男友出軌，我決定送26頂綠帽比佢: E ：搭錯線 (2)

「呢啲唔係缺點黎架咩？」我疑惑地問。

「對我黎講，亦係佢既優點。」E.T問：「知唔知男仔決定追一個女仔前，會考慮咩？」

「佢靚唔靚女？大唔大波？」

男仔都係樣貌協會，女神樣靚身材正，兵仔做狗都願意。至於果d咩「佢心地善良、有愛心、中意小動物、溫柔體貼待人真誠」，只不過係修飾過既措詞。

「錯啦，係可得性，姐係受唔受溝。」E.T一本正經咁同我講起溝女經。





佢好似唔記得咗，我都係女仔喎。

「見到一個女仔，每個男仔心入面都會有個算盤：我要投放幾多資源，先可以將佢追到手。所謂既資源，可以係錢、陪伴、心思、同了解。

符詩韻呢，佢脾氣唔好，會嚇走大部分優質既男仔，因為佢地本身都大把女埋身，點解要受佢大小姐脾氣。走哂之後，就會剩番狗公，同埋好似我呢啲咁既毒撚。

狗公你知架，有食唔食罪大惡極，食完一句『我地性格不合 』，拍拍屁股走咗去。呢個時候，就係毒撚上位既最好時機。

唔好睇佢要求多多，又名牌手袋又高級餐廳，實則上，呢類女仔先最容易追，只要有錢，就可以留得住佢。」





「但係你留得住佢既人，留唔住佢既心。」詩韻中意你送既野咋，傻仔，又唔係中意你個人。

「我要佢既心做咩呀？」

「你唔會想佢淨係屬於你一個人架咩？」男仔（其實我講緊丁家岐xd）接近一個女仔既最終目的，就係想將佢收割落黎，私有化咗，當成小花咁呵護。

「佢肯俾我抽水，我覺得佢值呢個價，咁咪等價交換囉，做咩要私有化啫。」

「你講到佢好似做ptgf咁。」





「呢個世界有需求，就有供應。個個人都係出黎賣，只不過賣既野唔同，詩詩賣既係美色，你番學賣既係成績，到你番工賣既就係業績，係咪先。」

佢又講得幾有道理，我竟無言以對。

毒撚見得多，不過咁清醒既毒撚，我都係第一次見。

我諗起一句話。

最高明既獵人，往往都係以獵物既形式出現。

我好懷疑。

E.T究竟係個披著毒撚皮既player，定係吹水唔抹嘴既大毒撚係度扮player呢？






不過下一秒，E.T又展現出佢既毒男本色，開始自嘲：「鬼叫阿媽生得我咁樣衰咩，你估我想架？」

係好sad，但係佢個語氣好好笑。

「你想笑咪笑咯，我唔介意架，反正由細到大都俾人笑慣。」佢一副自暴自棄既模樣。

「我覺得你地男仔口中既女神，好多都好普通，唔值得你地對佢咁好。」我講番句真心話。

我聽過好多江湖傳聞：女神一發燒，兵仔就上門煲粥送退燒藥、一嗌肚餓就化身外賣仔、一話要錢就變賣哂屋企既figures。做咁多野，只為博取紅顏一笑。

「係好普通。只要個女仔正常樣，肯同毒撚做下朋友，就有機會做到女神。」佢望咗我一眼：「你都得架。」

不過，有丁家歧呢個大將軍，我就心滿意足了，唔需要咁多蝦兵蟹將。

「我平時無咩人關心，朋友都唔多個，更加唔好話異性朋友。





有一日小息，詩詩行埋黎同我借筆，仲同我講野吹水，搞到我開心咗成晚，瞓極都瞓唔著，之後就日日都好期待同佢有交集。

為咗引起佢注意，我開始偷偷地送野俾佢，有時係閃粉啫喱筆，有時係BTS既簽名寫真，有時係Swarovski既水晶頸鏈，Pandora都好似送過，雖然我唔覺有咩特別。

聖誕節既時候，佢送咗張卡俾我，張卡既內容，我到宜家都記得好清楚：我知道，送野俾我既人係你。你對我真係好好，多謝你一直以來既守護，你對我好重要，我地要做永遠既好朋友！

原來我默默為佢付出，佢係知道架！雖然見到朋友兩隻字，難免會有啲失望，不過，至少可以證明，我係佢心目中係有地位既！

果一刻，我就知道，自己中咗一種毒，名為女神毒。呢種毒不得了，自己解唔到，一旦毒癮發作，小則茶飯不思，大則神智不清。要靠女神派糖，先至可以解得開。」

「係呢，你去邊呀？」聽故事聽到一半，E.T突然問。

「寶琳。」





「咁啱，我都係，一齊轉車啦。」

姨媽提過我，同一個月台有兩架車，一架去康城，一架去寶琳。

我見寶琳盞燈眨下眨下。

「嘟嘟嘟...」係最後一秒衝咗入車。

「下一站，康城。」廣播響起。

咦？

「做咩呀？」E.T見我望住個路線地圖。

「我地好似搭錯車。」





「咁要等多三班車，先可以搭番出將軍澳。」E.T毫不意外咁話。

「你特登架？」唔通我俾佢算計咗？佢住寶琳，有咩理由唔知呢班車去邊。

「特登咩呀？覺得我特登帶你搭錯車？」佢一下子猜透我既心思。

佢咁坦白，我反而唔好意思認。

「你話呢？」我將個波拋番俾佢。

「我跟你行咋。」E.T一臉無辜咁話。

「咁好啦，當我無講過。」我轉移話題：「之後呢？你地有咩發展？」