男友出軌，我決定送26頂綠帽比佢: 團年飯 （上）

「做咩咁遲先黎？」阿媽企係樓下，食咗半日西北風，一臉不滿咁望住我。

聞到佢噴哂香水，set埋個隆重到好似去飲既髮型，連塵封N年既LV手袋都拎埋出黎，就知道佢又要同姨媽、舅母上演《宮心計》。

「搭錯車吖嘛。」

「又同丁家岐去咗躝街啦？明知今晚食飯，躝少一日都唔得既。」

搭錯車關丁家岐事，成績衰咗關丁家岐事，唔幫佢買餸又關丁家岐事，總之咩都入丁家岐數，我懶得應佢，因為一應就會沒完沒了。





「同你講緊野呀，有無聽我講野架？」

「有啊。」

「咁你又唔應我。」

「宜家咪應緊囉。」

「算啦，陣間記得叫人，唔好講粗口，我講咩你都要同我扯貓尾呀。」





「得啦。」我係心入面反咗個大白眼。

「婆婆、姨媽、姨丈、舅父、舅母、表姐，表弟，你地好。」我笑得甜絲絲，自動開啟乖乖女模式。其實我一直唔明，點解要逐個逐個人叫，仲要稱呼多到要用「親戚關係計算機」先搞得清楚。

揮下手，講句hi或者hello，男既叫uncle，女既就叫aunt，咁樣唔係有效率得多咩？

「你地終於黎到啦！」

食團年飯，同考DSE口語一樣，幾個人坐埋一枱，做場大龍鳳，一二三四五號輪流上場。





首先要講兩句客套說話，例如：我阿媽係女人。

「哇，婷婷又大個咗啦，一年靚過一年！」一號選手婆婆如是說。

「真係人如其名！生得亭亭玉立！」二號選手舅母話。

再用多兩個四字成語，突顯自己既文化水平，咁就有分加。

三號選手姨媽接落去:「婷婷生得咁標緻，一定大把男仔追啦，唔似得我屋企個傻妹，日日淨係識讀書，年年都考第一！佢又要學游水，又要考日文，仲要考埋演奏級鋼琴，我諗緊好無cut一個課外活動。」

表示認同之後，繼續講番自己啲野。只要自己唔尷尬，尷尬既就係人地。

係咪認同大家心照，最緊要各自拎分。

至於我既工作，就係負責照顧後輩。





「凱婷表姐，我有功課唔識做，你等陣可唔可入黎教我？」十歲既表弟「Monkey 仔」擘大隻眼眨眨下，奶聲奶氣咁問我。

「好呀。」知你可愛啦，又係度賣萌。

「女學霸」表姐突然插嘴：「我都可以教你。要教中文英文定數學？」

「唔使啦，我要凱婷姐姐。」

俾個小朋友直接拒絕，「女學霸」既臉色頓時不太好看。

「食咗野先啦。」我面露笑容，夾咗舊蝦俾Monkey仔。

好不容易食完餐飯，Monkey 仔拖咗我入佢間房，神神秘秘咁閂埋門。





「凱婷姐姐靚啲，所以我要你教我。」Monkey仔沒羞沒臊咁話。

呢個衰仔咁識講野，大個肯定溝死女。

佢打開咗個粉紅色既網站。

【招fd子，求包養。】

[!▉*永遠都想做童話裏的公主||▍|＊
﹏＊*因為童話的結局是美好的 °‥×

_-`'◆((*花一秒去思念你 花一年去支持你 花一輩子去愛你_▂``'×#

哇，不得了，Monkey仔人細鬼大，居然識得去搵「ptgf」。





再望真啲，哦唔係，係我諗得太邪惡，人地係主播，靠唱歌跳舞賺打賞。

全部都係十三、四歲、早熟識打扮、mk味濃既小妹妹，個妝係就係成熟，不過一開口講野就知係傻妹，腦筍都未生埋。

哇，痴線，呢個世界真係瘋狂。

「凱婷表姐，你覺得我揀邊個好啊？」

Monkey仔睇中咗兩個女仔，一個叫「嘉嘉」既姐姐，梳雙馬尾、著V領小背心、個胸谷到上心口，戴住個JK黑色口罩。

另一個叫「羽兒」既妹妹，長髮及肩、電咗個梨花頭、嘟起個嘴仔，擺個心型手勢，著白色上衣格仔短裙、望落幾卡哇伊。

「你中意高冷姐姐定可愛妹妹呀？」

「我唔知呀，兩個都想要。」Monkey仔一臉苦惱：「愛情，先至係世界上最難做既功課。」





「想要神秘感咪揀嘉嘉，想要初戀感覺咪揀羽兒，有幾難啫。」

「咁我揀嘉嘉啦。」Monkey仔碌落去，禁咗「打賞」，大大方方俾咗一千個金幣嘉嘉。

嘉嘉開始用雞仔聲唱歌：「送你每個夢境 每次清醒 陪伴的長情 讓我餘生都有關於你。」

嘉嘉送咗個飛吻過黎。佢塢前個身，哄埋個屏幕，胸部無限放大。

Monkey塊面刷一聲紅哂，不敢直視眼前春光。

「我想同嘉嘉見個面呀，不過佢住葵涌，如果我地見見下面，幢樓俾人圍封，出唔番黎，咁咪全世界都知我包養主播？」

「投資涉及風險，你自己諗啦。」

「唔知嘉嘉會唔會俾我暫時住係佢屋企呢？」Monkey仔個腦已經充滿FF。

我好認真咁幫佢諗解決方案：「一係到時你又做直播，冧死d女，將賺番黎既錢，當做租金俾嘉嘉。」