男友出軌，我決定送26頂綠帽比佢: 阿瑩的秘密（中）
各位新年快樂！
江湖人稱米線（話明係走，請唔好叫我鴨血）既我，性格懶惰，做事三分鐘熱度，更文看心情。最大既願望係可以寫完一本小說，堅持一星期至少兩更。
作為新手，係短短兩個月有咁多點擊，仲上埋榜，可以同咁多位大神排排坐，真係始料不及既事。我超級愛愛愛愛愛你地啊！請繼續支持同鼓勵我！！
唉屌，除夕玩得太開心，樂極生悲拗了柴，呢兩日會留在家中乖乖更文。如果沒有，應該係去咗打麻將，星期二再來過吧。
......我是分隔線......
放假都要番去補堂，中六生就係咁悲慘。
詩韻同魚蛋，一個詐病，一個瞓過頭，雙雙無出現，叫我地幫手拎notes喎。
我手字從一號微風，進化到八號狂風，潦草到自己都睇唔明，寫到手都就黎斷，總算成功係限時之內，完成篇千字論文。
「婷婷，陪我落去買野食。」
「但係我好眼瞓。」冬眠狀態既我，眼都擘唔開，完全唔想郁。
「聽講小食部有蘿蔔糕買喎，我請你食啦。」佢真係好知點樣對付我。
「咁好啦。」我打咗個呵欠，好凍，即刻翹住阿瑩隻手，借用一點溫暖。
我地落樓梯，余Sir咁啱上樓。
得啦，明哂。
阿瑩呢個衰妹，醉翁之意不在酒，買野食係藉口，想同余Sir扮偶遇先係真既。
「喂，hello，番黎溫習呀？」余Sir拎住罐咖啡，停低腳步。
「補課呀。」
「咁你地加油啦。」余Sir對我地揮揮手。
「bye bye。」阿瑩拉住我繼續行。
仲想搵蛛絲馬跡，證明佢地兩個有曖昧，點知完全無破綻。係學校，佢地就係老師同學生既關係。
兩個都係戲精，演技精湛到咁，真係要頒個奧斯卡男女主角俾佢地。
「好快又一年啦。」阿瑩好感慨咁話。
「係咯，好似發緊夢咁，我仲停留係2019年。」果時仲未有疫情，唔使戴口罩，大家仲可以鳩up上街，仲係度計劃緊去邊旅行，我仲相信丁家岐係我既白馬王子，我地會一直幸福快樂生活落去。
「今年就係最後一年，突然好唔捨得。」阿瑩又話。
「你最唔捨得咩人呀？」
「梗係你地啦。我地經歷咗咁多，風風雨雨都一齊走過。」阿瑩諗都唔諗就答。
可能係心理作用，我覺得佢最唔捨得既人，唔係我地。
「咁係呢間學校裡面，有無阿瑩中意既人？」我探佢口風。
「無啊，都無睇得上眼既男仔。」阿瑩即刻否認，眼神中帶點疑惑：「點解咁問既？」
無睇得上眼既男仔，因為佢中意果個係男人。哼，同我玩文字遊戲。
「就黎畢業啦，有咪要快啲表白囉。」我理所當然咁話。
「傻啦，有實第一個話你知。」阿瑩遞咗張廿蚊俾小食部阿姨：「兩塊蘿蔔糕。」
「講咗多謝先。」
「係喎，你今晚有無野做。」阿瑩問。
「做咩呀？想約我去行街？」
「係咩，想去廟街。」
「廟街有咩行？」我對廟街既印象，仲停留係買水果同大媽既歌舞表演。
「占卜啊，睇下有無桃花運。有檔我睇開，一百蚊一條問題。」
「哇，好貴啊。」我成日覺得，占卜師求其掐指一算，再講幾句似是而非既說話，或者讀幾句火星符文，就盛惠一百元，仲好搵過打工仔。
「不過就真係好準。」
「陪你去就得，我自己就唔占啦。」慳翻啲錢，食咗落肚仲好。
......
廟街，公廁對面。
未夠七點，占卜師人都未到，我地身後已經排哂長龍，高矮肥瘦男女老幼都有。
「好彩早啲黎炸，我地等緊呢檔最受歡迎。」阿瑩偷偷地同我講。望一望其他江湖術士，檔檔都靜英英拍烏蠅。有個包住頭巾既女人，勾勾手指，示意我過去，嚇到我即刻收番視線。
「係呀，King姐有好多客架。」
「點解有啲檔多啲人，有啲冇人？」
「你真係想知？」阿瑩故意賣關子。「因為做每一樣野，都要付出相應既代價。」
「代價？」唔通要出賣靈魂俾魔鬼？
「玩占卜呢，其實同玩碟仙、筆仙一樣，都係要同陰靈打交道。所以越多陰靈聚集既地方，果檔就越準，回頭客自然都多。」
阿瑩話音一落，旁邊既人都神情古怪咁望住佢，好似見鬼咁。
難怪我覺得呢個地方陰氣陣陣，涼風嗖嗖。
特別係隔離果棵大榕樹，根鬚交錯，聽講啲好朋友好中意匿係入面，然後望住你笑，一直笑到你心寒。
「我講笑咋，嚇親大家唔好意思。」阿瑩即刻擺擺手，解釋番：「我所指既代價，係指租金。俾得貴啲，個位出啲，咪多啲人留意到。」
大家會心一笑。
King姐終於現身。短髮，大概60-70歲。有啲元秋既江湖味，望落串串地。
「坐啦。」King姐同我地微微點頭。佢開咗盞燈，個氣氛好凝重，搞到我都緊張埋一份。而我緊張既時候，就會做埋啲出人意表既野。例如，我會問：「呢盞神燈黎架？」
King姐呆咗一呆：「太暗，我睇唔到。」
我哦咗一聲。
「你兩個邊個睇牌？」
阿瑩舉起手。
「隻手消毒咗未？」
阿瑩點點頭。
「問咩？」
「想睇感情。」
「暗戀拍緊拖定分咗手？」呢個問題，佢一日應該要問百幾次。
「Erm...」阿瑩望咗我一眼：「咩都唔係？」
「明白。諗住你心目中既人，然後洗牌，想停就停落黎。」
阿瑩合埋眼睛，抽牌疊牌咗五次，交俾King姐。King姐擺好個牌陣，陷入認真既沉思模式。我同阿瑩對望咗一眼，咩都無講。
「你同呢個人，唔係無得發展，但係發展起上黎，會有阻滯。有啲野撠(kick)住咗，可能係同身份有關，佢大個你，食鹽多過你食米，地位相當之不平等，識得點樣操控你。所以要識得睇路，唔好一頭熱咁蹖埋去，撞死咗都唔知咩事。」