男友出軌，我決定送26頂綠帽比佢: E ：搭錯線 (1)

散場時，撞正收工時間，一眼望去，地鐵站人來人往，個個都趕頭趕命。

「喂！唔好行住！你撞到我喎！」

「對唔住囉!」

「對唔住大l哂呀！你行咁快做乜嘢呀！」

「 我趕住去死呀得未？」





丁家岐用手臂擋開逼埋黎既人，驚佢地撞親我既傷口。

「有無整到你呀？」

我搖搖頭。

頻繁發生既口角，冷冰冰既廣播聲線，啲人一聽到嘟嘟聲就狗衝入閘門......都係我唔中意搭地鐵的原因。

不過我今日要入寶琳，上姨媽屋企食團年飯。如果搭巴士，將軍澳隧道成日塞車，估計望住個天入黑，望穿秋水，等到花兒謝了都未入到去。





「你唔係要去學結他咩？」我問丁家岐。

「陪你等埋車先啦。」

等車等外賣等人呢啲過程，本來就係浪費緊時間同埋生命。

不過，有丁家岐陪我等，又唔同講法。

我甚至想貪多一點時間。





最好有埋列車故障延誤、鐵軌出現不明異物、天花板漏水成水簾洞......意外就唔好啦，我冇咁黑心，一件都嫌多。

我挨係丁家岐身上，眼皮越黎越重。

「係咪好眼瞓呀？」丁家岐問。

「嗯。」

「咁不如下班車再上啦。」

「好呀。」

我諗，如果宜家係亂世，我地身邊兵荒馬亂，我只想聽住佢熟悉既心跳聲，一下兩下三下催人入眠，令我覺得好心安。

「懶瞓豬，起身啦。」





「唔起。」我半瞇著眼。

「我請你飲奶茶。」

「唔要啊，我要瞓覺。」

「再唔起身，我就影低你流口水個樣。」

事實證明，威逼比利誘有用。我扁住嘴，捽一捽眼，企直個人。

「你識唔識去寶林架？」佢問。

「點會唔識呀？你當我三歲細路女呀？」





「我當你係十七歲既細路女。」丁家岐偷笑，搣我面珠墩：「因為你成日蕩失路。」

「行多啲路可以快高長大嘛。」我死撐。

「原來我既凱婷仲發育緊。咁你要飲多啲奶，個胸先會大啲。」

「你衰人黎呀。」

「對住你咪特別衰。過黎攬下先啦。」

唔知攬咗幾耐，列車走咗一班又一班，丁家岐伸隻手入我外套，開始曳曳。佢隔住運動服摸我個胸，摸摸下再用手掌包實，又搓又捻。

呢啲奇技淫巧，佢邊度學番黎架？唔通佢成日匿係屋企睇愛情動作片，再將女優個樣幻想成我，每日瘋狂做愛一千次一萬次？

唔理佢咁多啦。大庭廣眾之下，好怕醜呀。我覺得有啲痕痕地，仲有啲腿軟，企都企唔穩。條底褲好似濕哂，唔知係黎M定係咩。





但係呢，我又想佢繼續落去，唔好停。呢啲係咩矛盾既心態呢？

「請勿靠近車門，Please stand back from the doors。請不要靠近車門。」

「好啦，要放你走啦。」丁家岐最後抱咗我一下，催我上車。

隔住玻璃窗，佢對我做咗個打電話既手勢。

目送佢身影消失，我拎手機出黎玩，玩咗一陣，覺得有人由上至下望住我，望到我周身唔聚財。

我昂高頭。

係今日同詩韻一齊果條毒撚，企係我對面。吖，唔係，用錯量詞，係果隻毒撚。好似都係怪怪地，應該係話果個毒撚先至啱。





佢戴住個巨型耳機，著住個領洗到歪晒既t shirt，孭住個長到落屎忽既袋，眼神閃閃縮縮，好似做咗咩虧心事。

佢偷偷地望我一眼，好似有野想講，又唔敢講出口。

做咩啫宜家，明明無野，搞到我都尷尬埋一份。

又過咗兩個站。

「Hello。我叫Ethan Tang。你可以叫我做E.T。」佢一路行過黎，身上個袋就跟住彈下彈下，係咁拍到佢隻腳。

E.T。

我諗起果隻手指識著燈、勁大個頭既外星人。

連名都怪過人既。

「你係咪詩詩個朋友胡凱婷？」E.T繼續講。

睇黎佢做哂資料搜集喎，詩韻身邊有咩人、佢星期一至日既行蹤、所有既社交媒體帳號...呢啲基本資料，佢應該都掌握哂。

都幾得人驚下。

我下意識對佢起咗戒心：「係又點呀？」

「我係咪唔可以企你隔離？」佢好有自知之明咁退後。

「你中意企邊咪企邊。」

「太好啦，你係第一個無叫我死開既人。」E.T好感動咁話。

「......」

見佢又幾有禮貌，而我又唔係港女，自戀到以為人地同我傾多兩句，就係想溝我，然後吊高黎賣，特登擺出高高在上既款。

反正無野做，當識多個朋友都好既。

「你係咪好中意符詩韻？」我問。

「佢係我女神。」

「你中意佢啲咩？」我都想知道，點解女神係女神，兵仔點解肯做兵。

我以為會聽到「佢有住天使既面孔、魔鬼既身材、一雙水汪汪既大眼睛眨啊眨、佢一笑就會顛倒成間學校」之類既標準答案。

「我中意佢成日西面發脾氣、要成個地球圍住佢轉、份人又貪慕虛榮、中意名牌中意食貴野、無咩頭腦，淨係識flirt仔。」E.T係咁樣答我既。

我吓咗出黎。呢啲...唔係缺點黎架咩？