男友出軌，我決定送26頂綠帽比佢: E ：搭錯線 (4)

「你有無同詩韻出過街呀？」

隔住個屏幕，就算傳過一千條WhatsApp，都不過係紙上談情，比唔上出黎見一面，講緊既仲要係單對單見面，而唔係成堆人一齊喂喂喂果隻。

「無呀。有次詩詩話想食壽司郎，我一大早就去黃大仙拎籌，辛辛苦苦排咗六個鐘，排到差唔多既時候，我咪打電話俾佢。

點知佢話唔好意思，唔記得約咗我。屌佢呀，真係唔講粗口都唔得。我係IG發現佢同咗另一個男仔出街，嬲到我del哂所有聊天記錄同contact。

你明唔明白呀？Do you understand?」





我明唔明咩野呀？

聽到一頭霧水，不過E.T好激動，我唯有係咁點頭答：「我明呀。」

「唔係呀，你仲係唔明。

我嬲唔係因為佢放我飛機，而係果條友有女朋友仲flirt佢，詩詩又嗒哂糖咁，遲早會出事，俾人食咗都唔知咩事。」

「你係咪講緊阿健？」呢件事我好有印象，後來真係出咗事，佢地三個約出黎攤牌，話要解決私人恩怨。





聽詩韻講，阿健企係隔離，翹埋雙手，佢個女朋友問都未問清楚，就打咗詩韻一巴掌，話佢正臭雞，見到男仔就發哂姣，第二日仲叫哂全級女仔一齊杯葛佢。

「係呀，果隻死狗公黎架，係女就塞個龜頭落去，玩女玩得多，遲早有報應。我祝佢日日俾女戴綠帽，成個頭頂都係草！祝埋佢飲珠奶俾珍珠噎死！一行出街俾車撞死！生Cancer生性病！抵撚死！蝦尻毒撚吖嗱，仆街死！哈哈...哈！！」

E.T一臉憤慨，如果佢冇帶口罩，我相信佢既口水一定噴哂過黎，隔離既人望住我地，應該係度諗，點解我會識埋啲咁既人。尷尬到呢...我好想同佢扮唔識。

「你都要小心啲呀。」E.T提醒我。

「我唔中意阿健呢啲人，亦唔會俾機會佢入。」我好堅決咁話，最憎一腳踏兩船，唔認真對待感情既人。





「咁就最好不過了。」E.T好似幾開心，因為我肯聽佢話。

「係呢，之後你又add番詩韻啦？」

「係呀，衰心軟。同埋擺咗咁多資源係佢身上，中途走咗去，益咗其他毒撚點算。

總之，我地回復番之前既關係，佢有咩想要，儘管出聲；佢用得著我既時候，我亦會第一時間出現。

不過講真，我個心淡咗好多，咁認真做咩，開心咪得咯。反正轉過頭，佢又會搵過第二個mk仔，俾人hurt多一次，死亡無限loop。

有啲人，唔屬於你就係唔屬於你，就算你點努力都好。」E.T故作灑脫，不過眼神就出賣咗佢，充滿落寞。

「下一站：將軍澳，乘客可以轉乘將軍澳綫前往寶琳沿途各站。」

鐘意錯既人，就好似一開始搭錯車，兜黎兜去，轉個九曲十三彎，轉到頭都暈埋，無限輪迴再輪迴，都係唔會去到目的地。





「你會唔會覺得我好似佢條狗？」E.T問我。

「點會呢？你中意詩韻，先會對佢好。」

「唉，咁即係你覺得我連狗都不如啦。」

「......」

「你既解讀方法真係有趣。」

「做女神隻狗，至少都得得意意，可以俾佢摸下，夜晚瓹入佢被竇，同佢一齊瞓覺覺豬。」E.T諗咗諗，又話：「不過，其實做狗都唔好，萬一主人心血來潮，話想食狗肉，就會俾人煮咗，骨頭都無得剩...」

我望一望佢個樣，嗯，似吃咗成斤苦瓜，好一個聲情並茂。





「所以你都係做番人算啦。」我拍一拍佢。

「點都好，多謝你聽我呢個毒撚廢up呀。」E.T既真誠發自內心。

佢平時一定好孤獨，所以只要有人肯聽，佢就會講個不停。

「其實我同你唔熟，點解你肯同我講真話既。」E.T未免太天真吧，一啲防範心都無。

「你係詩詩既朋友，我實信得過你。」

「哈哈，咁最後會唔會發展成：我追緊個女神，結果發現女神既朋友更正。」我開玩笑咁話。

「咁似連登果啲小說名既。唔得啊，詩詩暫時仲係我既唯一，無人可以取代。」

「我講笑咋。」





「知啦。不過，以後有咩需要，都可以搵我幫手架，呢句唔係講笑。」

「你真係好人呀。」除咗好，我諗唔到仲有咩形容詞去形容佢。

「做好人有咩用？做賤男好過啦。」E.T口賤賤咁話：「只要我俾得起錢，我就可以買起世界上既任何一個女仔。」

「你本身都唔係咁既人，做自己好過啦 !」好似我咁，一睇就知係乖乖女，行開清純路線，無論點樣學，都做唔到妖艷賤貨。

「做自己咪毒撚一個，註定孤獨一世。卓別靈話過，毒撚既生活近看是悲劇，遠看是喜劇...」

我忍唔住打斷佢既話。

「卓別靈幾時有咁講過吖，又係度亂up，俾你咁屈法，佢死咗50年，都會激到係墳墓跳出黎，狠狠咁敲死你呢個死毒撚既頭。」





「......」今次輪到佢無野好講。

「下一站，寶琳。左邊既車門將會打開。」

「終於番到屋企啦！」

「下次唔好再搭錯車啦。」我話。

「不過我無咩記性架，日日都會犯相同既錯誤。」E.T答我。

「試下啦。」

「我會架啦！」