男友出軌，我決定送26頂綠帽比佢: E ：搭錯線 (3)

「自從我同詩詩做咗朋友，佢就變咗我既唯一，我心裡眼裡只得佢，無再昅過其他女仔，連av都戒埋，因為我覺得好似背叛咗佢。」

「你都唔係人地男朋友...」姐係好似啲古人，望住中意既表妹嫁作人婦，然後深情款款咁對天發誓：我XXX終身不娶。

事實上，莫講話終身不娶，就算你終身不舉，都係你自己係度自我感動，打精神飛機啫，人地人婦早就去咗巫山，忙住翻雲覆雨，先唔得閒理你咁多啊。

「暫時未係啫，不過都要表示忠心架。我當正佢係我女朋友咁惜架。」

做娘娘，既可以享受男朋友既福利，又唔使盡女朋友既義務。





難怪歌都有得唱：條女好清楚收兵好過嫁人。收完兵再收埋佢皮，怎一個爽字了得，直頭係爽上加爽。

「關係好似唔係咁平等。」

「咁實有一個中意對方多啲既，唔計較得咁多。你同你條仔關係又好平等咩？」

丁家岐出軌過，我都出軌過，我原諒過佢，佢亦選擇唔去懷疑我。我諗，應該係平等掛？！

「你宜家仲有無同詩韻聯絡呀？」





「咩無啊？我同詩詩日日都會傾WhatsApp架，佢冇提起過我咩？」

「唔記得有無啦，好似有掛。」我含糊帶過。

其實詩韻無提起過E.T，真係一次都無。

不過，如果俾詩韻知道我阻住佢收后宮，斷佢財路，佢實殺咗我都有份。

「提起我都正常啊，唔提反而唔正常。因為佢夜晚瞓唔著，一失眠就會搵我，話想聽我鳩up喎。





見佢一個人眼光光等天光咁陰公，我咪勉為其難做個好人，擺部電話係枕頭底，24小時侯命，隨時爬起身陪佢傾偈，費事佢悶親，係得佢先有呢個特權，其他人無架。」

「咁詩韻對你同對其他男仔有無分別？」

「梗係有啦，你地啲女仔對住唔中意既人，係咪會好cool，成日已讀不回人？」

「係呀。」

「佢對我就唔會啦。」E.T一臉自豪咁話。

不過就算覆，都唔代表一定中意。

我地女仔係一種好神奇既生物，一日唔飲水唔食野，仲可以生存落去，但係唔講野真係會死的。

所以，有啲女仔可能只係寂寞，想搵人吹水攝時間；有啲係出於禮貌；有啲就有所企圖，貪你錢財貪你美色，亦都有啲係強逼症發作，見到一個兩個對話框，要清哂佢地先安落。





E.T見我個樣有啲懷疑，又好心虛咁補番句：「除咗佢沖涼果陣咯，佢沖親都要兩個鐘既。

不過我計過架啦，卸妝10分鐘，洗面5分鐘，刷牙5分鐘，洗頭過兩次水20分鐘，搽護髮素加按摩10分鐘，吹頭髮15分鐘，噴埋保濕5分鐘。好啦，跟住到沖涼。淋水5分鐘，捽梘液5分鐘，軟化兼幫皮膚去角質10分鐘，洗完要搽乳液，又無咗5分鐘。最後，仲要敷埋個補水面膜，需時25分鐘。」

現代人手機不離手，真係有心想同你傾偈既，除非無電，否則一個鐘後咩都會覆啦。

我同丁家岐都會帶埋部手機入浴室，係水氣繚繞之中，一邊除哂衫，揸住舊梘，捽到成身都係泡，一邊傾電話。

不過，大概活係自己世界既人，總有本事自圓其說，將對方既每個藉口都合理化。

「下一站，將軍澳。」

「喂，我地要落車再轉車。」E.T提我。