男友出軌，我決定送26頂綠帽比佢: C : 海盜不能沒有女 (5)
我摸一摸碗關東煮，仲係熱既。打開個蓋，有少少熱氣冒出黎。
望住啲白蘿蔔、高麗菜雞肉捲、天婦羅、蟹棒、黃金魚丸、蒟蒻絲，同埋炸豆腐。全部都好好食，應該食邊一樣先啦？
「話說你呃過幾多個女仔，上黎同你食關東煮？」我隨口一問。
「咩呃呃聲咁難聽，係邀請。」Clay義正言辭咁糾正我。
「咁你邀請過幾多個女仔呀？」
「大概十幾個啦。」佢扮哂野數下手指。
「你最中意邊一個角色？」
「細路先會做選擇，大人全部都要。」
「唔得呀，話明係最，只會得一個。」我好堅持咁話。
「咁應該係希爾維亞。」
「就係果個蘿莉水手？」
「係呀。」
「你果然係蘿莉控。」我笑嘻嘻咁話，夾咗舊高麗菜雞肉捲擺落口。
「希爾維亞既原型，係我暗戀既女仔。」吃到一半，Clay突然彈咗句出黎。
一聽到有八卦，我即刻打醒十二精神：「咁做咩唔同人表白呀？怯就輸成世喎。」
Clay苦笑：「我中意咗佢五年，每年都同佢表白一次，但佢都係拒絕我。
第一年，佢話佢當我係朋友。第二年，佢話再相處下先。第三年，佢話有中意既人。第四年，佢話未走出失戀陰影。第五年，佢話好多謝我陪佢，佢努力過，但真係對我無感覺。」
我「哇」咗出聲，每年都俾人插一刀，從來溫柔刀，刀刀致命，佢既心臟究竟有幾強大，先可以承受到咁多痛苦：「咁你都可以唔死心？」
「畢咗業之後，就無再見面，唔死心都要死心。」
「無遇到另一個令你心動既女仔？」
「我仲未放得底佢，唔想辜負下一個。同埋俾佢拒絕咗咁多次，到宜家都仲有陰影，所以都係專心事業，搞好個遊戲算啦。」
個氣氛突然變得好沉重，唔知點接落去好，我拮咗粒黃金魚丸，講翻啲開心野：
「係遊戲裡面，凱伊同希爾維亞最後有無一齊到啊？」
「我俾你睇下個結局，不過唔可以劇透俾其他人知。」
「得啦得啦。」
【希爾維亞：點解你要咁傻。為咗我，你連命都唔要？
凱伊：（虛弱地）無咗你，我生不如死。
希爾維亞：你傷得咁重，我要去搵大夫！
凱伊：太遲啦，我唔會活得過今晚。
希爾維亞：你有冇咩心願未了？
凱伊：我想你陪我去教堂。
希爾維亞 ：三更半夜去教堂做咩呀？
凱伊：結婚。
希爾維亞：現在？
凱伊：係。
希爾維亞：（腦子打結，過了一會兒才轉得過來）你咁樣算唔算求婚？
凱伊：你話呢？
希爾維亞：其實...我等咗你呢句話好耐啦。
......
(教堂內，蠟燭搖晃，琴聲悠揚。)
凱伊：反悔既話，現在仲黎得切。
希爾維亞（挽著凱伊的手臂，搖了搖頭）：我唔後悔。
牧師：凱伊·布萊克，你願意迎娶希爾維亞·韋恩為你的的合法妻子；從今時直到永遠，將愛著她，並且珍惜她？
凱伊：（凝視希爾維亞，穩穩地回答）「我願意。」
牧師：希爾維亞·韋恩，你願意嫁給凱伊·布萊克作為你的的合法夫君；從今以後，無論順境逆境，無論富貴貧賤，一直對他忠實順從，直到生命最後一天？」
希爾維亞：(毫不猶豫）我願意。
牧師：我宣佈，你們正式成為夫妻。現在，新郎可以親吻新娘。】
「希爾維亞呢個角色，我擺咗好多心血落去寫。我寫得越快，佢就成長得越快。等佢經歷多咗，佢就會知道，邊個先會陪佢到最後，邊個對佢係最好。」
係男仔既遊戲世界，佢地係自己既神，可以千里走單騎，可以十八般武藝樣樣皆精，可以講一句說話，啲女就會乖乖跟佢走。
但係現實之中，又係另一回事。
「都...幾感動呀。」雖然係自我感動。
「哈，我都覺，呢個遊戲一定大賣！」Clay興奮到跳起身。
趁住佢自high，我將所有蟹棒一掃清光。
.....
食完野，走人。
行到落街，凍到扑街，好想飛的番屋企，沖番個熱水涼。
Clay send咗個短信俾我。
Clay : 有無興趣幫我演多一個角色？
我：無時間啦，我要去賺錢。
Clay : 莫非...你真係ptgf?
我：咦，俾你發現咗添。
Clay : 我請你食其他野。
我：不了。
Clay : 咁絕情。
我：因為浪漫，就係無後來嘛，你話既。
Clay : ......
如果我既人生係一場遊戲，我既世界應該會充滿愛恨情仇，我既男朋友唔完美，佢會出軌，會背叛我。
但至少，我係自己故事既女主角，我有一班愛我既朋友，有多管閒事、但關心我既屋企人，仲有我既快樂泉源我隻狗Bobo。
我唔使係其他人既世界做配角。
【丁家岐來電】
我特登等佢響多幾下先接。
「你瞓醒啦？」我問。
未瞓醒可以繼續架，最好一睡不起，今世瞓唔醒下世先再醒。
「嗯，好眼瞓。」佢把聲明明勁清醒。
「你係街呀？」丁家岐問。
「係呀。」
「無呀，你媽WhatsApp我，話咁鬼凍，叫我早啲帶你番屋企。」
死啦，佢知我同我阿媽講大話。
「你同緊邊個一齊呀？」
「我...自己行緊街，Etude House做緊特價呀，今日最後一日。」
「咁你食咗野未呀？未食我出黎同你食。」
「唔使啦，我宜家都返緊去。」
「你...係咪嬲緊我？」
「無呀無呀，喂唔講啦，轉頭打俾你。」
我真係唔係仲嬲緊佢。
而係我見到有個疑似阿瑩既背影。
佢食緊雪糕，笑得好鬼死開心。旁邊既男人望住佢，拎咗張紙巾出黎，幫佢抹嘴。
阿瑩幾時拍拖架？姐妹一場，佢居然無同我講？
個男人仲好熟口面。咦，應該唔係...掛？