男友出軌，我決定送26頂綠帽比佢: B : 007 ！機關槍 ! (3)

閃爍既霓虹招牌，輕快既樂園音樂，代幣碰撞既叮咚聲，跑黎跑去既腳步聲。

原來佢所講既冒險，係冒險樂園。我真是囧得不得了。

「如果一個女仔涉世未深，就帶佢去闖蕩MK；如果佢看盡世事，就帶佢去玩冒險樂園。」陳子俊一本正經咁話。

「無聊！」我翻咗佢一個大白眼。果一刻，我真係好無語，但轉念一想，又幾似佢既作風喎：將滿口歪理，講到好似好有道理。

陳子俊一野換咗300個金幣，塞咗其中一袋俾我：「盡情玩！錢我出！獎品歸你！」





「做咩對我咁好？」我笑住咁問。可能俾歡快既氣氛感染到，我都放鬆落黎，無一開始咁拘緊。

「咁你係唔係想我對你衰啲？」

「我驚我受唔起。」

「唔怕老實同你講，我咁做係有企圖的。」佢壓低把聲。「就係，」

陳子俊頓咗一頓，刻意營造緊張的氣氛。





「我只想你快樂！」

「原來你都係一個好人！」我拍拍佢個頭，好愉快咁下咗一個結論。

「Oh no~你用咗咁多年先發現，邊個係好人邊個係衰人。」

「呀好人，咁我地玩咩呀？」

「不如就氣墊球。」





入咗兩個代幣，張枱有氣流通過，係佢果邊跌出咗一塊球牌。

「Lady first。」

「閘住！」「反彈！」

「閘住反彈無回頭！」

「閘住反彈無回頭加句號！」

「閘住反彈無回頭加句號再加關引號！」

「你前面都無用開引號！你輸！」

時光倒流，我地又變番兩個小學雞。





玩埋掟彩虹、保齡球、機關槍、推糖機仲有夾公仔機。

「婷婷，你啲槍法咁多年都無進步過！」

「掟彩虹掟咗落人地個垃圾桶度，我都係第一見次！婷婷你真叻！」

「你唔係中意布丁狗咩？就呢隻啦。」

陳子俊真係好有料到，玩咩遊戲都有竅門。所以就算俾佢笑，我都心服口服。

最後我地滿載而歸，黎到佢最中意既籃球機。「Show time!」

佢有姿勢有實際咁穿針入籃。





「係呢？拍拖未？」我無緣晉級，企係隔離，睇佢百發百中。

「未呀，哪有女。」

「你識打籃球識彈鋼琴，仲做埋「焰王」既會長，份人賤賤格格，實冧死女啦。」

「你讚緊我定踩緊我。」佢哭笑不得。

「你話呢？」

「其實我等緊一個人。」佢難得收起平日既嬉皮笑臉。

「邊個呀？同你同班既？」

唔會等緊我吧？十世都無聯絡，失驚無神彈出來話中意我......我腦中響起周杰倫既歌詞：我已經分不清，你是友情還是錯過的愛情。哈哈，胡凱婷，打住打住，做人唔可以咁自作多情。





「唔係。」

「定係小師妹呢？」

「都唔係。」

「哼！」我係佢投籃投得正興起時，搶走佢既波。

「喂啊！」

「咁你講啦！」我毫不退讓。

「唔話俾你知！」





「時間到」既提示彈出黎。「頂！輸9咗啦！」

佢作勢要用拳頭敲落我個頭：「算啦，今日唔同你計較。」

「有啲攰。」我百感交雜，心中很不是滋味。佢以前有咩都同我講架，我地之間無秘密。

覺得無咩瘾，悔悔氣咁走咗去玩推幣機。

陳子俊突然拍一拍我：

「喂，幫我把風！」

又搞邊科。

趁無人注意，佢用個身大大力撞落部機，卡係邊緣既金幣，哇啦一聲全部跌哂落黎。

望住啲票不斷冒出黎，我抬頭望住陳子俊，講咗一句：「為咗贏，有咩係你做唔出架？」

「個個都係咁架啦，你望下果邊果個阿婆......」陳子俊滿不在乎咁話。

直到佢發現我啤實佢，佢先舉手投降：「好啦，我唔作弊啦。」

「我唔係講緊呢樣。」

佢完全摸不著頭腦，無好氣咁問：「咁做咩無啦啦發脾氣啊？」

「籃球學會會長，侯選內閣「雲霄」副會長丁X岐，曾經同友人講過，偏愛清純乖巧既女仔，因為佢地唔會反抗，容易控制，方便調教同臣服。」

我望住佢，好慢好慢咁，將「丁X岐的五十度陰影」既其中一個段落，隻字不漏咁背出黎。

「呢一段話，丁家岐應該淨係同你講過，當時我都在場。」其實我都唔係好肯定，佢係唔係只同陳子俊講過。

不過玩過大話骰既人都知道，訛人既最高境界，就係要做到面不改色，捂住一顆狂跳不止既心，最好連自己都呃埋。

陳子俊既反應，證實咗我既推測。

「你咁講咩意思？」陳子俊既語氣，閃過一絲不淡定。

佢冇否認。唔否認姐係承認啦。

「就係字面意思。」

我死咬唔放：「需要我講得再直白啲嗎？呢個友人就係你。」

面對呢個指控，陳子俊唔覺意手一抖，幾個代幣係佢指間碌咗落黎。

一堆細路沖上去搶：「地上執到錢，問天問地攞唔到！今次仲唔發大達！」

佢無心阻止佢地。

雖然隔住口罩，但我能夠想像得到，佢嘴角既笑容，就好似堆成山谷既金幣，一下子塌下來。

因為我知道，佢同我一樣，都諗番起果個夜晚。