男友出軌，我決定送26頂綠帽比佢: F ：貓.雪糕.傳染病 (1)
Monkey仔未拍拖就失戀，個心碎滿一地，匿係被竇玩自閉，唔肯同我講野。
我拍一拍佢。
「係咪因為我貪心，所以天父先收番兩個姐姐？」Monkey仔自我反省完一輪，覺得自己做咗件好錯既事。
「可能佢覺得你未諗清楚自己想要咩，咪俾多啲時間你諗咯。」玩還玩，最後都係要哄番佢。小朋友黎架嘛，費事佢今晚發惡夢，從此對愛情留下不可磨滅既陰影。
「嗯，我知道點做架啦。 」Monkey仔伸番個頭出黎，打咗個呵欠：「我眼瞓啦。」
我驚佢凍親，幫佢攝好被角，然後熄燈。
「Good nite，凱婷表姐。」Monkey仔既聲音係黑暗中響起。
「Good night ，Monkey仔。」
我虛掩住門，留咗少少光線俾佢。
做小朋友真係好，佢地既記憶好似金魚，只得七秒。一覺瞓醒，咩都唔記得，第二朝又係新既一日。
「表妹，過黎玩大話骰呀。」一行出廳，就見到女學霸拎住個骰盅，係手上搖啊搖，成個賭神咁。
唔通頭先Monkey仔話我靚過佢，佢懷恨在心，所以等咗我成晚，點都要贏番我一次，挽回面子？
「吓？我唔係好識架喎。」我即刻詐死。其實從呢一刻開始，我就開始講緊大話， 目的係令對方輕敵。
「好簡單架咋，識計數就得。我地輪流嗌有幾多粒骰，你覺得我無咪開，有咪繼續嗌落去。」
屌，講完等於無講。好彩我本身都識點玩。
女學霸仲好善解人意咁補番句：「唔明唔緊要，我讓你咪得。」
「咁...好啦。」我成隻鵪鶉咁坐係佢對面。
「新年流流，我地賭大啲呀。」女學霸啪一聲，擺咗張一百蚊紙係枱面。
姨媽、舅母同我阿媽都過黎觀戰。
你地望我，我又望番你地。我嘗試解讀佢地臉上既表情。
阿媽：你唔輸得架，輸咗我就好無面
姨媽：家族既榮譽、榮耀同榮光靠哂你
舅母：關我撚事，我係黎食花生既
最後，我得出佢地各懷鬼胎既結論。
「邊個開先？」我問。
「你先啦。」女學霸禮讓我。
「我...我有三個2同兩個5。」
阿媽係隔離，恨鐵不成鋼咁望住我：「邊有人會講自己有咩骰架？」
「下？唔講得架？咁我係咪要嗌三個2？」我語帶猶疑咁話。
女學霸揭盅，佢有三個4、一個3同一個5。
佢輸咗。
都話我有架啦，佢又唔信我，自己攞黎賤。
女學霸露出一個尷尬又不失禮貌既笑容：「讓你一局又點話，再黎，賭兩百。」
佢想連本帶利贏番。
今次我手都震埋：「三個4。」
「三個5。」
其實我有四個5在手。不過我扮哂揸唔到主意：「咁樣呀... 加多一粒呀？！」
女學霸揭盅：「我1粒都無。 」
但係我有吖嘛。我開 ：「咦，好似贏咗添。」
女學霸塊臉仲黑過地底泥。
新年流流搞到佢輸清光，我都唔係幾好意思：「今日咁高興，唔好講錢啦，講錢傷感情。我落去買幾枝啤酒上黎，請大家飲吖。」
「凱婷好識做啊。」姨丈、舅父拍哂手掌表示支持。
係女學霸近乎殺人既目光之下，我拎住三張紅噹噹既獅子頭，心情愉快咁溜之大吉。
......
唔係好知佢地中意咩口味既啤酒，所以藍妹、嘉士柏同埋獅威都買咗幾罐，見甜筒有特價，12蚊2枝，順手買埋俾Monkey仔，等佢聽日打開雪櫃，見到開心下。
條街勁冷清，莫講話人影，連鬼影都唔多隻。我拎住一大抽野，行經公園，見到有個著深藍色hoodle既男仔，一個人坐係度低聲細語。
唔係撞鬼吖嘛？！我好奇地行埋去昅下。
原來佢同緊凳上面隻貓講緊野，隻貓一臉生無可戀咁趴咗係度。
好熟口面啊...隻貓。係咪以前成日同我玩果隻呢？
男仔抬頭，同我眼神相接：「你要過來跟牠玩嗎？」
佢講得一口流利既普通話。
金黃色既毛髮，琥珀色既眼珠，冇咗一截既尾巴。我走上前，嗌佢個名：「小尾？」
小尾喵咗一聲，一躍而下，係我附近打轉。我踎低，伸隻手俾佢，佢用粉紅色既鼻頭聞咗一聞，然後就係我膝頭蹭黎蹭去。
「你一定是噴了甜甜的香水。」男仔話。
「你怎麼知道？」我下意識用普通話問。
「甜甜的東西會讓貓咪興奮，忍不住想要親近你。」男仔既手臂隨意搭係椅背。
「不是的，我小時候就認識小尾。」
男仔一臉恍然大悟，指住小尾：「牠的尾巴怎麼了？」
「幾年前被一個瘋子剁掉了。」
男仔沉默咗一陣，用字正腔圓既廣東話講咗句：「正一仆街。」
果然，學習一門語言，永遠係講粗口果下最地道。
「你在這裡住嗎？」男仔又問。
「不是，我過來吃飯。」
「難怪我天天過來遛貓，卻從來沒有碰見過你。」
你邊度係遛貓呀...隻貓都唔理你既。
我輕輕順住小尾既毛黎摸，佢喵喵叫咗幾聲。過咗一陣，佢跳上我大脾，縮成一團。
「你怎麼一個人呢？」我問。見小尾坐得舒舒服服，我都唔係好想郁。
「我的家人都在台灣。」
「你是來留學的嗎？」
「對啊。你怎麼也是一個人呢？」
「我出來透透氣。」
佢點點頭。
一個人身在異鄉，大時大節，應該倍感孤獨。我遞咗枝甜筒俾佢：「來，給你，新年快樂。」