男友出軌，我決定送26頂綠帽比佢: 冬季陸運會 （下）

「去咗邊啊例遲小姐？」魚蛋隨口一問。

「無呀，去收禮物。」詩韻拎住個名牌手袋，大搖大擺咁行過黎。

「你啲兵送架？」阿瑩插口。

「朋友黎，我唔收兵既。凱婷，可唔可以幫我拎住先呀？」見我未有反應，詩韻遞咗個手袋俾我。

如果佢係想同我曬命，咁佢就搵錯人啦，因為我對名牌一無所知，同我講，同對牛彈琴無分別。





「我屋企好多手袋架啦，佢係都要俾我，唔收又好似浪費咗人地一番心意。」詩韻用手指順一順頭髮，綁成馬尾，再除低外套，隨手塞入手袋。

下，咁你頭先又係更衣室俾人抽水？講一套做一套既。

「咦？詩韻，呢個咪Celine最新推出既限量版手袋？」等埋位等得無聊，隔離班啲女仔走過黎R水吹。

「係呀，全球得1000個。」詩韻好享受成為眾人焦點。

女同學露出羨慕既眼神：「可唔可以俾我睇下呀？」





「拎去啦，小心啲唔好刮花喎，好貴架。」詩韻提醒佢地。

「唔可以帶超過400蚊既袋番學喎，你唔怕俾風紀沒收呀？」

「唔會既，捉到咪話係假貨囉。」詩韻毫不在乎咁fing一fing手。佢頭先話風紀係佢朋友，唔知佢地...係咩真係朋友咁簡單呢？

我知佢平時會特登展示自己既身材，中意係男仔之間周旋，換畫仲快過換衫，佢係我朋友，做咩我都唔會覺得佢錯。

不過，睇見佢用身體黎換取物質，我就覺得好心痛。點解要咁樣作賤自己呢？





「請所有選手各就各位！」老師拎住喇叭宣佈。

「到我地啦！」魚蛋一躍而起：「美女團隆重登場！」

我負責接第三棒。

我望向觀眾席，見到丁家岐對我揮揮手，大大聲咁叫我個名。

時間彷彿靜止，我既心跳越黎越快。以往都係我做佢既小迷妹，為佢搖旗吶喊，今次調翻轉，輪到佢望住我比賽。

「On your marks, get set, go!」

槍聲響起。

詩韻遙遙領先，短裙翻飛，紫色既打底褲，映襯得兩隻腳更加白雪雪，我個腦自動播放bgm：讓那飄呀飄呀的裙，挑惹起戰爭。





魚蛋都唔慢，不過就無咩可觀性，如同一隻衝鋒陷陣既大黃蜂。幾秒之後，佢已經沖到埋黎，大大力推我出去：「凱婷加油呀！跑快啲呀！」

我拎住枝棒，用生平最快既速度，全力向前沖，淨係得番一個念頭：我好想為丁家岐贏一次，好想令佢自豪，想佢同其他人講：見唔見到，我女朋友贏咗呀！

完成任務後，我地一齊望住負責沖線既阿瑩。佢跑到成個人震哂，對波彈下彈下，胸口前面果兩舊肉，上下上下咁擺動，好似隨時會跌出黎。

「就算我地輸咗比賽，係視覺上，都贏佢地九條街！」魚蛋行咗過來。

「上呀！上呀！」我睇得好肉緊。

「係我地呀！」

「贏咗啦！仲要係第一！」





「今日終於唔係傻妹，係叻妹 :p」第一時間收到丁家岐既WhatsApp。

我：好開心：）

丁家岐：lunch tgt?

我：門口等？

丁家岐：即到

同阿瑩佢地講咗聲，我就爬過欄杆，穿過觀眾席，去搵丁家岐。

我興奮到蹦蹦跳跳。望住塊金牌，越睇越覺得靚，睇極都唔厭。

跳跳下，突然腳下一絆，成個人撲咗落地，手機同銀包跌哂，金牌唔知碌咗去邊。





「你無事嗎？」有個女仔跑過黎扶起我，幫我執起哂所有野。

係Nicole。

我個膝頭擦損咗，流哂血，冇咗塊皮，勉強爬咗起黎。

佢扶我去最近既凳坐低：「我去睇下邊度有急救站。」

個傷口好痛。

我打電話俾丁家岐。

「我跌親呀。」





「你係邊呀？我過黎搵你。」丁家岐語帶焦急。

我講咗我個位置。

Nicole過返番，手上拎住紗布、膠紙同消毒藥水。

佢坐係我隔離：「我幫你消毒先啦，你忍一忍，可能有啲痛。」

「唔該你呀。」佢無掉低我唔理，仲同我處理傷口，其實佢都幾好人呀，同我對佢既第一印象差好遠。

丁家岐趕到黎既時候，Nicole已經幫我痴好紗布。

「做咩咁唔小心呀？」丁家岐摸一摸我個頭。

「點知啫，個地下都唔平既。」

「好啦，錫番唔痛。」丁家岐錫咗我個額頭一淡，跟住先望到企係隔離既Nicole：「咦？係你呀。」

Nicole大大方方咁對佢笑一笑：「唔阻你地二人世界啦。」

丁家岐叫住佢：「你食咗飯啦？」

「未呀。」

「你班朋友仲等緊你？」丁家岐問。呢個鐘數，出去食唔會夠時間。

「佢地走哂啦，無等我。」Nicole無咩所謂咁話：「我自己一個人食。」

「咁不如一齊？」丁家岐自作主張。

「好呀。」Nicole答得爽快，望咗我一眼：「如果凱婷姐唔介意既話。」

如果我答介意，就會顯得好小器：「點會呢？」

雖然我更加想同丁家岐單獨相處。