男友出軌，我決定送26頂綠帽比佢: 冬季陸運會 （終）
「我地去canteen食，你o唔ok？」丁家岐問Nicole。
「無所謂呀，你地話事。」
「今日你有無參加比賽呀？」我問。
「無啊，我負責影相。」Nicole指一指手上既相機。
丁家岐扶住我慢慢行。
「不如我孭你啦。」佢見我行到好痛苦。
「咁我幫你孭個袋。」我笑嘻嘻咁話。
「咁咪姐係又係我孭番。」丁家岐冇我咁好氣，佢放低個袋。
「我幫你地拎啦。」Nicole企係隔離，一手接過。
「...唔該你。」丁家岐無推卻，踎低咗：「上黎啦，啊公主殿下。」
我騎上去，翹住佢條頸，伏係佢背脊上邊，膝頭個傷口好似都無咁痛。
「我重唔重呀？」我明知故問。
「好似重過以前。」
佢一定係五行欠打。
我拎出女俠既氣勢，一巴掌拍落佢背脊。
丁家岐啊咗一聲：「不過以後要孭成世，慣咗就冇咩野。」
聽到呢句我又忍唔住笑番。
咔嚓一聲，望過去，Nicole既相機對準我地，連續禁咗幾下。
「偷影？」丁家岐挑一挑眉。
「你地好襯吖嘛。」Nicole遞俾我地睇。佢又真係影得幾有意境。丁家岐講緊笑，我聽到眉眼彎彎，雖然戴住口罩，但係成張相都充滿幸福既顏色。
「中意就好，執完再send俾你地呀。」Nicole邊行邊將唔滿意既相刪走。
黎到canteen，我同丁家岐一齊坐 ，Nicole坐我地對面。
「食咩呀？我幫你地叫埋。」丁家岐遞咗張餐牌過黎。
「栗米肉粒飯。」我答。
「黑椒焗豬扒飯。」Nicole答。
「美食快遞員丁家岐為你地服務。」丁家岐走之前，仲同我地鞠咗個躬。
Nicole拎出手機，「凱婷姐，你IG係咩呀？」
唔知幾時開始，識到新朋友既指定動作，就係互換IG。
我打開佢個網頁。
Nicole中文名叫鐘幸兒，有成2000個followers，簽名係「用真心換此生，我是我自己的神」。
佢既相片，出奇地無賣弄身材性感，亦都無曬去過咩高級餐廳，買咗咩名牌野，反而係好有風格既相，再加一段時事見解，或者對一件小事既感受。
係一個好有主見同頭腦的女仔，而唔係大家口中所講既花瓶。
「哇，你網紅黎架？」我忍唔住話。
「唔係啦，2000個followers唔算多。我既目標係1萬。」Nicole並唔覺得自己有咩特別。
「你係點做到架？」
我既 IG淨係得打卡相，加埋啲左抄右抄番黎既句子 。
相比之下，我IG既 followers就少得可憐，拍馬都追唔上佢。
「要研究讀者口味，睇下其他KOL寫緊咩，仲要搜集資料，一講錯野就好易俾人孖叉；有時真係無靈感，停更咗幾日，d 流量就會直線下降，辛辛苦苦寫完，如果點擊少過之前，又會唔開心......總之就好多野煩啦。
不過識多啲人，對將來既事業有著數嘛。」Nicole哇啦哇啦講咗一大堆。
我覺得無癮，收番好自己既手機：「咁你將來想做咩呀？」
「我想入傳理系，做記者。凱婷姐你呢？」
「我...未諗好。」Nicole雖然細過我，但係佢目標比我明確：「讀文科好似無咩出路。」
「我覺得你似係從事文字工作。」Nicole打量我，下咗個結論。
丁家岐捧住兩個餐盤返黎。
「開餐啦！」
Nicole拎出紙巾，將所有餐具抹哂。
「係喎，你對影相好有研究？」食食下，丁家岐突然問。
「亂咁黎架咋，我唔識咩光圈快門既野。總之唔理三七二十一，曝光又好，對唔到焦又好，係咪都影咗先，撞錯咪改，可能錯有錯著，無意中撞到滿意既效果呢。」
丁家岐非常認同佢既話：「我幫凱婷影相都係隨手影，效果反而好過擺拍。」
「講求捕捉感覺啫。」Nicole點點頭：「不過好多時候，感覺都係轉瞬即逝，過咗就係過咗，所以一定要把握時機。」
佢地好似因為有共同興趣，而產生咗一種無形既聯繫，距離一下子拉近咗好多。
我呢，多數係被人影，好少幫人影相。對我黎講，我理得你咩背景咩構圖，只要影到我個人靚靚地就得架啦。
所以我對影相無咩心得，亦唔係好插到嘴。
「你中意影邊類型既相？」丁家岐追問。
「街拍人像，我中意影人同人之間既互動。」Nicole好肯定咁答佢：「只要一個眼神，我就可以估到佢地係咩關係。」
「咁你可以去做狗仔隊喎。」丁家岐講笑。
「我真係做過兼職娛記架，都幾好玩。」
「我就中意影變化，例如日出日落。」丁家岐接落去。
「你好勁呀，我自問就無咁好耐性。」
唔知點解，我覺得丁家係想顯擺，而Nicole就有意配合佢。
「不過呢個傻妹唔肯早起身陪我去影，佢話睇咩日出呀，日日都出架啦。」丁家岐捻一捻我大腿。
Nicole輕輕一笑。
如果Nicole下一句答：咁我地搵日一齊去影日落啦，我一定會殺咗佢。
「如果你地想影情侶相，可以搵我架。」
好彩佢無。
「好呀。」丁家岐一口應承。
三人行，明明Nicole係多餘果個，宜家搞到好似我先係局外人。
我唔中意呢種感覺。
不過，邀請人在先，冷落人地，又好似唔係幾好。丁家岐都係出於禮貌啫，我叫自己唔好亂諗野。