔會離棄佢，所以我揀咗黑朱古力。

我同阿瑩將朱古力切碎，放入碗，再擺係熱水壼上面，等佢慢慢溶。

「丁家岐聽日帶你去邊呀？」阿瑩問。

「佢話係尖沙咀等呀，但係冇同我講係邊一間酒店。」好衰囉，問極都唔講，搞到人地心思思，未去已經興奮定。

「咦？原來你地去爆房啊。」





我反應極大：「咩爆房呀，我地係去staycation呀。」

爆房係指一對偷情男女，求其搵間時鐘酒店，平平地，租兩三個鐘解決生理需求。

而staycation則係情侶去享受二人世界，係見得光既關係，可以擺上網打卡呃like。

雖然意思一樣，但唔同講法，就會俾人唔同既感覺。唔信你聽下：屌你係咪比較粗俗，同你做愛係咪比較高級。

「係呢，你會唔會同佢扑野？」阿瑩又問。





「下，我無諗住喎。」我驚一旦越過最後果度防線，俾丁家岐食咗，佢就唔會珍惜我，唔再對我好。

處女膜得一個，好珍貴架，無咗就無咗，唔可以亂黎。聽講男仔都有處女情意結，就算自己唔係處男，都會希望第時既老婆冰清玉潔，第一次留番俾佢。

「你隻純情小白兔，小心丁家岐係牀上，會變成大灰狼，將你就地正法！」

「佢唔會既。」我搖搖頭。唔忍都忍咗咁多年，如果丁家岐真心中意我，我相信佢肯等多幾年，唔會勉強我。

「咁等本小姐黎非禮你先！」阿瑩伸出揸波龍爪手，作勢胸襲我。

「唔好啦！」我一路笑一路叫。

「呀，小心！」好險，差啲撞瀉碗朱古力。

見溶得七七八八，我地將朱古力醬倒落個心型模，雪幾個鐘，轉頭上番黎，加埋糖霜，入落個靚靚包裝袋，就大功告成了。





「落去行街啦！」

......

「好耐無黎sixty-eight啦！」

呢度有各式各樣既內衣。有黑色透視款，有薄荷綠蕾絲款，有紫色薄紗款，睇到人眼花繚亂。

「點解咁少布都可以賣到咁貴？」我隨手拎起條T-black。

「人地sell設計架嘛。」

「 著咗等於無著，不如唔好著。 」我放番低。太過性感暴露，我過唔到自己果關。





「咁又唔得。要遮住小小，男人先會有興趣揭開黎睇。」

又好似幾有道理，露得太多，俾男仔一眼望哂，反而無咗神秘感。

「你平時著開粉紅色同白色bra。今次不如試下呢款？」阿瑩拎起個後交叉黑色蕾絲Bra ，「成set過，唔使煩襯咩底褲。」

我一向都信阿瑩既眼光，佢話買乜就買乜：「我入去試下先。」

我除哂衫。咦，個bra無扣既？我send個msg俾阿瑩求救：「可以入黎嗎？第二間。」

「做咩呀？」阿瑩入到黎。

「呢個點著架？」

「個扣係前面呀。」





「哦。」

著完，望一望鏡，少女得黎又帶點誘惑。

同埋只露背脊，呢種程度既性感，我接受得到。

「不如扣入啲。」阿瑩提議。

於是我將對波向前擠壓，佢幫我扣到最入。

宜家好似比野束實左咁，好緊，不過又真係更加突顯到個胸型。

「我驚丁家岐把持不住。」阿瑩笑嘻嘻咁話。





「我自己睇無咩感覺。」始終唔明點解男仔對胸部情有獨鍾。

「咁男人自己打飛機，玩完左手玩埋右手，都係無感覺。」俾完錢，阿瑩拖咗我去另一間鋪。

燈光昏暗，兼有獨特既香薰味道，成個人都好放鬆。

有好多瓶瓶罐罐。我地行埋去睇。

「費洛蒙香水，愛情魔藥，聞得到的心動。」

「係咪真係有效架？」阿瑩拎起枝鑲滿寶石、瓶身純手工繪製既香水黎睇。

「試下咪知。」

阿瑩左噴右噴，噴埋落我個度：「你有無愛上我呀？」

「不嬲都咁愛你。」

「咁姐係唔使買都得。」阿瑩轉身去睇其他野。

我睇緊條鎖心手鏈，簡介話只要搵張紙，寫低自己意中人既名，摺好，放入手鏈既暗格，隨身攜帶，就可以鎖住對方既心。

再睇埋個價錢：2500元。得啦，唔使諗。

「婷婷，你揀一隻味呀，我送俾你做情人節禮物。」

我望過去，有好多色彩繽紛既盒。

「咩黎架？」有橙味、香蕉味、草莓味同蘋果味，仲有分螺紋同顆粒，花樣多多，咁得意既，係咪糖黎可以食架？

「安全套。」

「都話咗唔會搞野。」我面一紅，即刻擺番低。

「我賭100蚊，你地去得酒店，就一定會上牀！」阿瑩好肯定咁話。