男友出軌，我決定送26頂綠帽比佢: 團年飯 （下）

手機彈出IG通知。

Nicole send咗我同丁家岐既合照過黎，仲好細心咁幫我地執咗個構圖、明暗對比同色彩飽和度。

Nicole : 希望你地中意

我好hea咁覆咗句：Nice pics, thx.

Nicole已讀完就靜咗。





咁樣最好不過。

希望我地既交集到此為止，唔該佢唔好再係我同丁家岐既世界出現。

「哇，呢個姐姐邊個黎架？好靚女啊。」Monkey仔哄埋黎，手快快搶走我部手機，放大Nicole張相黎欣賞。

「我同學。」

「你同學好似明星啊。佢叫咩名呀？」Monkey仔望到眼都唔眨。





「Nicole姐姐。」

「呢個姐姐。」佢跟住我讀：「我可唔可以同呢個姐姐見面架？」

睇黎佢已經移情別戀。

「你唔係有嘉嘉姐姐啦咩？」我提醒佢。雖然我都知道，變咗心既人，十匹馬都拉唔番黎。

「嘉嘉可以做我情人，呢個姐姐靚女啲，我要娶佢做我老婆！」





Monkey仔一路望住Nicole，一路流口水，成個鹹濕樣出哂黎。

慘啦，所謂三歲定八十，細個已經係小色魔，大個咪變大淫蟲？

「小朋友唔可以咁花心架。」為咗唔好助長呢股歪風，我好堅決咁收番我部手機。

「我無好花心。」Monkey仔語氣變得認真起黎：「我的確係中意嘉嘉姐姐在先，但係我最愛既只有呢個姐姐。」

「......」

「呢個姐姐最近有野做呀，等佢忙完，我再帶你去見佢啦。」我唯有隨便應付佢。

「好，我會等佢。」Monkey仔拎出一個小掛歷，打咗一個叉：「今日係第一日。」

睇死佢唔使一日，又會另結新歡了。





「表姐，可唔可以俾呢個姐姐張相我呀？」Monkey仔扯住我隻衫袖問。

「你要佢張相黎做咩？」

「見唔到呢個姐姐，我會掛住佢。」Monkey仔好怕羞咁話。

「 你求我呀。」我玩心大起。

「凱婷表姐，你最靚女啦。」Monkey仔好似糖黐豆咁黐住我。

「咁我靚啲，定呢個姐姐靚啲？」睇你點答呢個世紀難題。

Monkey仔搲咗一下頭：「邊個問我，我咪答係邊個。」





「算你過關啦，宜家send俾你啦。」

叮一聲，丁家岐既WhatsApp彈出黎。

「今日學咗呢首歌xd」

「外間很多反對我愛你的聲音
任他怎講只要與你持續熱吻
要放冷槍 要炮轟 我們就更愛
誰又不忿 」

我將隻耳貼埋去聽，好似佢係我隔離唱緊歌咁，有種好親近既感覺。佢把聲好好J，我忍唔住又重播咗幾次。

丁家岐：可以幫你整做鈴聲架：p





我：想聽現場直播多啲 ：）

丁家岐：咁你要預約

我：有咩日子可以揀呀？

丁家岐：得番情人節咋，反應太熱烈，其他場數full哂

我：就呢一日啦

丁家岐：帶你去酒店住兩日，慢慢唱俾你聽

我：真係去Staycation嗎???（心心眼）

第一年情人節，佢約我去迪士尼玩。第二年，佢帶我上天際101睇日落兼食燭光晚餐，第三年就送咗隻閃到爆既Tiffany & Co戒指俾我。





佢送既禮物，一年比一年貴重；我對佢既愛意，亦一年比一年濃烈。

丁家岐：知你個傻妹想去好耐啦

我一躍跳起身，仲興奮過今日拎金牌！成日見詩韻放香檳、玫瑰同海景相上IG，恨咗好耐，今次終於輪到我啦！

好想同丁家岐去酒店，做愛做的事。

一打開房門，見到張床，好自然就會跳上去，同佢係牀單上面碌黎碌去，由牀頭碌到牀尾。

碌到咁上下，張牀咁大，仲可以試下唔同既姿勢，可以趴係度，可以打側身，可以大字型咁攤屍，玩埋個巴黎鐵塔反轉再反轉都仲得。

中場休息，落去食個米芝連buffet，上黎繼續枕頭大戰三百回合。

玩到成身汗，係浴缸撒滿玫瑰花瓣，對住成個維多利亞港，共浸鴛鴦浴，香檳酒杯彼此碰，隔離仲有隻巨型熊啤啤望住我地。

丁家岐：係喎 ，Nicole有無send相俾你呀？

頂，做咩無啦啦係呢個時候提起第二個女仔。

我：有啊

丁家岐：影得好靚

唔想佢讚其他女仔。

丁家岐：【合照】我地用呢張做icon好嗎？

亦唔想丁家岐一打開屏幕，就諗起張相係Nicole幫我地影既。

我：是但你

丁家岐：你唔想轉呀？

我：我中意宜家呢張多啲

丁家岐：咁我都唔轉啦 落街打波先

丁家岐：順便幫我同Monkey仔打聲招呼xd

「Monkey仔，岐哥哥話下次請你食香蕉。」我突然醒起，佢仲等緊Nicole張相。

Monkey仔無反應。

佢望住個屏幕，神色灰到爆。

原來另一個小朋友，打賞咗一萬個金幣俾嘉嘉，將佢既排名推到上榜首。

面對咁財大氣粗既金主，嘉嘉毫不猶疑咁跟仔跑了，狀態亦從「單身」轉為「交往中」。

「嗚嗚嗚...嘉嘉姐姐俾人搶走咗，呢個姐姐又未出現。」Monkey仔喊到收唔到聲：「今次...真係食得蕉啦。」

鬼叫你花心。我係隔離望住，非但不覺得同情，反而仲覺得幸災樂禍：「呢個故事教訓你：一腳踏兩船，最後咩都無。」