男友出軌，我決定送26頂綠帽比佢: 阿瑩的秘密（上）

我地學校女多男少，靚女多，靚仔就無幾個，男老師更加係重災區。一係就頭頂反哂光既大叔，一係就講野柔聲細氣既乸型，想揾個似男人既男人都難。

直到三個月前，黎咗個新既PE老師。

余Sir，全名余文洛，可以話係我地學校 「行走的荷爾蒙」 ，身高一米八，一身古銅色既膚色。所到之處都是風景，輕易就牽動到一眾女同學既少女心。

佢同男同學成日勾肩搭背，有講有笑毫無架子，對女同學就關心備至，但又唔會俾人好狗公既感覺，笑起黎好charm，最重要係佢有六塊腹肌，膊頭夠闊，行起路來腳下生風。

試過有隔離校既女同學係門口等佢，仲想炒牌，余Sir又真係來者不拒，俾咗個電話佢地，不過係公司既電話，因為佢放工之後仲會兼職教打拳，話歡迎佢地黎免費試堂。至於果班女仔有無去到，我地就不得而知啦。





佢咩都會同我地分享，係唔講自己既私生活，就算我地點樣試探，都唔知佢有無女朋友，或者老婆。

雖然係咁，佢仍然係好受歡迎，仲有埋自己既Fan Page。雖然都係啲無聊野，但都有三百幾人follow，可見大家都很無聊。

「突發：余文洛係小食部買野，買咗一盒檸檬茶同十粒燒賣。」

「洛洛上堂示範做push up，冒住生命危險影既J圖已備。若要J，請深J。」

「唔係講笑?! 我上堂本來好眼訓 一聽到余余把聲 即刻醒左 真係好好好好聽 我要對你熱情表白。」





最搞笑既係，佢都係呢個group入面，仲會讚好自己既圖片。

街上人有相似，一個可能認錯，但兩個都係我學校既人，天底下邊有咁多巧合。所以，我都幾肯定，果兩個就係余Sir同阿瑩。

天呀，呢一刻我既震撼程度，比得上見到大笨象跳樓馬騮仔上床狐狸飲啤酒。

好一個阿瑩，居然收得咁埋。

平時又唔覺佢地有咩交集，睇佢地舉止咁親密，應該關係匪淺，唔知佢地開始咗幾耐呢？





睇黎真係應咗果句話：大張旗鼓既緋聞，擺得上枱講得出口既，只不過係煙霧彈，用黎掩護、分散敵人既注意力。真正既秘密，都係埋藏係深海裡面既炸彈，一旦爆炸就無法收場。

唔怕話埋俾你知。一個女仔，就算唔係八婆，一個星期最少會聽到3個秘密，而我地保守秘密既時間，平均唔會超過32分鐘。

每次都會話：「我唔會話俾人知」。好明顯，呢度既「人」，係唔包括男朋友同好姐妹。

丁家岐又打電話黎。

「無事嗎？」

「我頭先見到阿瑩。」我劈頭就話，要將個秘密收埋係心裡，真係好辛苦，所以我決定唔再勉強自己，要搵個人同我分擔。

「你地約埋去行街？」丁家岐問，唔覺有咩稀奇，我朋友少，黎黎去去都係果三個。

「唔係，佢同個男人一齊！」





「係咩？佢拍拖啊？」丁家岐語氣無咩起伏，好似唔係好在意。

「係我地學校架。你一定估唔到係邊個。」我好肯定咁話。

「唔通係余文洛？」

「你點知架？」

「估架炸，我地學校都無咩男人。」

一估就估到，都唔好玩既：「要保守秘密呀。」

「得啦。」





靜咗。

丁家岐追問：「佢地係度攬緊定錫緊？」

「咁又無，淨係食雪糕炸。」

「可能人地仲有下文，你唔知姐。」

「你覺得佢地襯唔襯？」我從來都冇聽過阿瑩提過余文洛，連佢有中意既人，我都唔知道。

「健身教練同未成年少女，偷偷發展地下情，聽落都幾有火花。」

「記得唔好同人講呀。」我再三叮囑佢。

「嗯。」





「咁我收線啦。」

「等一陣，」丁家岐急急阻止我。

「做咩呀？」

「可樂要加冰，下一句係咩？」

我摸不著頭腦，唔知佢搞咩鬼，但係又俾佢勾起好奇心。

「要講唔該？」叫野食要有禮貌嘛。

「唔係呀。」





我苦苦思索：「無氣？」好似未見過麥當勞既汽水，會咕嚕咕嚕咁冒泡泡。

「你就無氣。」丁家岐俾我逗笑了：「可唔可以有啲創意？」

咁就黎個押韻吧：「雞粥要走青？」

「算啦，我黎問你，可樂點解會有泡泡？」

「因為汽水裡面有二氧化碳。」呢個我知道，中二上Bio堂老師教過。

「啱啦，加冰係為咗減慢二氧化碳既流失，令杯可樂可以保持係最佳飲用溫度。所以無冰既可樂，係冇靈魂既。冇咗胡凱婷既丁家岐，都係冇靈魂既。」

死人丁家岐，又講埋呢啲甜言蜜語。

「你係咪想講，你係汽水我係冰，我地天生一對，永遠都唔會分開？」

「Exact7ly。」我已經想像到，佢胸有成竹果個樣。

「又上網抄情話？」

「我自己諗架。」

我笑咗笑，「下句究竟係咩？開估啦。」

「其實我都唔知，頭先碌IG，見到有個fd問，咪黎考下你。」佢好欠揍咁話。

「 好啦，咁你搵到答案話我知。」

「收到。」