男友出軌，我決定送26頂綠帽比佢: C : 海盜不能沒有女 (4)

「咁就完啦？」好似有啲爛尾喎，雖然個故本來就好無厘頭，毫無邏輯可言。

「係呀，你唔覺得好浪漫咩？」

浪漫個鬼。

我記得，中文老師講過，古有四大喜事，分別係久旱逢甘霖、他鄉遇故知、洞房花燭夜同埋金榜題名時。

套番去現代，姐係睇AV，上高登，溝女神仲有打爆機，統稱為男人既浪漫。





「咩叫浪漫先？」考中文oral既時候，老師成日話，要界題，將題目既關鍵字眼定義咗，先有得繼續講落去。

「浪漫，就係無後來呀。」

唔使講，呢個凱伊一定係渣男，如果無估錯，佢仲會搞一夜情、中出即飛拔屌無情、只曖昧不負責不拒絕。

「咁佢對安妮塔係咩感情？」就算係逢場作戲，都會有三分真心掛？

「乜你咁認真既，遊戲黎咋嘛。」Clay企起身，伸咗個懶腰：「應該係各取所需掛。安妮塔從此衣食無憂，唔使擔心錢既問題。凱伊當養多咗隻金絲雀，中意咪帶佢出去玩下，花前月下共飲一杯酒。」





都係算啦，佢再解釋，我都係唔會明白所謂既男人的浪漫。

就正如我永遠都理解唔到，豆腐火腩飯有咩咁好食。

Clay企起身，伸咗個懶腰：「食野先，好肚餓。」

係喎，仲未食晚飯。

Clay拎走部電腦，鋪開報紙，將外賣放上黎，遞咗對筷子俾我：「多謝你山長水遠過黎搵我，呢餐我既。」





「我以為你真係要搵ptgf。」我搣開筷子，磨走木上可能殘留既刺。

「之前試過直接問，可唔可以幫手寫對白，啲女以為我混桔，係藉口黎，想呃佢地上牀。」佢語帶無奈。

「咁你又真係混桔喎。我以為有快錢賺，先上黎架咋。」我吐吐舌頭。

「仲以為你係俾我既靚仔樣征服到，先上黎。」

雖然佢的確有呢個資本，但係自己講出黎，未免太自戀了吧，我又忍唔住串佢：「靚仔唔係大哂。」

「你咁講，我會傷心架，因為我淨係得個樣。」佢雙手掩面扮喊。

「你喊啦，繼續喊，我唔會哄你。」我不為所動咁睥住佢。

「鳴鳴鳴~地球太危險，我要番火星啦。」





佢三兩下沖咗入廁所，閆埋門。

我個腦仲係度load緊啲劇情。

雖然安妮塔只係一個小角色，之後都唔會再出場，但佢畢竟係我創造出黎既角色，但佢既生活都要繼續落去，佢既結局又會如何？

凱伊口口聲聲話會保護佢，但係肯定轉個頭就唔記得咗佢。總有一天，凱伊會有新歡，到果時，安妮塔會唔會妒忌。當安妮塔徹底俾人取代，佢又會唔會悔當初作既決定。

可能係我太入戲啦。

Clay終於係廁所出番黎。

「喂，你洗咗手未呀？」我好似無聽到水龍頭既流水聲。





「呀，唔記得咗。」佢又走番入去。